Thursday, December 02, 2010

تايتانيك





باحب الفيلم ده رغم إنى ما باحبوش .. بمعنى . باحب فيه الجزء الأولانى .. لما كان جاك داوسن لسة ماتعرفش على روز .. الحياة بتاعته العادية البسيطة والتلقائية .. ولحد ما التقى روز ومنعها من الانتحار .. وعلمها ازاى تبصق كالرجال .. ويحضر معاها حفلة العشا وما يتهزش ... وتحضر هى معاه حفلة الدرجة التالتة ويرقصوا من أحلى مشاهد الفيلم .. لحد هنا تقريبا بتنتهى متعة فرجتى على الفيلم

الفيلم مش باحبه لأسباب خاصة .. منها مثلا إنه فى الفترة الزمنية دى ليوناردو كان بيخلينى اشمئز منه ولدرجة كبيرة جدا .. وعمرى فى يوم من الأيام تخيلت إنه هينضج للدرجة دى .. وإن الولد الحليوة هيبقى فى يوم من الأيام بيمثل بجد ومش اعتمادا إطلاقا على شكله
الفيلم برضه فيه كيت وينسليت .. من أبرد 10 شخصيات بتمثل ... بس ساعات بتتحب
وأخيرا ... بيلى زان .. أكتر واحد مخلينى ماحبش الفيلم بتمثيله الأوفر جدا .. كان بيمثل تبعا لإرشادات المسرح للشرير النموذجى

بس يفضل .. أحلى حاجات باحبها فى الفيلم .. موسيقته التصويرية وكاثى بيتس بطلعتها البهية وتمثيلها المبهج جدا

والأفضل والأحسن دايما فى الفيلم ده ... هو الذكريات الكتير اللى الواحد عاشها معاه وهو صغير .. لو أقدر أقول إن تيتانيك كان بطل فى ذاكرة الجيل ده .. حتى لو اختلفنا مع الفيلم

Wednesday, December 01, 2010

سنة مع الشغل والنفاذ






النهاردة .. 1/12/2010 .. يكون عدّى علىّ سنة بالتمام والكمال فى الشغل .. مش قادرة اصدق كده أصلا .. سنة كاملة عدت حسيت بيها وما حسيتش .. حسيت بيها فى كل يوم باصرف فيها من فلوس مرتبى مش من مصروفى والحمد لله .. حسيت بيها لما باحاول اعمل فيها كبيرة وإنى إلى حد ما مسئولة عن اخواتى الصغيرين.. وحسيتها برضه فى كل يوم عيطته وانا عايزة أسيب الشغل ومش طايقاه .. حسيتها فى كل يوم باصحى من النوم بالعافية علشان مش عايز أروح الشغل .. حسيتها وانا باقول امتى يوم الخميس ييجى من قبل ما يوم الحد أصلا يبدأ .. حسيتها والناس اللى معايا فى الشغل برخامتهم الفوق الوصف ... حسيتها فى ناس أقل كلمة توصفهم إنهم فضوليين بغباء هدفهم فى الحياة بس إنهم يعرفوا انت بتعمل إيه حتى لو فعليا هم مش بيحبوك ... حسيتها فى ناس سخيفة ونفاقهم وابتساماتهم الصفرا

أنا علشان استحمل مكان مش باحبه .. لقيت الحل هو اللى عملته علشان أخلص من سنين الكلية .. إنى أدّى لنفس فترة زمنية أصبّر بيها نفسى .. يعنى فى الكلية كنت باقول كلها 5 سنين واخلص من الهم .. بس هنا هادّى لنفسى كام سنة؟؟ وبناءا على إيه؟ وياترى هاستحمل أصلا ؟؟؟

عن نفسى السنة دى غيرت فىّ وفى أخلاقى جدا .. بدأت من شعورى فى أوقات كتيرة جدا بالوحدة المريعة بسبب جواز صحابى الأسطورى .. حسيتها وانا مش طايقة اللى باعمله ولا طايقة اللى حواليا مهما كان .. حسيتها وانا نفسى مسدودة عن كل حاجة باحبها وباحب أعملها .. حسيتها وانا حسة بنفسى باتغير للأسوأ وأخلاقى بتتغير بالتدريج بسبب المحيط اللى قاعدة فيه .. حسيتها وانا بدأت اتعامل (بالذكاء الإجتماعى) إياه .. حسيتها وانا كل ما اقعد قعدة صفا مع النفس أحس بالقرف وادعى ربنا يخلصنى .. حسيتها وانا باقرر إنى هاسيب الشغل فى أقرب فرصة

