زمان و أنا صغيرة

المكان : مكة المكرمة

السن : حوالى 7 سنين و أختى حوالى سنة و نص

مامتى : قعدى هنا و خلى بالك من أختك و ماتكلميش حد و ماتاخديش حاجة من حد انا هاطوف و آجيلك

أنا : حاضر يا مامى

بعد شوية

واحدة : انتى اسمك إيه يا حبيبتى؟

أنا : صمت

واحدة تانية : انتى عندك كام سنة يا حبيبتى ... أختك دى ؟

أنا : صمت أكتر و أكتر

واحدة عاشرة : تاخدى بسكويت يا حبيبتى

أنا فى بالى : إيه الناس الرغاية دى بقى و اهى كمان أمنية بدأت تعيط أتصرف أنا ازاى دلوقتى !!!!!

واحدة : خدى يا حبيبتى البسكويت ده إديه لأختك علشان تهدى

أنا : دورت وشى الناحية التانية

بعد شوية مامتى جت

أنا : بصى بقى يا مامى ما هو يا إما تقولى لى أكلم الناس عادى و آخد منهم البسكويت أو تقولى للناس يبطلوا يكلمونى

****************************

المكان : اسكندرية

السن : تقريبا كنت فى أولى ابتدائى

طبعا من الوصايا العشر إن لو حد قالى أروح معاه حتة أوعى أسمع كلامه ... كنت نزلت أشترى الجرنال و أنا مش لاقية بتاع الجرايد

أنا : قولى يا عمو لو سمحت فى واحد بيبيع جرايد هنا

عمو العطار : أيوة بس ده الناحية من الشارع تعالى لما أعديكى

أنا : لأ

العطار : يا بنتى هاتى إيدك أعديكى مش هتعرفى تعدى لوحدك

أنا : لأ لأ

العطار : أحسن غورى

****************************

المكان : بيتنا

السن : مش فاكرة يمكن تانية ابتدائى

قريت فى بريد الأهرام عن مشكلة الأرصفة العالية و إن الناس مش بتقدر تطلع عليها و خاصة الناس العجوزة .. و الأرصفة بتبقى عالية علشان العربيات ما تطلعش عليها

أنا : ليه الناس بتبشكى من الأرصفة العالية ما انا باطلع عليها عادى

بابا : بس يا حبيبتى فى ناس كبيرة ما بتقدرش تطلع عليها

أنا : ليه ؟

مامى : لإنها بتبقى كبيرة فى السن و عضمها ضعيف فمش بتقدر تطلع

أنا : مش فاهمة .. ما أنا باطلع عليها عادى

بابا : يا بنتى احنا بنتكلم عن الناس الكبيرة زى تيتة كده

أنا : طيب ليه الناس الكبيرة عايزة تطلع على الرصيف ؟

بابا : زى ما انتى بتعوزى تطلعى

أنا : طيب .... ليه بقى هم بيعملوا الأرصفة عالية هم مش عارفين إن فى ناس كبيرة و مش بتقدر تطلع ؟

مامى : عارفين يا حبيبتى .. بس بيعملوها عالية علشان العربيات ما تطلعش عليها

أنا : ليه ؟

مامى : هو إيه اللى ليه ؟

أنا : ليه العربيات تطلع على الرصيف مش العربيات مكانها الشارع و الرصيف مكانه الناس

مامى :آه .. بس فى عربيات بتطلع على الرصيف لما الدنيا تكون زحمة

أنا : مش مقتنعة

****************************

المكان : بيت خالتى فى اسكندرية

السن : تقريبا حوالى 12 سنة

خالتى و ابنها إسلام كانوا لسة جايين من أمريكا هو أكبر منى بـ4 شهور .. وكنا بنلعب إنه بيضرب نار على و أنا عملت نفسى ميتة

إسلام : غلط غلط اللى بيموت مش بيغمض عينيه .. كده يعنى

أنا : بس باشوفهم فى الأفلام بيموتوا كده

إسلام : فى الأفلام بيموتوا غلط

أنا : يا سلاااام .. وانت بقى اللى عارف

إسلام : أيوة طبعا ... طيب انتى تعرفى ان ربنا عنده 99 اسم

أنا : أيوة طبعا

إسلام : تعرفى إنهم مكتوبين فى جسمنا

أنا : ازاى ؟

إسلام : افتحى إيديكى .. فى الخطوط اللى موجودة فى بطن إيدك .. هتلاقى فى بطن إيدك اليمين مكتوب رقم 18 بس بالعربى .. و فى بطن إيدك الشمال رقم 81 بس بالعربى برضه ... لو جمعتيهم هيبقوا 99 :)

