Wednesday, December 26, 2007
أخبار فى السريع
Friday, September 14, 2007
رمضان كريم ... كل سنة و هو طيب .. عودة الـ......


جينا بقى للجد .. و رمضان .. أنا مش هأقول أنا ناوية أعمل إيه فى رمضان ده لإنى دايما بأقول حاجات كتير و مش باعمل حاجة .. فقررت إنى أنوى بينى و بين نفسى و لما يخلص الشهر إن شاء الله أبقى آجى و أقول أنا علمت إيه و يارب يحقق لى اللى فى بالى .. و يحقق لكل الواحد اللى فى باله من ختم قرآن و زيادة إيمان و عبادة و تقرب لله سبحانه و تعالى ... و رمضان كريم و كل سنة و الكل بخير
آخر حاجة بقى فالدراسة خلاص يوم الحد ( يع يع يع ) .. طبعا غنى عن القول إن باكره الكلية بس بالرغم من كده ساعات بالاقينى مشدودة مش عارفة إيه العلاقة السيكوباتية اللى بينا دى .. فحبيت أقول أى كلمة بمناسبة الدراسة ( مش عارفة الناس بتقول كل سنة و انتوا طيبين على إيه ) ... بس بمناسبة الكلية أحب أقول القوى فيه اللى أقوى منه
Friday, August 24, 2007
زمان و أنا صغيرة

مامتى : قعدى هنا و خلى بالك من أختك و ماتكلميش حد و ماتاخديش حاجة من حد انا هاطوف و آجيلك
أنا : حاضر يا مامى
بعد شوية
واحدة : انتى اسمك إيه يا حبيبتى؟
أنا : صمت
واحدة تانية : انتى عندك كام سنة يا حبيبتى ... أختك دى ؟
أنا : صمت أكتر و أكتر
واحدة عاشرة : تاخدى بسكويت يا حبيبتى
أنا فى بالى : إيه الناس الرغاية دى بقى و اهى كمان أمنية بدأت تعيط أتصرف أنا ازاى دلوقتى !!!!!
واحدة : خدى يا حبيبتى البسكويت ده إديه لأختك علشان تهدى
أنا : دورت وشى الناحية التانية
بعد شوية مامتى جت
أنا : بصى بقى يا مامى ما هو يا إما تقولى لى أكلم الناس عادى و آخد منهم البسكويت أو تقولى للناس يبطلوا يكلمونى
****************************
المكان : اسكندرية
السن : تقريبا كنت فى أولى ابتدائى
طبعا من الوصايا العشر إن لو حد قالى أروح معاه حتة أوعى أسمع كلامه ... كنت نزلت أشترى الجرنال و أنا مش لاقية بتاع الجرايد
أنا : قولى يا عمو لو سمحت فى واحد بيبيع جرايد هنا
عمو العطار : أيوة بس ده الناحية من الشارع تعالى لما أعديكى
أنا : لأ
العطار : يا بنتى هاتى إيدك أعديكى مش هتعرفى تعدى لوحدك
أنا : لأ لأ
العطار : أحسن غورى
****************************
المكان : بيتنا
السن : مش فاكرة يمكن تانية ابتدائى
قريت فى بريد الأهرام عن مشكلة الأرصفة العالية و إن الناس مش بتقدر تطلع عليها و خاصة الناس العجوزة .. و الأرصفة بتبقى عالية علشان العربيات ما تطلعش عليها
أنا : ليه الناس بتبشكى من الأرصفة العالية ما انا باطلع عليها عادى