وبرضه حسيتها .. فى هدف بدأت ملامحه تبان ويخلينى أتنازل مؤقتا عن قرار إنى أسيب الشغل وباخطو أول خطواتى فى الاتجاه ده .. حسيتها وانا باتعرف على ناس جديدة فى الشغل .. ناس مجنونة وناس نمطية وناس لذيذة وناس محترمة وعاقلة ..ناس أناكف فيهم ويناكفوا فىّ ونمارس على بعض جميع أنواع الرزالة ... بس فى المجمل الناس دى باحبها جدا .. ومبسوطة بوجودها فى حياتى مؤخرا .. لإنه من الآخر .. لو الناس دى مش موجودة فى حياتى .. ماكنتش استحملت أيامى فى الشغل

Friday, November 26, 2010

Spontaneous







الكلمة فضلت معلقة فى دماغى فترة مش قادرة أعرف ليه .. حتى معناها كان مشوش إلى حد ما .. بس عمّالة أرددها بقالى كام يوم .. النهاردة مش عارفة إيه اللى خلاّنى أقلب فى البوستات القديمة اللى فى البلوج ده .. لقيتنى كنت رغاية بشكل لا يصدقه عقل بارغى فى كل حاجة وأى حاجة واللى ييجى على دماغى باكتبه .. 30 ألف موضوع فى البوست الواحد .. حتى الكومنتات اللى على البوست لقيتها بتعلق على نفس الموضوع ... ولقيتنى باقول هو ده ... spontaneous ... تلقائية .. عفوية .. أنا كنت كده جدا جدا .. بينما البوستات الأخيرة حسيتها مرتبة وعارفة هى عايزة إيه من دنيتها ... لقيتنى بابص فى مراية الحوض جامد أوى ... والسؤال طلع منى (تلقائى) ... هو أنا كبرت بجد وعقلت ولا إيييييييييييييييييه ؟؟

Wednesday, November 24, 2010

ثقب أسود





من كام يوم كان عندنا حالة وفاة فى العيلة .. دى تقريبا أول حالة وفاة عائلية أحضرها من بعد وفاة نانى اللى كنت فيها تقريبا فى 3 ابتدائى .. اللى بعد كده كله ما حضرتوش لظروف البعد المعيشى اللى احنا فيه عن بقية أهلنا .. أنا لبست أسود قبل كده فى حالات وفاة تتعلق بزملائى فى الكلية .. عادى حصلت قبل كده يعنى .. وشفت قبل كده مامتى لابسة أسود لما حد فى الشغل عندها أو فى العيلة بيتوفى .. برضه بتحصل عادى جدا .. لكن لأول مرة أنا ومامتى نلبس أسود مع بعض .. واخواتى الصغيرين كمان يلبسوا أسود .. وانا بابص فى المراية شفتنى لوحدى لابساه .. عادى .. بس لما خرجنا كلنا مرة واحدة .. حصلى انقباض فى النفس رهيب .. ما بقيتش قادرة آخد نفسى .. بقيت عايزة أعيط واجرى اقطع كل الأسود اللى حواليا .. دخلنا الجامع نصلى على المتوفى .. كله أسود أسود أسود .. بقيت عايزة أقول كفاية بقى .. ساعتها افتكرت رحاب بسام لما فى مرة كتبت إنها لما بتروح عزا لازم تلبس حاجة حمرا تحت هدومها تدفيها .. اتريقت عليها لما قريت الكلام ده .. بس لحظتها حسيت بيها أوى .. يومها بالليل نزلت أعزى من البيت لابسة سكارف فيهارمادى وبمبى وبرتقانى .. وقلت كل ما هاحس نفسى بتنسحب .. هابص للحتة البمبى اللى فى هدومى

