أخويا قالى لو رحتى المعرض هتلاقى كتاب اسمه تاكسى ، هاتيه علشان واحد صاحبى عايزه و انه راح قبل كده بس لقى النسخ خلصت و انه المفروض يجيبوا تانى .. طبعا أنا عمرى ما سمعت عنه بس قلت ماشى ... دخلت دار الشروق لقيت كمية نسخ غير طبيعية من الكتاب ده و استغربت أكتر و أكتر لإنه كان آخر يوم فى المعرض .. و تقريبا ماحدش بيخرج من الدار إلا و معاه نسخة من الكتاب ... طبعا لما روحت قريت الكتاب .
الكتاب عبارة عن 58 قصة قصيرة و لكل قصة قصة بطل مختلف هو سائق تاكسى آخر .... عبارة عن جزء من الحوار المتبادل بين سائق التاكسى و المؤلف باعتبار أن سائقى التاكسيات فى مصر " ينتمون فى معظمهم لشريحة اجتماعية مطحونة اقصاديا . كثيرا ما أرى فى التحليل السياسى لبع السائقين عمقا أكثر مما أجده لدى العيد من محللن سياسيين يملئون الدنيا صخبا " كما يقول المؤلف ...
تحس الصدق فى كل كلمة تقال بطبيعة انى من الناس اللى بتركب تاكىبشكل شبه يومى ... و فى الأوقات اللى مش بنخانق فيها مع السواق .. بيطلع الكلام منه اكنه حكم .. حتى لو كان أى كلام فى الهوا .
أحيى المؤلف اللى جاتله فكرة كتاب زى ده
10 comments:
مع ان عنوانه ملفت اوي
بس انا رحت المعرض مرتين.. و دخلت دار الشروق
بس مخدتش بالي منه
بس فكرته شيقه فعلا
هحاول اوصله ان شاء الله
انا فعلا سمعت عن الكتاب ده كتير و بالفعل اشتريته من المعرض...و كنت بصراحة متوقعة ان ثمنه هيكون غالي و قلت هغامر ... و زي بعضه... بس لقيت ثمنه معقول فعلا...و قرأته في يوم واحد من شدة اعجابي بيه... هو فعلا تعبير صادق عن الشارع المصري.... بسيط اوي ..و سهل اوي... ممتع اوي.. و مضحك اوي.. و موجع اوي..
بصراحة الكاتب يستحق التهنئة على الكتاب .. و انتي كمان تستحقي التهنئة على اشارتك للكتاب
اولا ازيك
من زمان مجيتش البلوج هنا
و انتي برده بقالك مدة مشغولة او انا اتهيألي كدا :)
بس تصدقي كان عندي نفس فكرة المؤلف
يبدو انه توارد خواطر
او ركوب تاكسيات كتير :D
عموما برده هجيب الكتاب
سلامي
أنا بالفعل جبته ..و ماكنتش سمعت عنه قبل كده..لكن لإنى بركب تاكسيات كتير أوى ..فحسيت بألفة بينى و بين الكتاب ..و بالفعل لما جبته طلع جامد جدا..عارفه أحلى حاجة فيه بساطته ..مفيش فيه أى نوع من الإبداع من الكاتب..إلا قليل القليل..كل أبطاله هما سواقين التاكسى ..هما المبدعين..هما كل حاجة..
و لكن يبقى إبداع الكاتب فى تلك الفكرة
.
لما قريت الكتاب ده اتنمنيت انى كنت أبقى ولد ..بس علشان أقعد أتكلم مع سواقين التاكسيات و أسمع الآراء دى ..بجد الناس دى بتوسع الأفق مابتضيقهاش ..
.
عامة أى حد عايز يستلفه يقولى ..تحت أمركم ..و شكرا يا آيات علشان اشرتى للكتاب..أنا كمان هابقى أعمل موضوع عنه فى سبيسى
.
ريناد ..مها ..شقلوطة..