بابا : بس يا حبيبتى فى ناس كبيرة ما بتقدرش تطلع عليها
أنا : ليه ؟
مامى : لإنها بتبقى كبيرة فى السن و عضمها ضعيف فمش بتقدر تطلع
أنا : مش فاهمة .. ما أنا باطلع عليها عادى
بابا : يا بنتى احنا بنتكلم عن الناس الكبيرة زى تيتة كده
أنا : طيب ليه الناس الكبيرة عايزة تطلع على الرصيف ؟
بابا : زى ما انتى بتعوزى تطلعى
أنا : طيب .... ليه بقى هم بيعملوا الأرصفة عالية هم مش عارفين إن فى ناس كبيرة و مش بتقدر تطلع ؟
مامى : عارفين يا حبيبتى .. بس بيعملوها عالية علشان العربيات ما تطلعش عليها
أنا : ليه ؟
مامى : هو إيه اللى ليه ؟
أنا : ليه العربيات تطلع على الرصيف مش العربيات مكانها الشارع و الرصيف مكانه الناس
مامى :آه .. بس فى عربيات بتطلع على الرصيف لما الدنيا تكون زحمة
أنا : مش مقتنعة
****************************
المكان : بيت خالتى فى اسكندرية
السن : تقريبا حوالى 12 سنة
خالتى و ابنها إسلام كانوا لسة جايين من أمريكا هو أكبر منى بـ4 شهور .. وكنا بنلعب إنه بيضرب نار على و أنا عملت نفسى ميتة
إسلام : غلط غلط اللى بيموت مش بيغمض عينيه .. كده يعنى
أنا : بس باشوفهم فى الأفلام بيموتوا كده
إسلام : فى الأفلام بيموتوا غلط
أنا : يا سلاااام .. وانت بقى اللى عارف
إسلام : أيوة طبعا ... طيب انتى تعرفى ان ربنا عنده 99 اسم
أنا : أيوة طبعا
إسلام : تعرفى إنهم مكتوبين فى جسمنا
أنا : ازاى ؟
إسلام : افتحى إيديكى .. فى الخطوط اللى موجودة فى بطن إيدك .. هتلاقى فى بطن إيدك اليمين مكتوب رقم 18 بس بالعربى .. و فى بطن إيدك الشمال رقم 81 بس بالعربى برضه ... لو جمعتيهم هيبقوا 99 :)
****************************
المكان : بيتنا
السن : 19 سنة
أنا : هو أنا ليه يا مامى مليانة كدة ؟
مامى : علشان بترمرمى
بعد كام يوم
أنا : مش فاهمة رانا و دينا دول على طول رفيعين و بيحاولوا يتخنوا مش عارفين ... تفتكرى ليه ؟
مامى : علشان بيرمرموا
المكان : بيتنا
السن : 19 سنة
أنا نايمة على السرير
أنا : أنا مش مصدقة ... أنا مش قادرة أصدق ... أخيرا أخيرا طولت ... أخيرا أخيرا السرير صغر على
أمل أختى : يمكن لو نمتى من أول السرير مش من نصه يرجع تانى قدك
Sunday, August 19, 2007
مخزون التاجات خلص
أحب شخص لقلبك في الدنيا؟
بجد مش عارفة يعنى ممكن دلوقتى لو قلت مامتى و حصل موقف ما كان يستدعى كده تلاقينى بلمت و اذبهليت .... وممكن لو حد ما اعرفوش أساسا بس تلاقينى اتحركت بسرعة ... يعنى على حسب سرعة رد فعلى
إنسان كرهته لدرجة الجنون و تمنيت لو تمسك سكينة وتنقض عليه وتغرزها فى قلبه تقتله وتقف تبص لجثته وتشفي