****************************

المكان : بيتنا

السن : 19 سنة

أنا : هو أنا ليه يا مامى مليانة كدة ؟

مامى : علشان بترمرمى

بعد كام يوم

أنا : مش فاهمة رانا و دينا دول على طول رفيعين و بيحاولوا يتخنوا مش عارفين ... تفتكرى ليه ؟

مامى : علشان بيرمرموا

****************************

المكان : بيتنا

السن : 19 سنة

أنا نايمة على السرير

أنا : أنا مش مصدقة ... أنا مش قادرة أصدق ... أخيرا أخيرا طولت ... أخيرا أخيرا السرير صغر على

أمل أختى : يمكن لو نمتى من أول السرير مش من نصه يرجع تانى قدك

مخزون التاجات خلص

رجعت من اسكندرية حبيبتى و قاعدة قدام الجهاز مش لاقية حاجة أعملها و لا أكتبها قلت فى بالى ما أنا لسة قدام تاجين ما أحطهم

و آدى التاج الأول من سلمى هانم متغيرة شوية

هل تسعد عندما يمرر لك احدهم تاج؟

آه ساعات بيبقى فى تاجات لطيفة و ساعات بتبقى فى تاجات تخنق ... ده على التاج لكن على الشخصية فباحب كده عادى

هل مقدار سعادتك أو شعورك ايا كان- عند تمرير التاج لك يختلف حسب المدون الذي يمرر لك التاج؟

أكيد

هل تستمتع عند إجابتك عن أسئلة التاج؟

على حسب مدى رخامة التاج

هل ترى للتاج أهمية حقيقية؟

أيون ... لإنه بيقرب الناس من بعضها .. الناس اللى مش تشوف بعض غير على المدونة

هل فكرت في عمل تاج خاص لك من قبل؟

فكرت فى مرة إنى أعمل بس ماعرفتش أكتب أى سؤال :)

هل تفضل قراءة اجوبة التاج عند المدونين الاخرين؟ أم لا تهتم سوى بالتدوينات الأخرى فقط؟

لو حد يهمنى أو حد أنا بأقراله عموما يبقى اقرا التاجات عنده

عندما ترد على التاج ما الذي تراعيه اكثر؟

الأمانة فى الإجابة ... يعنى ما احاولش أحسن من نفسى ... أنا كده شايفة نفسى كويسة

هل تحرص على قراءة اجابات من تمرر لهم التاج ؟ و هل تغير إجابتهم للتاج شيئا في ادراكك لهم ؟

أكيد باحرص و إلا ماكنتش مررته ... و مفيش مشاكل لو إدراكى اتغير ما أنا بعتاه أساسا علشان أعرفهم أكتر

هل تلتزم حرفيا بأسئلة التاج؟

لو على حسب فهمى للسؤال يبقى آه

ما هي نوعية التاجات التي تفضلها؟

مش عارفة بالظبط بس باحب التاجات الخفيفة اللطيفة

إلى من تحرص على تمرير التاج؟

الناس اللى باحبهم و قريبين منى ... أو مثلا باحاول إنى اتعود عليهم

ندخل على بتاع شيماء واحدة من الناس

أحب شخص لقلبك في الدنيا؟

مش حد واحد ... كتير أوى من أهلى و صحابى و حتى من المشاهير ( يعنى أحمد توفيق مثلا اللى باتمنى لو كان قريبى بأى وسيلة )

إنسان مستعد تضحي بحياتك - ركز فى كلمة حياتك - عشانه؟

بجد مش عارفة يعنى ممكن دلوقتى لو قلت مامتى و حصل موقف ما كان يستدعى كده تلاقينى بلمت و اذبهليت .... وممكن لو حد ما اعرفوش أساسا بس تلاقينى اتحركت بسرعة ... يعنى على حسب سرعة رد فعلى

إنسان كرهته لدرجة الجنون و تمنيت لو تمسك سكينة وتنقض عليه وتغرزها فى قلبه تقتله وتقف تبص لجثته وتشفي
غليل قلبك؟

أى حد ظالم و بالذات لو كان حاكم بيتحكم فى شعبه و باقى الشعوب أكنهم عرايس ماريونيت

