مامتى : قعدى هنا و خلى بالك من أختك و ماتكلميش حد و ماتاخديش حاجة من حد انا هاطوف و آجيلك
أنا : حاضر يا مامى
بعد شوية
واحدة : انتى اسمك إيه يا حبيبتى؟
أنا : صمت
واحدة تانية : انتى عندك كام سنة يا حبيبتى ... أختك دى ؟
أنا : صمت أكتر و أكتر
واحدة عاشرة : تاخدى بسكويت يا حبيبتى
أنا فى بالى : إيه الناس الرغاية دى بقى و اهى كمان أمنية بدأت تعيط أتصرف أنا ازاى دلوقتى !!!!!
واحدة : خدى يا حبيبتى البسكويت ده إديه لأختك علشان تهدى
أنا : دورت وشى الناحية التانية
بعد شوية مامتى جت
أنا : بصى بقى يا مامى ما هو يا إما تقولى لى أكلم الناس عادى و آخد منهم البسكويت أو تقولى للناس يبطلوا يكلمونى
****************************
المكان : اسكندرية
السن : تقريبا كنت فى أولى ابتدائى
طبعا من الوصايا العشر إن لو حد قالى أروح معاه حتة أوعى أسمع كلامه ... كنت نزلت أشترى الجرنال و أنا مش لاقية بتاع الجرايد
أنا : قولى يا عمو لو سمحت فى واحد بيبيع جرايد هنا
عمو العطار : أيوة بس ده الناحية من الشارع تعالى لما أعديكى
أنا : لأ
العطار : يا بنتى هاتى إيدك أعديكى مش هتعرفى تعدى لوحدك
أنا : لأ لأ
العطار : أحسن غورى
****************************
المكان : بيتنا
السن : مش فاكرة يمكن تانية ابتدائى
قريت فى بريد الأهرام عن مشكلة الأرصفة العالية و إن الناس مش بتقدر تطلع عليها و خاصة الناس العجوزة .. و الأرصفة بتبقى عالية علشان العربيات ما تطلعش عليها
أنا : ليه الناس بتبشكى من الأرصفة العالية ما انا باطلع عليها عادى
بابا : بس يا حبيبتى فى ناس كبيرة ما بتقدرش تطلع عليها
أنا : ليه ؟
مامى : لإنها بتبقى كبيرة فى السن و عضمها ضعيف فمش بتقدر تطلع
أنا : مش فاهمة .. ما أنا باطلع عليها عادى
بابا : يا بنتى احنا بنتكلم عن الناس الكبيرة زى تيتة كده
أنا : طيب ليه الناس الكبيرة عايزة تطلع على الرصيف ؟
بابا : زى ما انتى بتعوزى تطلعى
أنا : طيب .... ليه بقى هم بيعملوا الأرصفة عالية هم مش عارفين إن فى ناس كبيرة و مش بتقدر تطلع ؟
مامى : عارفين يا حبيبتى .. بس بيعملوها عالية علشان العربيات ما تطلعش عليها
أنا : ليه ؟
مامى : هو إيه اللى ليه ؟
أنا : ليه العربيات تطلع على الرصيف مش العربيات مكانها الشارع و الرصيف مكانه الناس
مامى :آه .. بس فى عربيات بتطلع على الرصيف لما الدنيا تكون زحمة
أنا : مش مقتنعة
****************************
المكان : بيت خالتى فى اسكندرية
السن : تقريبا حوالى 12 سنة
خالتى و ابنها إسلام كانوا لسة جايين من أمريكا هو أكبر منى بـ4 شهور .. وكنا بنلعب إنه بيضرب نار على و أنا عملت نفسى ميتة
إسلام : غلط غلط اللى بيموت مش بيغمض عينيه .. كده يعنى
أنا : بس باشوفهم فى الأفلام بيموتوا كده
إسلام : فى الأفلام بيموتوا غلط
أنا : يا سلاااام .. وانت بقى اللى عارف
إسلام : أيوة طبعا ... طيب انتى تعرفى ان ربنا عنده 99 اسم
أنا : أيوة طبعا
إسلام : تعرفى إنهم مكتوبين فى جسمنا
أنا : ازاى ؟
إسلام : افتحى إيديكى .. فى الخطوط اللى موجودة فى بطن إيدك .. هتلاقى فى بطن إيدك اليمين مكتوب رقم 18 بس بالعربى .. و فى بطن إيدك الشمال رقم 81 بس بالعربى برضه ... لو جمعتيهم هيبقوا 99 :)
****************************
المكان : بيتنا
السن : 19 سنة
أنا : هو أنا ليه يا مامى مليانة كدة ؟
مامى : علشان بترمرمى
بعد كام يوم
أنا : مش فاهمة رانا و دينا دول على طول رفيعين و بيحاولوا يتخنوا مش عارفين ... تفتكرى ليه ؟
مامى : علشان بيرمرموا
المكان : بيتنا
السن : 19 سنة
أنا نايمة على السرير
أنا : أنا مش مصدقة ... أنا مش قادرة أصدق ... أخيرا أخيرا طولت ... أخيرا أخيرا السرير صغر على
أمل أختى : يمكن لو نمتى من أول السرير مش من نصه يرجع تانى قدك
35 comments:
تحفهههههه بجد مت على نفسى من الضحك بس انا وكنت ضغيرة مكنتش بتلامض كنت مطيعهههه
دلوقت بنتى بتعمل زيك تمام انهاردا بقولها القعاد على النت ساعتين بس قالتلى القرار دا يطبق على البيت كله !!!!!!