Tuesday, November 02, 2010

إيه فى أمل




لأول مرة وباقولها معترفة بصوت عالى إنى أركز كده مع فيروز .. أنا مش مستمعة جيدة ليها أبدا .. باحبها وباحب أغانيها لكن عمرى ما تتبعت خطاها يعنى ولا كنت من الفانز المجانين بيها .. شئ إلهى خلانى أتابع الخطى الأخيرة والنهائية فى ألبومها الأخير .. وأسمعه بشغف .. وأحبه .. وأتعجب من قوة الست دى فى سنها ده اللى تعمل حاجة كده بصوتها الرائع ده .. انبهرت بيها .. بقوتها .. بشجاعتها .. وبقيت الموزع الأول لألبوم فيروز فى المحيط اللى عايشة/باشتغل فيه

بعد كل المقدمة الطويلة دى .. ماقولتش أهم حاجة .. إن شريط فيروز هو أحسن حاجة حصلتلى فى الفترة اللى فاتت .. لإنه بسببه جتلى الفرصة إنى اتعرف على شخص أكثر من رائع .. وفتح قدامى الفرصة إنه اخيرا يبقى فيه بينا حوار .. أخيرا بقى فيه حجة إنى أسلم وأضحك وأهزر وأتكلم .. وأخيرا ادتنى أمل فى إنه ممكن بكرة ييجى .. مشرق

لهذا .. أنا أؤيد فيروز .. وبكل قوة ... قائلة

إيه فى أمل

Friday, October 08, 2010

نفكر شوية



يوم غريب عدّى علىّ امبارح .. لما قعدت فى آخر النهار أفتكر كل الأحداث اللى حصلتلى .. استغربت أوى وقلت يا سبحان الله والحمد لله .. بدايتها كانت أول ما رحت الشغل عامود كبير خشب ارتفاعه أكتر من مترين كان هينزل على أم دماغى .. بس الحمد لله اتزنق فى إطار كده خارج من الباب الكبير اللى كنت واقفة قدامه فحاشه من الوقوع .. أحلى حاجة إنى كنت عاملة زى توم وجيرىواقفة باتفرج عليه وهو بيقع علىّ .. شوية وواحدة قالت كنصيحة (بناتية) إنى أستمر فى لبس البلوزة اللى كنت لابسها لإنها بتحبها علىّ .. وأكيد هو كمان مهما كان مين هو بقى هيحبها علىّ .. ده مش بعيد البلوزة دى هى اللى تجيب هو :))

فى نص النهار كنت فى الخرابة اللى فى الحوش اللى فى الشغل .. الخرابة دى عبارة عن أثاث قديم كان فى الشغل خلاص مش بيستخدموه وفى نفس الوقت عهدة فمايقدروش يرموه .. فمكومينه فى الفناء الداخلى بتاع الشغل .. صاحبتكوا طبعا بسطلها المعتاد وطريقتها المعتادة فى الكلام بإيدها خبطت فى بوز كرسى جامد .. الخبطة جامدة وعلّمت ده مش مهم .. المهم إن الخبطة حركت برواز ضخم ألوميتال وكان برضه هيقع علىّ وشئ خلاه يقف مكانه ومايكملش وقوع علىّ .. طبعا دى العناية الإلهية .. بس ساعتها طبعا ما وقفتش ساكتة زى أول مرة ... حطيت إيدى على دماغى تحسبا يعنى :))

فى آخر نهار الشغل حاجة وقعت حاجة منى على الأرض .. وطيت أجيبها .. وانا باطلع طبعا لازم ساعتها يكون فى مسمار يشبك فى البلوزة ويقطعها .. ودلوقتى لا بقى فى هو ولا فى حتى بلوزة ممكن تجيب الهو :)

آخر النهار فعليا لما روّحت البيت .. بامشى عادى زى ما بامشى فى بيتنا .. مش عارفة ازاى المفتاح بتاع البوفيه قام معورنى فى رجلى

لما فكرت شوية .. افتكرت يوم مشابه عدّى علىّ من فترة .. يوم كان كله إصابات ووقوع وجزم وهدوم بتتقطع .. يومها اتنكدت أوى ووقفت فى الشارع صرخت (هو فى إيه بقى .. كفاية) .. مش فاكرة أحداث اليوم ده أوى .. مش فاكرة الإصابات كانت إيه .. مش فاكرة حتى إذا كنت محبطة من أول اليوم ولا هى جت كده .. وافتكرت إنى أكتر واحدة أعرفها بتتخبط وبتقع وحاجتها الجدية بالذات بتتقطع .. بس لما فكرت أكتر .. قلت أنا دماغى كانت هتتفتح مرتين النهاردة وربنا ستر .. مش يمكن الأيام الفايتة كان برضه بيحصل إنى باقع فى حاجات صغيرة بس ربنا بينجينى من حاجات كبيرة من غير ماخد بالى .. يبقى أخلى عندى دم شوية بقى وأحمد ربنا