غليل قلبك؟
اسم كتاب - كتبه بشر برضه - انت متعلق بيه وبتقرأه كل فترة؟
أهم جهاز منزلى أنت متعلق بيه أو بتستخدمه كتير؟
الكمبيوتر عامة و فى الصيف المروحة
شيء تحس بالراحة النفسية عندما تنظر إليه؟
السما
مكان تحس فيه بالحنين الى شيء لا تدرى ماهو و ذكريات جارفة الى لاشيء؟
مكان تحس بالراحة عندما تدخله؟
المسجد بتاع النادى
اجمل مدينة زرتها داخل مصر ؟
سرعة بروسيسور جهازك؟
حقيقة لا أدرى
المساحة التى تشغلها المواد الاسلامية على جهازك؟
امممم ... غير يحبنى و طيب و يخاف على و متدين :) ... عايزاه يكون فاهم دين و دنيا و سياسة و اجتماعى و فاهم شغله و شاطر فيه ... متفهم ... لازم يبقى له هواية و لازم يود أهله و يبقى له صحاب كويسين و يساعدنى فى تربية الولاد لو جبنا يعنى ... حاجات كتير أوى
شعورك لما بتسمع كلام عن اليهود؟
مش عارفة ... إحساس ما يتوصفش
صراحة بابقى عايزة أتف عليهم ... ما قابلتش فى حياتى حد شرطة محترم إلا قلة قليلة جدا يتعدوا على صوابع الإيد الواحدة
شعورك لما بتشوف الكناس العجوز فى الطريق؟
قلبى بيتقطع
بأقول ربنا يهديه بس يارب يكون متدين صح مش الشئ الغريب اللى طالعين فيه و بيسموه تدين
إحساس يراودك فى إشارة مرور مغلقة بسبب مسئول كبير؟
بادعى عليه و بأقول اللى يفهم يحوله إشارة مرور عند أول تقاطع ( حاجة شبه كده اتقالت فى رواية أن تكون عباس العبد لأحمد العايدى بس كان ساعتها بيقولها على حد تانى )
Thursday, August 02, 2007
بأفكر بصوت عالى أوى

Saturday, July 28, 2007
جربت
طلة سريعة
Saturday, June 23, 2007
شكرا بجد

Monday, June 18, 2007
التاج علينا حق
الأول
هل كنت طالب شاطر فى المدرسة ؟
أيون ... لغاية ما دخلت المرحلة الثانوية، غطست ما طلعتش تانى
ايه كانت احب مادة و اكره مادة ليك فى المدرسة و الكلية؟
فى المدرسة كنت باحب جدا جدا الانجليزى ، تقريبا كده كنت باعشقه و لازلت ،و أكتر مادة كنت باكرهها هى الفيزيا فى كل مراحل الدراسة تليها الـMATH فى ثانوية عامة .... فى الكلية أساسى إنى باكره كل المواد و الاستثناء إنى أحب مادة .. يعنى فى سنة ممكن أحب مادة التاريخ و السنة الى بعدها لأ على حسب الدكتور .. و كان عندنا مادة اسمها تشكيل و أسس تصميم .. أساس حبى للمادة هو الدكتور بتاعها عجوز و عنده 90 سنة و زى العسل، سمعنا انه مرة واحد عمله لوحة وحشة أوى فالدكتور طلب منه انه يعتذر للوحة قدام الدفعة كلها :)
كنت عايز تتطلع ايه وأنت صغير ؟