عندها 7 سنين ربنا بخليلك ماما ويخليكى لها
جامده اوي هو انتي محاميه ولا ايه
او وكيل نيابه
وكمان بتقري بريد الجمعه من تانيه ابتدائي
دا احنا نشكر ربنا انك بتقريلنا بقى
بريد الجمعه
ناقص تقولي بتكتبي ف مال واعمال
اللهم لا حسد
تحياتي
ههههههههههههههههههههههههههههه
منك لله يا ايات
انا النهاردة عرفت اسم المدونة ده جاي منين
واضح انك سايكومنزمان يا قمر
momte3aaaaaaaaaaaaaaaaaaa :D
السلام عليكم
هههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههه
مخزون رائع من الذكريات
وكله كوم ونص السرير كوم تاني
بتغشي يا ايات
ههههههههههههههههههههههههههههههههههههههههههههههههههههه
تحياتي
هههههههههه
لاء بجد مش ممكن انا مش عارفه هم ليه كانوا بيخفونا من الناس واحنا صغيرين بس انتى جدعه انا كنت هبله لو حد قالى تعالى ياحبيبتى اما أخطفك هتلاقى ايدى فى ايده على طول
تحفه نايمه من نص السرير ده
الى قوليلى صحيح هو الواحد بيموت ازاى فى امريكا معلش اختلاف ثقافات برضه
جامده أشوفك على خير ان شاء الله:)
هههههههههههه
شكك كنتى بتقعدى معايا كتير يا بنتى
بس أنا بقيت لمضة على كبر
...
لا بس بوست جاااامد
هههههههههههه
هو امنية كمان زمان كانت بتعيط
امبارح جت درس العربى وهى ناسية كل حاااااااااجة
انا صاحبتها ف مدرسة عزيز اباظة :D
مكنتش اعرف ان ليها اخت عثولة وجامدة كدة :)
فظيع البوست ده
دمه خفيف جدا
بالذات السرير اللى صغر عليك ده
البوست جميل واسلوبك فى السرد حلوة
كمان طريقه رابطك بين الاحداث واستذكرها هايل
تحياتى
لذيذ اوي موضوع السرير اللي صغر عليكي اخيرا دا :D
بنت القمر .. ربنا يخليكى .. بيتهيئلى و احنا صغيرين لازم يبقى لينا لحظات لماضة ... ربنا يخليلك بنتك و يخليكى ليها يارب
ولو .. كنا بنقول كده على أختى الصغيرة يظهر إنها صفة عائلية :)
يا سيدى و أنا صغيرة كنت باقرا كل حاجة ... دلوقتى بقى .. يلا الحمد لله
سلومتى .. ده أكيد .. و لسة هتعرفينى كمان و كمان
وحشتينى يا هانم و الإجازة خلاص خلصت
ديزى .. ربنا يخليكى و الحمد لله إنها عجبتك
مهند .. أصلى من زمان أوى و أنا نفسى أطول بقى شوية .. وعلى رأى المش عارف إيه الجعان يحلم بسوق العيش
كانوا و لا زالوا بيخفونا من الناس .. بس انتى يا مشمش حكايتك حكاية .. و كمان ما انتى عارفة أنا فرعة ازاى فطبيعى إنى لما انام فى السرير من أوله هيكون مش قدى أكيد .. و فى أمريكا بيموتوا و هم فاتحين عنيهم و طلعين لسانهم برة :)
أشوفك بكرة إن شاء الله
ريناد .. اللماضة شئ بيمشى فى الدم :)
رانا ... أمنية كانت حكايالى عنك كتير بس ماكنتش أعرف إن ليكى بلوج ... طبعا صاخبتك بقى مش هاحكيلك عليها و على عمايلها .. نورتينى و يارب ما تقطعيها عادة :)