وكدليل على إنى فعلا ماكنتش متضايقة يومها ... عملت apple pie .. هى مش أحلى واحدة ولا حتى شكلها تحفة .. بس أنا لو كنت استسلمت شوية .. ولا كنت عبرتها :))





Wednesday, September 01, 2010







"فااااااااااااااااااااار"

قلتها بكل ما أوتيت من قوة حتى أحسست أن روحى انخلعت مع نطقى لهذه الكلمة، فقام زوجى الهمام ليبحث عن الفأر حيث أشرت له بوجوده، لكنه لم يجده، لم يترك قطعة أثاث فى مكانها، ولا أثر لذلك اللعين، الشئ الذى جعل زوجى ينظر لى متسائلا:"متأكدة إنك شفتيه؟"


(( برغم صغر حجم الفأر وعدم بشاعة منظره وليس شرسا ولايوجد خطر حقيقى منه وخاصة فى منازل المدينة، فثقافة كراهية الفئران منتشرة وبشدة ولا تموت مع الزمن.))


"فااااااااااااااااااااار"

للمرة الثانية فى نفس الأسبوع أرى هذا القارض البغيض، وللمرة الثانية يشمّر زوجى الشجاع ويبحث عن الفأر ولكنه لا يجده، لايترك كرسيا إلا وقلبه، ولكن لا وجود لهذا الفأر، ينظر لى بريب قائلا:" انتى يا ستى متأكدة إنك شفتيه؟"


(( كما تشير إلى أن المرأة أكثر كرها للفئران عن الرجل، فقد أعلنت الدراسات أن الذعر الغير مبرر من الفئران عند المرأة أكثر من الرجل بنسبة عالية، الشئ الذى قد يؤدى ببعض النساء إلى الوقوع فى فخ هيستريا الفئران.))


"فااااااااااااااااااااار"

للمرة العاشرة أصرخ بهذه الكلمة المفزعة، وينهض زوجى المتشكك بتثاقل لأداء واجبه القومى فى البحث عن الفأر: يبحث بعينيه وقد يقلب هذا الكرسى أو ذاك، ثم يجلس قائلا بملل" هو يعنى ما بيطلعش غير ليكى؟"


(( وبالدراسة نجد أنه تم تطور المرأة عبر السنين السابقة من امرأة بدائية تسكن العشش إلى امرأة عصرية مثقفة متحضرة، فالفأر لم يحدث فى عالمه أى تطور يذكر. ))


"فااااااااااااااااااااار"

لا أتذكر عدد المرات التى صرخت فيها بهذه الكلمة، ولكن زوجى لا يتحرك من مكانه، لا ينبس بحرف، ولكن عينيه تقول الكثير.


(( وعلى الرغم من هذا الاختلاف الواضح فى مستوى تطور الكائنين إلا أن الفأر ظل كما هو، يجيد حرب الأعصاب و يحلو له إخافة المخلوقات الغريبة التي تمشي علي قدمين. ))


"فااااااااااااااااااااار"

أصبحت أصرخ بها فى سرى فلا أحد بما فيهم زوجى يصدقنى، يعتقدون أننى مجرد هيستسرية تخشى الفئران، فأصبحت معتادة على رؤية الفأر يوميا ليبستم فى وجهى متشفيا ويجرى ليختبئ.


Saturday, July 17, 2010

شخبطة بتاعتى فى البلوج بتاعى





بقالى فترة باتفرج على أفلام فيها قوة وتغيير .. وغالبا بدون قصد منى بتكون أفلام فيها قوة نسائية .. أفلام بتدعو للتغيير فى نفسنا مش شرط فى العالم .. ماهو أصلا التغيير فى العالم بيبدأ من التغيير فى نفسك

المشكلة دلوقتى إن الأفلام دى جاية فى وقت مش وقتها .. أو يمكن هو وقتها بس أنا مش ناقصة لعب فى دماغى .. أنا أصلا فى مرحلة باحاول أعرف هاعمل إيه فى النيلة حياتى ومستقبلى .. أفكار كتيرة فى دماغة .. شخصيتى عمالة تتغير والله وحده أعلم إذا كانت لأحسن ولاّ لأوحش .. حاجات كتيرة مش عاجبانى .. شكلى، مهنتى، هواياتى ... حتى صحابى .. طريقة تفكيرى .. كتابتى وقراءاتى .. تعاملاتى مع الناس