ما تعدش .. كنت عايزة أطلع عالمة فضاء، و بعد كده كنت عايزة أبقى رقاصة، و قبل كده قلت انى هابقى كاتبة مشهورة، و بعد كده ناقدة للأفلام .. لأ لأ ده أناهأبقى مخرجة .. و جت على فترة قرب ثانوية عامة أستقريت انى هابقى دكتورة بشرية و ده من تأثير قراية سافارى .. لغاية ما دخلت علمى رياضة و مش عارفة فعلا هأبقى إيه لما اتخرج من الكلية دى و لا حتى عارفة أحلم زى ماكنت باحلم زمان
الثانى
دائما ما تطالب المرأة بالحصول على حريتها . فما مفهوم الحرية في قاموس المرأة؟
ماليش دعوة بقاموس المرأة اللى خارج من الحكومة لانه قاموس عبيط، مفهوم الحرية بالنسبة لى ان يحاسبنى على أساس إنى بنت ، كلنا بشر، كلنا هنتحاسب عند ربنا زى بعض يبقى ليه البشر يحاسبونا و يقيدونا بقوانين مختلفة باختلاف الجنس
متى احسست بنفسك "خائنة"؟
مش عارفة .... يمكن عمرى، يعنى ممكن أحسنى ندلة .. لكن خاينة دى كبيرة شوية
هل يمكن ان تحب المرأة رجلين في نفس الوقت؟ نقول الحب و ليس الاعجاب.؟
ما أظنش .. و لا حتى الحب بدرجات متفاوتة و إلا كان ربنا عمل أى حاجة يخليها تقدر تتجوز 2 رجالة فى نفس الوقت ... لكن الراجل يقدر يحب 2 فى نفس الوقت .. صحيح مش بنفس الدرجة لكن يظل الاسم اللى بيتقال على مشاعره حب و ليس إعجاب
إذا خذلك لعديد من المرات، هل ستستمرين معه في علاقة مستقرة؟؟
مش على حسب خذلنى فى إيه .. و ليه ... دى من الأسئلة الصعب الواحد يجاوب عليها كده
ماذا ترتدين فى أول لقاء لكِ مع حبيبكِ بالوصف التفصيلى؟
لبس أستريح فيه و أكون باحبه .. مش هاروح يعنى أشترى حاجة مخصوص .. لانى لازم أكون أنا و لازم يشوفنى زى ما أنا صح ... يعنى بس ممكن اهتم بانى اربط الكوتشى كويس و الطرحة تكون مظبوطة و الكحل مش سايح .. كده يعنى
سؤال بالعربية الفصحى الى العربية الفصحى، أيعقل أن تكون هيفا وهبي المرأة العربيةمن المحيط إلى الخليج، ماذا يمكن أن تفعلن لتغيير هذه الصورة، و كيف بامكاننا أن نساعدكن؟
من غير عربية فصحى .. مين قال ان هيفا هى الرمز؟!!! .. الناس بتقول كده زى بالظبط ما بيقولوا على أحمد عز هو رمز الشباب ... بس لا دى حقيقة و لا ده حقيقة
إذا عجبك شاب، بتجربي تلفتيلو انتباهو، كيف؟
هاحاول اتكلم قدامه كتير، اعرض افكارى و كده و اظهر قدامه ... بس مش هاغير فى نفسى علشان خاطر عيونه ... بس أنا عامة فى الحكاية دى بطيخ .. يعنى لو حد عجبنى باحط فى قلبى و أسكت
إذا عجبك شاب وما بادلك الاعجاب، شو بتعملي؟
خلاص يعنى هاعمله إيه
في مرشد بيقول انو البنت بترغب الشاب طالما انو بشكّل تحدي لها، شو رأيك؟
لأ مش لازم ... فى شخصيات كده بس مش كتير
هيفاء وهبي، شادية، وفاتن حمامة: مع من تتماهين أكثر؟ (بصراحة ومن دون مثاليات.
