مش عارفة فى إيه ؟ امبارح نفسى اتكسرت زيادة عن ما هى مكسورة خلتنى ماليش نفس لحاجة و مش عايزة أتحدى حاجة ..... خلتنى أعرف إنى كنت كالعادة فى قمة السذاجة لما صدقت كلام الناس اللى حواليا و اللى كانوا مسميين نفسهم صحابى ... كنت فاكرة انى خسرت الناس دى من مدة ... أتارينى من الأساس ما كسبتهمش كأصدقاء علشان أخسرهم ... لما تتفق انت و صاحبك على انكوا تبقوا صحاب طول العمر و يبقى فى بينكوا ميثاق على الصدق .. و تكتشف بعدين بالصدفة البحتة انهم كانوا مخبيين عليك أهم حاجات فى حياتهم و قايلينها لناس تانية ... يمكن يكون العيب فى لان الحكاية حصلت أكتر من مرة .. و أنا زى العبيطة كل مرة أقول بس دول غير دول ... دايما باكدب أحاسيسى و مشاعرى لانهم مرة نفوا الاحاسيس دى عنهم ... و دائما أبدا بيطلع شعورى ده صح ... و دائما و أبدا باتصدم رغم توقعاتى .. طيب ليه دايما أنا بادى و بافتكر نفسى باخد بينما أنا مش بآخد غير قفا كبير ... غباء ؟!!!! احتمال كبير و أنا عمرى ما باتعلم من أخطائى .. بس المرة دى قررت انها تبقى غير كل مرة ... قررت اعمل بلوك لناس فى حياتى من حياتى ، ناس وجعتنى بجد و مش هاقدر انساهالهم ، و ناس الحق اشيلها من حياتى لان وجعها لى قريب ، و ناس مجرد انها اتاخدت فى الرجلين ... بس مش قادرة خلاص و اللى يحاول يفهم موقفى يبقى كتر خيره و اللى مش هيقدر يفهمه يبقى هو أساسا مش قادر و لا عايز يفهمنى ... و لانها خلاص ما بقتش تفرق معايا لانى فى كل الأحوال باطلع عبيطة و بيضحك على ... بس أنا بجد مخنوقة ... و عارفة انى هارجع و اسلم صداقتى لناس ما تستاهلش و اتوقع انها تصدمنى و اكدب احساسى و ارجع اتصدم ... نفسى اخرج من الساقية دى
11 comments:
آيات
ايتها الرقيقة
هو الحل الأزلى اللى سار عليه الألاف قبلك وقبلى
انك تبطلى تتصدمى
يعنى تاخدى الأمور بشكل بسيط وسخيف .. وايه يعنى ؟
تقولى كدا
لأن الصدمات نفسها مش هتخلص .. هى كدا
يبقى نشوف بقى هنتعامل معاها ازاى
ربنا خلق البشر ورزقهم أد ايه عبدوه وأد ايه كفروا بيه؟؟! لأن طبيعة نكران الجميل موجودة فى البشر حتى مع ربنا فما بالك مع البشر الى زيهم
آيات ياحبيبتى الى سقى كلب دخل الجنة عارفة ليه؟ عشان مكانش مستنى منه رد جميل أو معاملة بالمثل
حاجة تانيه مفروض تخليكى سعيدة وهى انك انتى المُساء إليها مش المُسيئه المظلومه مش الظالمه اوعى تتغيرى انتى إلى صح:)
ايات ( بصراحه ما اعرفش هو صح ولا لا بس فوق قالت كدا) اسفه على السخافه دى
بجد انتى فكرتينى بنفسى من كام يوم ومن قبلها فضلت حوالى 3 شهور او اكتر مش طايقه الحياه باللى فيها وكان اى حد يقولى بم اقولوا على قلبك يذم ووصلت بيا انى خسرت انتيمى الاتنيين وخاصمتهم حوالى اسبوعيين لحد مافوقت وصالحتهم..