ياسمين ... ميرسى جدا لذوقك .. هو أنا بس خفت لا السرير يكون صغر على .. أصلى فرعة أوى و مش ناقصة
ممكن .. ميرسى جدا لذوقك .. و مش عارفة أقول إيه قدام الكلام الحلو ده
شاكرة المرور جدا
نمنماية ... واحشانى جدا بقالى قرون و قرون ما كلمتكيش .. ما انتى عارفة بقى الواحد لما يبقى نفسه فى حاجة بيعمل المستحيل علشان يحققها :)
ههههههههههههه
هههههههههه
موتنني من الضحك
يا لمضة يا قمر
مدونتك ظريفة
تحياتي الي الغد
بعد السلام عليكم
ذكريات طفولتك قلبت علي الواحد ذكريات طفولته
مدونتك جميلة
اسعدتني زيارتك لمدونتي المتواضعة
أتمني دوام التواصل
هههههههه
ده انتي و انتي صغيرة كنتي لمضة اوي اوي طب انتي تموتي من الضحك ههههه .. مدونتك لذيذة و سكرة مثلك يا سكرة بس قولي لاسلام اني دورت في ايدي و ملقتش 18 بلعربي ولا 81 بلعربي حبقى اعمل بحث جوجل و اجبها
تحياتي يا قمرة يا صغيرة يا لمضة
السلام عليكم
كل عام وانتم بخير ويعيد عليكم الايام بالخير والسعاده
وتقبل الله صومكم وقيامكم
لا تنسونا بالدعاء
خلاص خلاص قولي لأسلام لقيت الارقام 18 و 81 عملت بحث جوجل
هههههه
بوست تحفه اوى
بالذات وانتى صغيره
فكرتينى باختى
الاسئله اللى مش بتخلص دى
احلى حاجه فى الاطفال لماضتهم
:D
ربنا يكرمك
وكل عام وانتى بخيييييير
رمضان كريم
:)
السلام عليكم
كل عام وانتي اقرب الي طاعة الله
وتقبل الله منك صالح الاعمال وصيامك وقيامك
تحياتي
نسألكم الدعاء
عروس البحر .. أسعدنى إنى ضحكتك و ميرسى كتير ليكى
أبو صلاح .. هى كده الذكريات بتجيب بعضها بس الحمد لله إنها ذكريات حلوة المرة .. مدونتك أجمل و إن شاء الله التواصل يدوم
بنوتة .. ميرسى بجد ليكى جدا .. و انا مش عارفة ازاى ماكنتيش لاقياهم ده حتى فى حركة تانية عرفتها مؤخرا بال18 و ال81 .. انك لو حطيتهم جنب بعض هيبقوا 1881 و هى سنة ثورة عرابى (أو هوجة عرابى) .. عامة أنا أسعدنى إنك فعلا دورتى عليها فى جوجل .. تحياتى ليكى
مهند .. و انت طيب و يارب بلغنا رمضان .. و يارب يارب كل واحد نفسه يحقق حاجة فى رمضان و ماكنش بيحققها قبل كده إنه يحققها رمضان ده إن شاء الله
حفيدة الزبير .. أحلى حاجة فى الأطفال اسئلتهم و براءتهم حتى و هم بيرخموا على اللى قدامهم و ربنا يخلى لك أختك
و انتى بألف خير وصحة و سعادة و الله أكرم
اكتر موقف عجبني بتاع ابن خالك ولا ابن خالتك اللي كان راجع من امريكا وبيلعب معاكي وضربك بالنار وموتك
حتى واحنا عيال لما بنلعب بنموت برضه؟؟؟؟
بس بجد شوية مواقف مسخره
يمكن عشان بنرمرم كلنا ؟؟؟
انا بهزر على فكره احسن تقفشي منني من اولها
كل سنه وانتي طيبه
والسلاموووز ختامووووز
Post a Comment