باحب جدا شادية ... بس انا مفيش من الدلع بتاعها حاجة .. هيفا بالنسبة لى عادى و مفيش حاجة من الدلع المصطنع بتاعها ... فاتن حمامة برضه عادى بس يمكن أكتر واحدة تكون قريبة من شخصيتى لانها فى أغلب أفلامها بتكون طالعة البنت الجدعة الجد
انتقي شخصية رجالية معروفة تتمتع بالكاريزما (برأيك) وتكلمي عنها ؟
جمال عبد الناصر ... رغم انى ما اعرفش أوى فى السياسة بس انت اتكلمت عن الكاريزما .. شوف قد إيه بيحبوه
من دلوقتى تقدر تقول د.أحمد خالد توفيق .. عنده كاريزما بسم الله ماشاء الله، تلاقى الواحد كده بيحبه من غير ما يعرف السبب
ونصيحةأو تعليق أرجو نشره: لما تبلشي تحكي لصاحبك عن أسماء ولادك المفترضة(لأنن بعد ما إجو وأصلاً بعد ما انفتحت سيرة زواج، إلا إذا حاطة براسك الأمومة العازبة)تأكدي إنو صادر قدامك إيام صعبة قريبة جايي
مش فاهمة يعنى إيه لزمة الجملة دى ... هو مين اللى كتب التاج ده ... يعنى و من امتى تواجد فى حياتنا كشرقيين مصطلح الأم العازبة
لماذا تنفخ المرأة في كل الزبادي كلما لسعتها الشوربة؟
يمكن لإنها بتخاف من انها تتجرح تانى ... بس عامة لا يلدغ مؤمن من جحر مرتين
هل صحيح أن المرأة تختار الشخص غير المناسب في فترة المراهقة والشباب ثم تندب حظها بعد ذلك؟
و الله مش لازم ... على حسب الشخصية و على حسب التجارب الشخصية .. و يمكن تكون هى بتختار غلط لانها مابيكونش لها تجارب و بيكون مقفول عليها و كده يعنى
ما هو أسوأ موعد غرامي مر بك؟ وما هو أكثر جزء ضايقك في هذا الموعد؟
و الله ما حصلش علشان أقولك
لماذا تدعي اغلب النساء انهن لا يجدن الطبخ؟
و ليه حد هيدعى حاجة مش فيه ... هو بس فعلا معظم بنات الجيل ده مش بيعرفوا يطبخوا ... بس ممكن تكون وجهات نظر .. يعنى ممكن تكون واحدة مش بتعرف تعمل أكلات عظيمة يعنى آخرها رز و مكرونة و بطاطس مثلا ... و ممكن تكون فعلا مش بتعرف تطبخ حاجة خالص
ذكرى وظروف اول قبلة؟
مش فاكراها أوى بس أكيد كانت حلوة أوى ..و كانت من أحب الناس لى، من أمى لما اتولدت ... دى إيه الناس الغريبة دى
هل تقبلين بأستمرار العلاقة التي تربطك بشخص (زوج أو عشيق) في حال مات الحب بينكما؟؟
ما أظنش .... عشيق مين بس .. هو احنا فين ؟ ... بس بتبقى فى حاجات تانية، درجات أقل من الحب مش الحب بتاع أول العلاقة، بيبقى مودة و احترم و عشرة، لو كل ده مش موجود و بدأ الأمر يتحول لبرود يبقى خلاص مع السلامة
هل يستحق الرجل التضحية بكل شيء من اجله والبدء معه بحياة جديدة تبدأين فيها من الصفر؟؟
مش على حسب مين الراجل ده
Sunday, June 17, 2007
Music & Lyrics

Thursday, June 07, 2007
يحكى أن ... الإجازة جت :) .. هيييه

Friday, April 27, 2007
امتحانات الموكوسة
Sunday, April 08, 2007
SLIDING DOORS .. ما تقولش لو
هو فيلم قديم إنتاج سنة 1998 ... بيحكى عن يوم فى حياة واحدة عادية بتحصلها مشكلة فى الشغل فتضطر تروح بدرى و هى نازلة علشان تلحق المترو بتعترضها بنت صغيرة على السلم .. و فى اللحظة دى الفيلم بيتقسم لخطين ماشيين متوازيين ، خط الحياة الحقيقى هو انه بسبب البنت دى ما تلحقش تركب و الأبواب المنزلقة للمترو تقفل قبل ماتركب .. و خط الحياة المفترض لو ان مامت البنت شدتها و البطلة لحقت تركب المترو ، بتروح البيت بدرى عن ميعادها فتكتشف ان صاحبها بيخونها و تهجرج و تبدأ حياتها منحنى جديد ... فى الحقيقة بتروح البيت متعورة بسبب حادثة حصلت لها و ما تعرفش حاجة عن صاحبها ده و تستمر حياتها من سئ إلى اسوأ لما تبقى حامل و وحيدة .... حياتها تزدهر و تنسى صاحبها ده و تقابل واحد تانى فعلا شخص رائع و تقضى معاه ايام جميلة ، و تموت فى حادثة و هو جنبها .... تحاول تتخطى محنتها و فى آخر الفيلم تكون راكية أسانسير و فى آخر لحظة قبل ما أبواب الأسانسير تنزلق و تتقفل يركب معاها الشخص اللى قابلته فى حياتها الافتراضية بالفيلم ( للدقة مش فاكرة مين اللى ركب فى آخر لحظة ) .......