صدقينى هى فتره وبتعدى .. حالة صدمه عابره لانك مش بتحطى فى الناس الوحش زى ماحطيطيلهم الحلو
لانك افتكرتى ان زى ما انتى بطبيعتك هما بطبيعتهم .. الصدمه بينت كل حاجه كبيره وحتفضل مبيانا كدا طول ما انتى بتسمعى عم اتخنقت ده وماشابه ذلك
اكيد فيه واحده من صحابك بتخاف عليكى اوى وبتحبك اوى وفهماكى اوى اوى وصعب تجرحك .. الصحاب مش بعددهم
أخدى الصدمه قومى ونفضى هدومك وماتبصيش وراكى كتير وبصى قدامك لان حالتك النفسيه دى مش ممكن تضر حد غيرك انتى
انتى اللى حتتعبى تعب نفسى وعضوى كمان .. حتكتأبى لفتره حتشكى فى كل الناس وهما حيعيشوا حياتهم عادى .. ويمكن اللى خبوه عنك ده مايهمكيش ويمكن ليهم أسبابهم فى إنهم يخبوا .. مش لازم يبقى كلوا مفتوح كدا
خلى عقلك أكبر من اى أزمه واعرفى ان دى كلها أتفه الأزمات وإن اللى جى اكبر ولو كل أزمه عملت فيكى كدا يبقى حتلاقى نفسك اتغيرتى تماما والاكتئاب بقى طبيعتك ومش حتعرفى تضحكى من قلبك
غيرى جو وأخرجى وانسى ودورى على صحاب تانيين وانتى واخده حذرك ومحافظه على واحده او اكتى من الناس اللى فعلا بيحبوكى من قلبهم ووقفوا جنبك بقلبهم فى أزمتك
:) معلش طولت عليكى
بس فعلا كلامى ده عن تجربه او قولى تجااارب مع اصحابى ..ووقعت كتير ولازلت بقع بس لازم اقف وما اضحكش الناس عليا وأفرحهم فيا
ربنا يوفقك إن شاء الله
ولاء ... فينك من زمان وحشانى ... يظهر ان هو ده الحل الوحيد بس مش هييجى غير واحدة واحدة و إن شاء الله أقدر عليه ... خلينى أشوفك
_______________________________
مشمشة ... و انا هافضل صح و اتصدم ؟! انا إن شاء الله فعلا هااحول ما اتصدمش للسبب اللى انتى قلتى .. علشان ما اتحولش فى يوم للناس اللى انا باشتكى منهم
_____________________________
شيماء .. أيون آيات و مفيش سخافة و لا حاجة :)
عارفة انها فترة و هتعدى بس هتسيب فى حاجت سواء حاجات اتعلمتها أو ندب فى النفس ... بس المشكلة انى مش باقدر احط فى الناس اللى المفروض اسمهم أصحابى وحش .. أمال انا اخترتهم ليه ؟ .... على حكاية انه مش لازم يبقى كل مفتوح كده مفهومى عن الانتيم انهم ما يخبوش حاجة عن بعض و انه لما تحصلى حاجة ما استريحش غير لما احكيهالها .. لو ده ما حسيتوش معاها يبقى فرقت إيه عن أى صاحبة تانية ؟ الحمد لله لسة حواليا أصحاب كتير .. و ما تخافيش مش هاكتئب أوى كده :)
أبدا على العكس انا سعيدة بكلامك ده و سعيدة انك عديتى من هنا ... و يارب يوفقنا كلنا إن شاء الله
ازيك يا ايات..واحشاني جدا جدا يا بنتي
بصي وجهة نظي دي ممكن تكون غلط ، بس أنا معرفش غيرها
مينفعش كل الناس يبقوا صحابك أو يبقوا قريبين .. مش لازم تقربي من الناس بسرعة عدد معين هو اللي ممكن يكون قريب منك ومتقربيش الا لما تكوني واثقة بنسبة كبيرة ان الناس دي هما اللي ينفع يبقوات معاكي على طول.