الغريبة المرة دى غير كل مرة إنى يا سبحان الله ماعنديش حالة الاكتئاب بتاعت كل مرة .. بالعكس يعنى أقدر أقول إن جوايا شوية تفاؤل ... يمكن شوية حلم وشوية حالة من التبصر أو محاولة رؤية المستقبل بتاعى ورسمه .. تخطيطه يمكن :)) ... جوايا حسة إنى ممكن أنجح بجد فى اللى أنا نفسى فيه ... يعنى ماهو أكيد كل اللى نجحوا دوووووول يعنى ماهماش أحسن كتير .. وفى منهم اللى فعلا مش أحسن منى .. اللى أحسن منى فعلا هو إنهم يكون جواهم إصرار ... الأهم من كده مش حتى إنهم يكونوا مخططين كل الخطوات اللى بعد كده إيه .. الأهم معرفة أول خطوة وازاى تتعمل والباقى بعدين هييجى ... دى مشكلتى الأزلية دايما .. أول خطوة ... بدأت أفكر إن كورسات التنمية البشرية مش بالوحاشة دى :)))

يا مسهل

حاجة كده نعنشة شوية :))




Saturday, July 03, 2010

My name is Khan



أخيرا وبعد صراع مرير مع النفس لإنى باعاقبها علشان مادخلتش الفيلم ده سينما أنا اللى مغرمة بشاروخان والناس العاديين كلهم دخلوه وأنا وقفت برة باتفرج عليهم ... شئ خلانى ساخطة على نفسى لحد ما رضيت عنها وقررت أسامحها وأفرّجها على الفيلم النهاردة على الكمبيوتر




هاحاول أكون منصفة ومحايدة على قد ما أقدر وأنسى شوية حبى لشاروخان ... الفيلم تحفة فنية .. بداية من طفولة خان ومامته وهى بتعلمه مبادئ الإنسانية .. من فقرهم وبساطتهم مش قادرين يفهموا إن خان عيان بمرض التوحد .. ولكنها بتحبه كده وبتعرف إنه مختلف بس ذكى وذكى جدا .. بتصر على تعليمه حتى لو فى المدرسة الأطفال الآخرين ما قبلهوش بتوديه لمدرس متقاعد فى البيت وبيبدأ فى تعليمه من البيت لما شاف عبقريته واقتنع بيها ... أهم درس فى الحياة مامته يتديهوله لما بتلاقيه بيردد كلام الناس إن مفيش فرق بين الناس باختلاف دياناتهم ولا لونهم ولا جنسيتهم .. لكن فى بنى آدم طيب وبنى آدم شرير ... أى شئ آخر لا يهم .. وتموت مامته ويضطر للسفر لأمريكا لأخوه اللى هاجر لهناك واتجوز .. وهناك فى بلد التقدم والعلم يعرفوا إن اختلافه بسبب مرض .. ويبدأ يحاول يخليه يشتغل وساعتها خان بيقع فى غرام مانديرا وببساطته وحبه وبراءته أخيرا بيقدر يقنعها إنها تتجوزه وابنها اللى كان عنده ساعتها 6 سنين بيحبه جدا .. لكن أخوه لإنه مافيهوش نقاء خان بيقوله إن مانديرا من الهندوس مش مسلمة ولو اتجوزها يبقى مالوش مكان تانى فى البيت ده .. وبيتجوزها خان لإنها إنسانة طيبة ويعيش معاها الفترة ما قبل 11/9 ... وقبل التركيز على المسلمين بالمنظر الشنيع ده ... ساعتها حياتهم كلها هتتغير تماما ... للأسوأ ... ويلاقى نفسه محطوط قدام حل واحد ... لازم يروح لرئيس الولايات المتحدة علشان يوصله رسالة
"My name is Khan .. and I'm not a terrorist"

رحلته علشان يوصل الرسالة البسيطة دى والمهمة جدا وبتحمل جواها 100 رسالة تانية هى النص التانى من الفيلم ... رحلة مش بسيطة أبدا ورحلة بتمثل الحياة نفسها