ما هو:اسم أجمل كتاب كتبه بشر قرأته ومحتفظ به حتى الان؟

امممممم ... مش فاكرة يمكن ثلاثية إيجور فى سلسلة ما وراء الطبيعة لأحمد خالد توفيق

اسم كتاب - كتبه بشر برضه - انت متعلق بيه وبتقرأه كل فترة؟

اى حاجة كتبها أحمد خالد توفيق

أهم جهاز منزلى أنت متعلق بيه أو بتستخدمه كتير؟

الكمبيوتر عامة و فى الصيف المروحة

شيء تحس بالراحة النفسية عندما تنظر إليه؟

السما

مكان تحس فيه بالحنين الى شيء لا تدرى ماهو و ذكريات جارفة الى لاشيء؟

البحر .. و يا سلام لو كان فى الشتا

مكان تحس بالراحة عندما تدخله؟

المسجد بتاع النادى

اجمل مدينة زرتها داخل مصر ؟

اسكندرية

نوع هاتفك المحمول؟

نوكيا مش فاكرة رقمه

سرعة بروسيسور جهازك؟

حقيقة لا أدرى

حجم ذاكرة -هارد- جهازك؟

80

المساحة التى تشغلها المواد الاسلامية على جهازك؟

مش عارفة

نفس المساحة السالف ذكرها فى قلبك -الإجابة لنفسك عشان الرياء يا اخواننا -؟

برضه مش عارفة

أهم هدف انت واضعه لحياتك الآن؟

إنى أكون مفيدة لى و للى حوالى ... مفيدة لبلدى و لدينى ... و مش عايزة أشتغل أى شغلانة و السلام ... لو ماكنتش حاجة مؤثرة يبقى بلاش منها

مواصفات فتى \فتاة الأحلام بالنسبة لك؟

امممم ... غير يحبنى و طيب و يخاف على و متدين :) ... عايزاه يكون فاهم دين و دنيا و سياسة و اجتماعى و فاهم شغله و شاطر فيه ... متفهم ... لازم يبقى له هواية و لازم يود أهله و يبقى له صحاب كويسين و يساعدنى فى تربية الولاد لو جبنا يعنى ... حاجات كتير أوى

صف ما يأتى:شعورك لما بتسمع كلمة مصر ؟

حتى دوشة صوت جيرانى ... و الزحام وحشونى تانى ....... دى أول حاجة جت فى بالى رغم إنى مش متغربة جسديا عن مصر ... بس نفسيا حسة إنى بعيدة أوى .. بعيدة أوى عن مصر اللى باقرا عنها فى القصص و نفسى أروح أطبطب عليها و أقولها معلش هنرجع لك حقك يا حبيبتى ما تزعليش

شعورك لما بتسمع كلام عن اليهود؟

مش عارفة ... إحساس ما يتوصفش

شعورك لما بتشوف ظابط شرطة؟

صراحة بابقى عايزة أتف عليهم ... ما قابلتش فى حياتى حد شرطة محترم إلا قلة قليلة جدا يتعدوا على صوابع الإيد الواحدة

شعورك لما بتشوف الكناس العجوز فى الطريق؟

قلبى بيتقطع

افكارك تجاه شاب ماشى فى الطريق يلبس جلابية بيضاء قصيرة وعمامة وله لحية وبجيبه السواك وبيده المصحف؟

بأقول ربنا يهديه بس يارب يكون متدين صح مش الشئ الغريب اللى طالعين فيه و بيسموه تدين

إحساس يراودك فى إشارة مرور مغلقة بسبب مسئول كبير؟

بادعى عليه و بأقول اللى يفهم يحوله إشارة مرور عند أول تقاطع ( حاجة شبه كده اتقالت فى رواية أن تكون عباس العبد لأحمد العايدى بس كان ساعتها بيقولها على حد تانى )

خلصت الحمد لله مخزون التاجات اللى كان عندى ... أحوله لشيماء طبعا و أكيد سوسكا ... و لأول مرة أتطفل على مهند لو عايز ياخده يتفضل :)

بأفكر بصوت عالى أوى

رحت النهاردة أمسية د. إبراهيم الفقى اللى كانت فى قاعة المؤتمرات و كنت رحت قبلها بكام أسبوع كده مقدمة لمحاضرات زدنى بما إن العالم كله حواليا بيتكلم عليها و خصوصا كمان لما لقيت واحدة من أعز صاحباتى مهتمة بالموضوع و هتحضر و كدة ... قلت أروح أشوف إيه اللى بيحصل هناك ... إيه الموضوع اللى بيشغل فكر الناس ده