لكن لو حصل ان حكمك ده على الناس طلع غلط يبقى فكك خالص ن هما ميستهلوش أصلا انك تزعلى عليهم.عارفة انك هتقوليلي انا زعلانة اني اختياري هو اللي كانغلط أو زعلانة اني اضحك عليا هقولك ان كان لازم يحصل كده علشان تتعلمي وده ميحصلكيش تاني
جيد الاسبوع
هي دي الدنيا:(
كأنك اتكلمتى عنى لانى نفس مشكلتك دى.. بثق فى الناس بشكل غير عادى وباخد على قفايا فى الاخر.. واضح كدا ان الواحد مابيحرمش.
دول كلمتين انا اخدتهم من منتدى بس اثروا فيا اوى وارجو بعجبوكى:
بيقولو:"لاتتخيل كل الناس ملائكة..فتنهار أحلامك..ولاتجعل ثقتك بالناس عمياء..لأنك ستبكى ذات يوم على سذاجتك" دا لو مكنتش بكيت بالفعل.
تحيــــــــاتى
يعني حتلغي تعاملك مع الناس
صعب بس متديش صداقتك غير للي يستحقها
وعلي العموم دي مش حاجة جديدة انا مقتنعة ومتسألنيش ليه ان صداقات الكلية دي مش صداقة
تعرفي انا عندي اصحاب ولله الحمد بعدد شعر راسي
نسبة اللي يعرف كل حاجة عني مش نسبة دي هي واحدة بس وهي صاحبتي من اعدادي وثانوي واديني اهو في رابع سنة في الكلية
ويمكن مش باقابلها غير كل فييييييييين وفين عشان ظروف كليتي بس
هي دي النظرية فخمتو حاجة
المهم انك وحشاني ازيك يابت
سلومتى .. ازيك ؟ أنا معاكى جدا ان ما ينفعش يبقى كل الناس صحابى بنفس الدرجة و رغم ان ده بيزعل الناس منى بس لانها وجهة نظر صح .. و المفروض انى باتقى منهم بس اللى حصل زى ما نتى قلتى ان اختيارى طلع غلط و الله أعلم ليه يمكن لقلة خبرة الله علم .. عامة الواحد اهه الحمد لله عدى المرحلة دى .. بتبقى فترة صعبة بس على رأى الجيل الصاعد ( كله بيطلع فى الغسيل )
******************************
دافيد سانتوس ... شاكرة مرورك
*******************************
لاميا ... معاكى حق و الواحد خلاص المفروض يتعود
*******************************
صرصارة .. يظهر انها مشكلة لازم كل واحد يعدى بيها علشان يبقى أخد خبرة .. المشكلة انى ما باتوقعش الناس ملايكة .. بس فى نفس الوقت ما اتوقعش منهم عمل ضد الصداقة .. مرورك اسعدنى
*******************************
سوكا .. أكيد مش هالغى تعاملى مع الناس و آدى الواحد بيغل و بيحاول انه يتعلم من غلطه .. مش عارفة ليه مش عايزة اقتنع ان صداقة الكلية صداقة وقتية و تنتهى بعد شوية بانتهاء الكلية .. كتير قالوا لى كده .. أكيد مش كلهم هيفضلوا أصحابك و هيفضل منهم حد او اتنين بس اللى أصحابك .. بس زيها زى أصحاب المدرسة .. بنطلع بكام حد بس .. و انتى كمان و الله واحشانى جدا الله يحرق المشاريع كلها فى يوم واحد .. آآآآآآآآمين
بصى
مادام عايزة تخرجى م الساقيه
اخرجى
عافرى و اتعبى
بس مادام عايزة خليكى واثقه انك هتخرجى
و كل ضربة فى ضهرك من حد
صدقى او ما تصدقيش
بس هى دفعه للأمام
Post a Comment