الفكرة فى اختيار دور البطل مريض بالتوحد بيتهيئلى هى جاية من إنهم عايزين مثا ل مش ملوّث بالأخلاق العادية بتاعت البنى آدمين .. عايزين يجيبوا مثال على واحد مسلم نضيف لسة بيعتبر البنى آدمين زى بعضهم بس حسابهم على ربنا مش عليه هو .. لسة بيعتبر إنه مش من الطبيعى إنك تشد الرحال علشان تقتل الناس وهم أبريا ... حد لسة مؤمن بربنا حق إيمانه .. حد قد يطلقوا عليه لقب متخلف .. وبرضه ماكنوش سايبينه فى حاله

الفيلم مؤثر جدا وتقريبا قعدت ساعتين ونص من العياط المتقطع ... ده غير التصفيق فى أكثر من مشهد ... سيناريو عبقرى .. كفاية المشهد بتاع التبرع للفقرا فى أفريقيا ... مين فى الدنيا عنده القوة دى إلا لو كان برئ فعلا ... الفيلم فى رأيى كانت ناقصاه النهاية اللى بس تتظبط .. النهاية سعيدة زيادة عن اللزوم .. الدنيا مش هتمشى بالطريقة الرمزية اللى عملوها فى آخر الفيلم ... لو عملوها علشان هو فيلم هندى ولازم نهاية سعيدة فياريت يبطلوا العادة دى ... ولو عملوها انطلاقا من مبادئنا احنا المصريين من ناحية حكاية العصر البائد وتمجيد الرئيس الحالى يبقى إخييه عليهم ... شايفاها كانت هتبقى نهاية أحلى بكتير لو فضل مش عارف يقابل الرئيس ... لإن هى دى الحقيقة .. للأسف

ده لا يمنع إطلاقا إن الفيلم تحفة ... بداية من شاروخان طبعا اللى أتقن دوره بطريقة خرافية ... وكاجول بتمثيلها التلقائى جدا بطريقة تفوق الوصف ... ولا لحظة حسيتها بتمثل .. جميلة ... كل ما فى الفيلم جميل ويستحق المشاهدة ... بس غلطتى الوحيدة اثناء مشاهدتى للفيلم .. ماكنش جنبى مناديل كفاية .. فماتغلطوش نفس غلطتى :))







Thursday, June 03, 2010

هاى .. كيفك .. سافا




I really dun understand why ppl especially youth like 2 write in Eng. ,,, w malo y3ny el3rby ??? 7'las kl wa7d fehom 3ml nfso 7'reeg el-american aw 3la asw2 t2deer british ,,, thz of course coz Arabic is considered as local language & u should be ashamed of urself if u r using it ... wslt el7al en wa7d y2oly 3shan bktb bel3rby eny bktb bl3'a 3ateeha !!!! da 3'eer tb3n el dhsha elmoree3a elly btb2a 3la wshosh elnas lma by3rfo eny ktabty 3alkeyboard bl3rby saree3a ... hwa e7na msh dy l3'tna brdo ??

klo koom wlly bktb beeh mn elsb7 elly esmo franco arabic koom .. ezay byfkro w by2ro mwadee3 kamla bell3'a elly msh l3'a dy ?? tieb msh abst mzahr el2ntma2 enk tktb bl3't bldk ???


ترجمة لما سبق :))

أنا حقيقى مش عارفة ليه الناس وخاصة الشباب بيحبوا يكتبوا بالإنجليزى .. وماله العربى يعنى؟؟ خلاص كل واحد فيهم عمل نفسه خريج الأمريكان أو على اسوأ تقدر البريطانى .. ده أكيد علشان اللغة العربية بقت حاجة بيئة وما يصحش إن الواحد يستخدمها ... وصلت الحال إنى علشان باكتب بالعربى واحد يقولى إنى باكتب بلغة عتيهة !!! .. ده غير طبعا الدهشة المريعة اللى بتبقى على وشوش الناس لما بيعرفوا إن كتابتى ع الكى بورد بالعربى سريعة .. هى مش دى لغتنا برضه ...