بصوا مبدئيا أنا مش ضدهم علشان ماحدش ييجى يقولى انتى بتكرهيهم و انتى ما بتفهميش حاجة و الكلام الحلو ده ... أنا أولا مش باقتنع أبدا بالكلام النظرى و خصوصا لما حد يديهولى لإنه عايز يدهولى .. يعنى بيديهولى فى كورس مدفوع التمن ... باحس ساعتها إنى باخد درس ... و لإنى أساسا معقدة من حكاية الدروس دى، دى نقطة ... نقطة تانية و بأقول مرة تانية إن بتوع التنية البشرية على راسى من فوق ... إن كلامهم مكرر و معروف أو على الأقل بالنسبة لى و مش هارسم لقى عليكوا إنى البنت الفظيعة اللى الكتاب مش بيفارق إيدها .. بس أنا فعلا مش كلمة قالها ما اعرقهاش اللهم إلا النموذجين بتاع الكفاح اللى قال عليهم ... يعنى لما اتكلم عن الجوع المرضى اللى بيسد الفراغ العاطفى طيب ما أنا قريت عنه فى قصة لإحسان عبد القدوس مش فاكرة بالظبط انهى مجموعة قصصية بس متأكدة إنى قريت عنه .. حكاية توريث العادات فينا ياما د.أحمد خالد توفيق و د.نبيل فاروق اتكلموا فيها .. و باقى الكلام بيتاخد من كلمتين من التليفزيون و البرامج الدينية على كام فيلم أجنبى على مانشيتات الجرايد لإنى مش باحب اقراها و على كمان عمرو خالد .... طيب أنا استفادتى إيه بقى ؟؟؟!! ده حتى حكاية حب نفسك و ما ترميش اللوم عليها واحد لسة قايلها لى من كام يوم و قالى اعتذرى لنفسك بجد و خليها تحاول تسامحك على اللى انتى عملتيه فيها و حاولى تصلحى من نفسك واحدة واحدة هياخد وقت و هياخد جهد و تعب نفسى كبير لإنك ممكن تبعدى عن ناس بس لو الناس دى ما قدرتش تفهم انتى بعدتى عنهم ليه يبقى ما كانوش يستاهلوا .. قالى خليكى قريبة من ربنا و امشى على الصح اللى ربنا قاله ... قالى خليكى نفسك و علشان تتغيرى للأحسن لازم يكون فى حد صاحبك جنبك بجد تلجئى له علشان لو انتى لوحدك ممكن تضعفى ... طيب مادمت أنا لاقية الحمد لله الكلام ده إيه اللى يجبرنى إنى أروح التنمية البشرية ؟؟

للمرة المليون بأقول أنا مش ضد محاضرات التنمية البشرية ... بس أنا بجد مش عارفة إيه لزمتها .. هو احنا ما نقدرش نتغير بنفسنا لازم حد من برة هو اللى يغيرنا ؟؟ ... يعنى كنت باتريق على برنامج super nany و بأقول يعنى خلاص هم مش قادرين ينظموا حياتهم و علاقتهم مع بعض و علاقتهم مع ولادهم بطريقة صح و محتاجين حد ؟ ... مش عارفة .. نفس الحكاية باشوفها فى مستشارين الزواج ... يعنى دول اللى بجد هينظموا حياة المتجوزين .. فى كده مستشار جواز بييجى على Otv و باحب أتفرج عليه أوى ... ده إيه التناقض ده ؟ يا جماعة أنا لسة ما اتجوزتش و عايزة أعرف الغلطات اللى المتجوزين بيقعوا فيها علشان أحاول على قد ما أقدر إنى ما أقعش فيها .. طيب ليه الناس اللى اتجوزت ما سمعتش الكلام ده قبل ما تتجوز ؟

طيب أنا فكرت فى حاجة ممكن تبان لكوا تناقض بس استحملونى ... أنا مليانة إلى حد ممكن أقول إلى حد ما .. الفكرة إنى حاولت إنى أخس لوحدى و ما قدرتش و قاومت كتير إنى أروح لإخصائى تغذية بس فى الآخر رضخت و رحت لإنه كان مطلب قومى ... طيب نقدر نقول إن ده زى ده ؟؟!! ... بس أنا عارفة أنا ليه لجأتله ... لإنى كسولة .. لإنى باحب حد يكون مسئول عن شئ ما علشان كده أخدت دروس فى ثانوية عامة لإننا اتربينا على إن حد يقولنا ذاكروا أو ناموا أو كلوا ماكناش احنا اللى بنخطط لحياتنا فكبرنا و احنا فينا العقدة دى

أنا زهقت منى ممكن بعد ما آجى من السفر أكون لقيت حل للساقية دى أو إنى أكون اتحيرت أكتر .. أنا مسافرة إسكندرية إن شاء الله أسبوع تقريبا و مضطرة بس يلا بقى مامتى عايزة تشوف أهلها و اهه بالمرة أسلم على البحر و آخد لى كام صورة حلوة هناك .. ماحدش عايز شوية رمل :)

و آسفة على التطويل الفظيع ده