الفيلم من وجهة نظرى رائع جدا ، يمكن يكون من أحلى الأفلام اللى شفتها أو هاشوفها .. من غير إنتاج ضخم و من غير بهرجة زايدة ... بتمثيل أكتر من جميل للرائعة جوينيث بالترو و إخراج سلس و فكرة فيلم جامدة .. مبدئيا فكرة خط الحياة المفترضة الموازى لخط حياتها الحقيقى كانت حل جميل أوى ، غير كمية الأفكار اللى بيطرحها الفيلم بطريقة غير مباشرة ... أنا فاكرة إنى زمان ماكنتش قادرة أفهم معنى الحديث " لو عرفتم الغيب لاخترتم الواقع " و كنت دايما باسأل ازاى يعنى ... معاه فهمت غير انه اكد لى انه لو متقدر لنا إننا نتقابل يبقى هنتقابل حتى لو الزمن طال و العذاب زاد و قلت إنه مفيش أمل .. لو متقدرلى أقابلك هأقالبك ... مش فى حياتى الافتراضية و لكن هنا فى حياتى الحقيقة
Friday, March 30, 2007
استفتاء و تحرر و الجنة الآن


Friday, March 09, 2007
كلاكيت تانى مرة

Saturday, February 24, 2007
مشمش صاحبتى


Tuesday, February 20, 2007
يلا حبى الحياة

Sunday, February 11, 2007
عايزة أنزل مظاهرة

Wednesday, February 07, 2007
تاكسى .. حواديت المشاوير .. خالد الخميسى
أخويا قالى لو رحتى المعرض هتلاقى كتاب اسمه تاكسى ، هاتيه علشان واحد صاحبى عايزه و انه راح قبل كده بس لقى النسخ خلصت و انه المفروض يجيبوا تانى .. طبعا أنا عمرى ما سمعت عنه بس قلت ماشى ... دخلت دار الشروق لقيت كمية نسخ غير طبيعية من الكتاب ده و استغربت أكتر و أكتر لإنه كان آخر يوم فى المعرض .. و تقريبا ماحدش بيخرج من الدار إلا و معاه نسخة من الكتاب ... طبعا لما روحت قريت الكتاب .

الكتاب عبارة عن 58 قصة قصيرة و لكل قصة قصة بطل مختلف هو سائق تاكسى آخر .... عبارة عن جزء من الحوار المتبادل بين سائق التاكسى و المؤلف باعتبار أن سائقى التاكسيات فى مصر " ينتمون فى معظمهم لشريحة اجتماعية مطحونة اقصاديا . كثيرا ما أرى فى التحليل السياسى لبع السائقين عمقا أكثر مما أجده لدى العيد من محللن سياسيين يملئون الدنيا صخبا " كما يقول المؤلف ...
تحس الصدق فى كل كلمة تقال بطبيعة انى من الناس اللى بتركب تاكىبشكل شبه يومى ... و فى الأوقات اللى مش بنخانق فيها مع السواق .. بيطلع الكلام منه اكنه حكم .. حتى لو كان أى كلام فى الهوا .