اللى تحبيه
يوتوبيان .. مش عارفة ازاى ما اخدتش بالك منه ده كان مغرق الدار .. .يمكن ان رحت فى الأيام اللى كانت النسخة فيها مش موجودة ، يارب تلاقيه
_________________________________
اخوانية .. أنا برضه توقعت ان تمنه هيكون غالى و خصوصا ان دار الشروق ما بتصدق ، بس فعلا تمنه حلو و كلامك عن الكتاب مظبوط جدا و ... اخجلتينى :)
_____________________________
نمنامية .. انا تمام الحمد لله انتى اللى ازيك بقالى كتير جدا جدا جدا حمش شفتكيش وحشتينى بجد .. أنا فعلا مش بادخل كتير على البلوج و لا حى على الماسنجر شوية مشغولة و شوية بتكون نفسى مقفولة مش عارفة ليه .. ربنا يهدينى .. و انا كمان فى مرة من المرات كنت راكبة تاكسى و قعدت تقريبا ساعتين فى التاكسى من الزمالك للتحرير لإن الدنيا كانت واقفة جدا .. و نمت و صحيت و لقيت السواق عمال يتكلم عن حال البلد و يقول فى نكت ضحكتنا على الحكومة و على حالنا .. ساعتها جاتلى الفكرة دى .. يظهر ان اللى ليهم وقت بيركبوا تاكسيات بتجيلهم نفس الأفكار :) ... مبسوطة انك عديتى من هنا
رينو حبيبتى ... انا كمان جت لحظة اتمنيت فيها انى أبقى ولد علشان لما القعاد جنب السواق ده بيخلى أولا فيه ألفة بينك و بينه .. يعنى الكام مرة اللى السواق اتكلم فيهم معايا كنت قاعده جنبه لان ورا صحابى كانوا قاعدين .. فغالبا الحوار بيحصل مع اللى قاعد جنبه ... تانى حاجة ان أغلب السواقين هيبصولك و انتى تطلعى مين بسلامتك او ( رأى حريم ) و غالبا مش بيكون نفسه مفتوحة أوى انه يتكلم معاكى ... بينما مع الولد بينطلق .. و ياه بقى على التقليد ... حتى فى دى :)
مع ان عنوانه ملفت اوي
بس انا رحت المعرض مرتين.. و دخلت دار الشروق
بس مخدتش بالي منه
بس فكرته شيقه فعلا
كالعاده بكرر كلام عمرو
ابقى اقريه طيب و احكيهولنا
اكيد من جوه هتلاقى درر
وحشنى بلوجك
على كدة انا عندي كان ممكن أعمل 3 كتب أو حاجة, لإني ياما شفت و سمعت من سواقين التكاسي...
اتفرجت علي لقاء عالعاشرة مساءً مع الراجل ده في تعليق علي الكتاب
من كلام الراجل الصراحة كان نفسي اشتريه
ونظرا اني ملحقتش ارجع قبل المعرض تتعوض ممكن اشوفه عندنا في اسكندرية او نستلفه من البت مها
انا كمان عجبتني اوي فكرة المؤلف
يمكن لاني انا كمان لما بركب تاكسي
والا قي السواق بيتكلم بيبقي نفسي اكتبه عشان منسهوش والله ساعات بيقولوا حكم بس انا لو عجبني الكلام بأرد عليه لابهمني ولد ولا بنت بلا نييلة
ياسو .. بيتهيئلى دلوقتى انك اخدتيه من مها و مستنية رأيك .. و ربنا يخليكى :)
_______________________________
أمير ... ماهى دى الفكرة ..انها بسيطة جدا و الكل هيحسها لان اى واحد فينا بيقول انه ممكن يعملها
_______________________________
سوسكا حبيبتى .. أنا ما شفتش اللقاء على العاشرة مساءا و يظهر ان الكتاب بتاع مها هيلف علينا واحد واحد ده مصيره ، مش الفكرة إنى مش بارد على السواق لانى بنت .. الفكرة انه هو أصلا مش بيبدأ كلام فى أغلب الوقت لإنى بنت ، مش فاهمة فرقت إيه ولد عن بنت ... نورتى
Post a Comment