حسة إنى داخلة مكان جديد ومكسوفة كده ومش عارفة الناس .. رغم إن المكان كان فى يوم من الأيام مكانى .. بس باسأل حد هيكون عارفنى حد هيكون فاكرنى حد هيكون لسة عايز يزورنى بعد ما قطعت عن الناس كلها لظروف اضطرارية .. كلها تساؤلات .. بس مش هتمنعنى من إنى أكتب البوست ده ... وإن شاء الله أرجع تانى للمدونة .. يمكن ما يكونش باستمرار زى زمان خالص .. بس على الأقل أحاول ما اقطعش تماما زى ما عملت كده
مش عارفة ابدأ منين ولا أقول إيه .. يمكن أقول وحشتونى فى الأول .. وحشتونى وبجد .. وحشنى جو البلوجات .. صحيح أنا ما اتقطعتش عن المنتديات ولا الفيس بوك .. بس كل حاجة لها جوها .. المنتديات والفيس بوك والمدونات والمسنجر .. كل حاجة لها جوها ولها ناسها ولها وحشتها ومعزتها الخاصة
أما ليه بعدت .. فلإنى كنت مشغولة جدا فى المشروع وخلافه .. وأنا عارفة إن المدونة محتاجة متابعة .. وده للأسف شئ أنا ماكنتش هاقدر أوفره .. وماكنتش هاحب إنى اكتب مدونة واحدة كل 3 شهور مثلا .. أكيد كنت هابقى متضايقة .. ففضلت البعد تماما لحد ما افضى .. والحمد لله فضيت ... دكتور عندنا النهاردة كلمنى وقالى على درجة المشروع "اللى بسببها عيطت لإنها درجة سيئة جدا ما تساويش كل الجهد والتعب والتفكير والفلوس اللى حصلوا علشانه" .. وقالى على درجة السنة دى وقالى على التقدير العام ... فكده يا جماعة أنا ولله الحمد متخرجة لسة مش رسميا ولكن الحمد لله اتخرجت
القضية بقى ... إنى مش حسة إنى كبيرة بقى و 22 سنة ومتخرجة والكلام الكبير ده .. لأ حسة إنى لسة مجرد فى إجازة الصيف وكلها شهرين وهارجع الدراسة .. وكل حاجة هتمشى توماتيكى زى ماكنت بتحصل .. لكن لما بافكر إنى المفروض أفكر فى مستقبلى .. فى الشغل والكورسات .. ومامتى ومشمشة يقولوا لى الـ"c.v " بتاعك .. تقريبا جالى رعب ومش عايزة افكر فى الكلام ده .. عايزة اقولهم انتوا بتقولوا الكلام ده لمين ده مش لىَ .. أكيد مش أنا الطفلة هاشيل مسئولية .. حسة إنى هالوص .. ده غير إنى حسة إنى نفسيا وجسمانيا مش أنا .. حسة إنى حد غيرى .. حسة فترة نقاهة طويلة أوى .. أكتر من أى حد .. وحسة إنى عايزة أحس إنى متخرجة .. حسة إنى عندى شيزوفرنيا ..
يحدث لغيرى فقط .. هو ده اللى أنا حساه .. آه الناس بتتخرج وتشتغل وتتجوز وتكبر .. لغيرى فقط .. ده مش لىَ أنا يا جماعة .. ده للناس الكبار ... لغيرى فقط
عامة أنا هاروح اهه أقلد C.V بتاعت ناس .. وابعتها لشيماء يمكن أحس إنى متخرجة والكلام الكبير ده .. وعندى أمل إنى على بعد رمضان كده .. أكون شفيت .. أكون رجعتلى .. أكون عرفت طريقى رايح فين وجاى منين .. يمكن
ومن هنا لساعتها أكيد إن شاء الله مش هاقطع .. ده انا ماصدقت أرجع لمكان فضفضتى .. حاولت أفضفض فى حتة تانية بس ما قدرتش .. هنا هو المكان اللى بيشهد جنونى