أحيى المؤلف اللى جاتله فكرة كتاب زى ده
Tuesday, February 06, 2007
تاج من ياسر
Wednesday, January 17, 2007
6 دقائق و ما يتبعها ... و ذلك نقلا عن مصادر موثوقة
1- من هو بيرلسكونى ؟
2- ما هما الحزبان الرئيسيان فى أمريكا ؟
3- من مؤلف رواية رجال فى الشمس ؟
4- من مؤلف رواية الحرب و السلام ؟
5- من مؤلف مسرحية كاسك يا وطن ؟
6- من هو أمل دنقل ؟
7- عدد ثلاث كتاب رواية أردنيين
8- من هو الممثل الحاصل على جائزة الأوسكار بدوره فى فيلم American Beauty ؟
9- من هى الممثلة الحاصة على جائزة الأوسكار لعام 2004 ؟
10- ماذا تعرف عن السبى البابلى ؟
11- ما اسم كبير الآلهة عند اليونان ؟
12- ما هى عقدة أوديب ؟
13- أين تقع دولة المجر ؟
14- ما هى عاصمة المجر ؟
15- ما الدول التى تحد قبرص برا ؟
16- ما الدول التى تحد الفاتيكان ؟
17- متى وقعت الثورة الفرنسية ؟
18- متى انضمت إيران إلى جامعة الدول العربية ؟
19- من مؤلف مقطوعة بحيرة البجع ؟
20- من مؤلف مقطوعة الفصول الأربعة ؟
21- من صاحب أغنية فى قلب الليل ؟
22- من صاحبة أغنية آه و نص ؟
عامة أنا باعتبرهم 21 سؤال لما أجاوب على 12 سؤال منهم و ده نجاح ... بس القضية دلوقتى مش فى انى جاوبت على كام سؤال و لا أبطال الفيلم ده جاوبوا على كام سؤال ... القضية انا شايفاها فى حاجتين ... انك تفرق بين انك تكون مش عارف أو انك تملك قدرا وفيرا من الغباء بحيث انك لما تتسأل مين الممثلة اللى اخدت الأوسكار ما تسألش عربية و لا أجنبية و بعد كده تقول نبيلة عبيد ... أو انه يتقالك مين الممثل الحاصل على الأوسكار عن فيلم أميركان بيوتى فتقول شون كونرى عن فيلم lord of the rings .. يعنى ياريت غبى بإجابة صح ... الحاجة التانية اللى شايفاها هى الشجاعة اللى بتتطلبها كلمة مش عارف ... يعنى فى الفيلم ده لقيت كمية مش عارفة كتير جدا .. وده فى نظرى أحسن بمراحل من نبيلة عبيد اللى اخدت جايزة الأوسكار ... و مش عارفة ليه قولة كلمة مش عارف صعبة كده ... يعنى فى برنامج تانى بس مصرى كانوا بيسألوا عن القرية الذكية اللى فى مصر .. قام واحد قال ان القرية الذكية دى حلوة أوى و هو نزل المية هناك و المية ألوانها تحفة بنفسجى و أخضر و حاجات حلوة كده ... مش هادعى إنى أعرف إيه القرية الذكية و لكن على الأقل مش هارد رد غبى زى ده .
المشكلة مش فى بس الجملة اللى قالها يحيى العبد الله فى آخر الفيلم ( يقرأ الطفل العربى ما يقارب 6 دقائق سنويا خارج منهاجه الدراسى ) ... لان المعلومات مش بس بتتجاب من الكتب اللى برة المنهج الدراسى ... ممكن تيجى من خبر تقراه على النت أو حاجة تسمعها فى التليفزيون أو أو أو ... الحكاية مش بس قضية قراية ... لإن أغنية فى قلب الليل لعلى الحجار مش محتاج إنك تقرا علشان تعرف انها بتاعته ... المشكلة أساسا فى الإعلام هو اللى بيركز على حاجة معينة فبيخليك مهما كنت مالكش صلة بالحاجة دى بتعرفها ... يعنى كمثال على كده بابا كان مالوش أبدا أبدا فى الأغانى الحديثة و بيسمع أم كلثوم و كده ... لكن أول ما صاروخ نانسى انطلق عرفها الأول باسم مش عارف إيه عجرم .. ومفيش يومين و حفظ اسمها ... ده مش لإن بابا بيتابعها و لكن لإن الإعلام ما سابش مكان إلا و تكلم فيه عن نانسى ... دى أول حاجة .
