يحكى أن ... الإجازة جت :) .. هيييه

و خلصت الامتحانات النهاردة الساعة واحدة ... و اخدت الاجازة النهاردة ، صحيح الامتحان كان جاى زى وش اللى حطه و احتمال كبير جدا انى أشيل المادة دى بس ربنا يستر إن شاء الله ... بقية الامتحانات الحمد لله كان كويسة و فى منها اللى كان رائع ... بس دى ... يلا ربنا يستر .. المفروض أساسا إن عندنا مشروع يتسلم كمان أسبوع بس خلاص الشلة العظيمة قررت انها ما تعملوش و طظ فى الكلية و طظ فى الدكاترة .. وصلنا لدرجة زهق رهيبة من الكلية و من التعليم و اللى بيتعلموه على رأى الدستور ، بس فى نفس الوقت عندى إحساس غريب جدا ... عندى إحساس انى ما امتحنتش و انى ما اخدتش الاجازة و ان اللى عدى ده كان امتحانات ميد ترم مش أكتر .. يمكن من طول المدة بيتهئ للواحد انها مالهاش نهاية و مش بيقدر يصدق انها خلصت لما تخلص فعلا .... و الله مش عارفة

طبعا بما ان معظم الناس أصلا لسة بتمتحن فأنا و بكل فخر باطلع لسانى للناس اللى لسة بتمتحن ( بس مش أوى علشان ما يدعوش على و أشيل المادة بسببهم :) ) ، و طبعا باستثنى منهم ضحايا ثاونة عامة ... كفاية اللى هم فيه أساسا

عن مشاريعى الصيفية بقى .. نفسى أشوف صحابى بجد .. وحشونى أوى ، و نفسى أخس القرار اللى واخداه بقالى 5 سنين ، عايزة اعمل كام موضوع كده و انزل ألف عليهم فى المكتبات ده غير انى عايزة انزل ألف فى القاهرة اللفة اللى بقالى كتير باحلم بيها ، امممممم عايزة اتعلم خياطة و تريكو ، و عايزة اتعلم الإسعافات الأولية ... و عايزة أشوف إذا كان القرار اللى انا واخداه لمهنة المستقبل ..اتدرب عليه فى الصيف يا تنفع يا ادورلى على مهنة تانية ، امممممم .. فى برنامج عايزة اتعمله ألا و هو الماكس .. و بافكر اتعلمه لوحدى ... مش عارفة ... حاجات كتير أوى و أكيد لو حققت أى منها هآجى هنا و أعبر عن فرحتى

على فكرة ... شكرا جدا للى اهتموا و عدوا على البلوج و للى اهتموا أكتر و ردوا و للى اهتموا اكتر و أكتر و دعوا لى بجد