تانى حاجة ... هى مشكلة تعليم برضه .... يعنى لو التعليم كويس ماكانش ده يبقى الحال .. لان معلومة زى متى قامت الثورة الفرنسية أنا متأكدة انى اخدتها بس مش قادرة افتكرها ... و نفس الحال مع أختى اللى فى أولى إعدادى .. قالت لى أنا لو كنت لسة فى 5 ابتدائى كنت زمانى جاوبت ... و هى دى القضية ... ان الدراسة ساعات بيبقى فيها معلومات أساسية و بديهية .. لكن لاننا تعودنا ان نرمى كل ما يتعلق بالدراسة فى أعماق النيل بمجرد ما نخلص الامتحان .. فأصبحنا نرمى حتى المعلومات التى لا تستلزم جهد لحفظها ... الحمد لله اننا ما رميناش الكتابة و القراية و رجعنا أميين بنبصم .
تالت حاجة ... هى مشكلة أهالى ... ان لو الأهل شافوا عيالهم ماسكين قصة و لا أى حاجة تانية غير المتعلقة بالدراسة ، الكلمة اللى بتتقال سيبوا اللى بتقروه ده و قوموا ذاكروا حاجة تنفعكوا ... طيب و هل الدراسة نفعتنا ؟ دى المعلومة الوحيدة اللى انا عارفاها من أيام الدراسة فى ابتدائى راحت مع الزمان ... لكن نفس المعلومات اللى انا عارفاها من أيام ابتدائى و إعدادى بس من القصص فضلت أغلبها فى الذاكرة ... لان القراية ماحدش بيجبرنا عليها .. لكن المذاكرة بتبقى شئ واجب للنجاح و التفوق ... إلخ .... سيبونا نقرا اللى احنا عايزينه و نوعدكوا اننا هننجح بإذن الله رغم يعنى اللى نجحوا عملوا إيه بنجاحهم ده ... بس ماشى .
غير كل ده بقى سياسة الدولة اللى فعلا عايزة الشعب يبقى أمى فلا هو عارف يقرا و لا هو عارف يكتب ... و قال إيه عاملين معرض كتاب ... و يعدوا كل سنة يعيطوا و يلطموا فى كل الجرايد ان ماحدش بيشترى و ما بقاش فى مثقفين .. إلخ ، القضية مش انه ما بقاش فى مثقفين .. القضية ان الناس مفلسين ، أسعار الكتب تغلى و الناس ما تشتريش و الكتَاب و الناشرين يصوتوا و الحكومة تبتسم لانها كل سنة غرضها بيتحقق أكتر و أكتر ... مفيش حد فى البلد دى هيعرف يقرا نياهاهاهاها ... و طبعا كفاية انها هى اللى بتحط المناهج اللى تخنق على نفس الواحد .
عامة علشان ماحدش يتقهر مش احنا بس ( كعرب يعنى ) اللى مش بنقرا ... أمريكا برضه عندها نفس الأزمة و بتعانى منها بعكس اللى بيوحوه لنا فى أفلامهم .. من البرنامج ده لقيت ان كتير من الأمريكيين عاملين زى شخصية جوى فى فريندز .. شخصية ظريفة و مرحة و لكنها سطحية تماما ما عندهاش أى معلومات عن أى حاجة ...
الأفلام ضحكتنى و لكنها ما أبكتنيش على حالنا ... لإن الحال ده معرف من زمان و مش أول مرة نكتشفه ... كل الحكاية إنه يوم عن يوم الحكاية بتتفشى أكتر و بتنتشر ... ربنا يستر .