كله كوم واللى باكتب بيه من الصبح اللى اسمه فرانكو - عربى ده كوم .. ازاى بيفكروا وبيقروا مواضيع كاملة باللغة اللى مش لغة دى؟؟ .. طيب مش أبسط مظاهر الإنتماء إنك تكتب بلغة بلدك ؟؟

أنا مش هاعمل فيها الفظيعة واللى ما بتكتبش خالص بالإنجليزى ولا حتى ساعات قليلة باستخدم اللغة اللى مش لغة دى .. بس على الأقل باحاول قدر الإمكان ماستخدموش ... باحاول أقلله ومن جوايا عارفة إنها غلطة شنيعة .. أنا عمرى ما شفت شعب بيحاول قدر الإمكان وبيجتهد وبيبذل أقصى ما عنده علشان يمحى هويته ... هو خلاص مفيش خالص ؟؟؟



Tuesday, May 18, 2010

سمارة





لأ ما أقصدش سمارة بتاعت تحية كاريوكا .. ولا الرقاصة ولا وليد سمارة ولا أى سمارة نتيجتها هتطلع لما تيجوا تدوروا على جوجل ... أنا أقصد بسمارة الناس السود .. الأفريكانو والنوبيين ... مش عارفة ليه عندنا فى مصر ثقافة التريقة على السمر الأوى دول .. وياعم ده جاى من جنوب إفريقيا .. بينما احنا أساسا مش بيض للدرجة .. ولا احنا جايين من قارة تانية علشان نحس بالاختلاف الشديد ما بيننا وبينهم .. السمر دول فى منهم مصريين زينا عادى ... كل الحكاية إنهم جايين من النوبة .. طيب حد يصححلى معلوماتى هى النوبة دى مش من مصر برضه ؟؟

طيب حتى لو مش مصريين ... ليه ثقافة التريقة عامة على لون خلقه الله .. وياريتها بتقف عند التريقة بس .. لكن كمان إنهم بصفة عاممة مش حلوين .. أنا حقيقى باستغرب الناس .. أنا مش هاعتبر نفسى ملاك .. صحيح أنا باشوف الناس الآسيوية أكن فى فيل داس على وشهم فخلّى كل ملامحهم مطموسة ... بس بالرغم من كده خلاص أنا اتعودت على شكلهم ده .. عارفة إن فى صنف من البشر ربنا خلقهم بالمواصفات دى ... الأكتر من كده إن باقدر أصنف منهم جميلى الملامح ... فى منهم فعلا أمامير تبارك الله فى ما خلق ... وكذلك السود .. ربنا خلق فيهم الجميل الملامح والغير جميل الملامح ... زى البيض .. زى القمحاويين .. زى باقى خلق الله ... ده حتى الحيوانات فيهم الجميل والىل مش جميل

اللى باستغربله .. وباتضايق منه فعلا ... إن الناس البلاك عند كتير من المصريين بيبقى الرد الفعل الطبيعى عند رؤيتهم هو "يامّى" ... طيب ليه ؟؟ الفكرة الغالبة عند كتير من المصريين برضه إن السود قبيحى الشكل حتى لو هم بالفعل أمور ... طيب برضه ليه ؟؟ اشمعنى السود ؟؟

ولا لما أقول لحد إنى مش بس بادافع عن سود البشرة ... ولكنى كمان بانجذب ليهم .. باحس إن فيهم سحر غريب ويشهد على كده إعجابى بأمير بتاع بلاك تيما :))) ... بالاقى رد فعل غريب أكنى جاية من المريخ فساعتها ممكن يبقى طبيعى إنى أحب حد اسود ... هى الناس دى مش عايشة معانا على نفس الكوكب .. ولا أنا فعلا جاية من المريخ ؟؟

Saturday, May 15, 2010

لما صاحبتى ...تتجوز





لما صاحبة عمرى تتجوز .. لما صاحبتى اللى عشت معاها أهم سنين حياتى .. لما صاحبتى اللى عرفت حياتى معاها أكتر أحداث .. لما صاحبتى اللى حتة منى ما بنخبيش أى حاجة على بعض ..... تتجوز

آه فرحانة لها .. وآه طايرة ومبسوطة ... بس آه قلبى بيوجعنى .. حسة إن احنا هنبعد عن بعض كتير كتير .. بسبب البيت الجديد .. بسبب مسئولياتها الجديدة ... بسبب إن ده الطبيعى إنه يحصل .. بس أنا مش عايزة كده .. للأسف أصلا الفترة اللى فاتت رغم إن احنا آه كنا بنتكلم بس كان بيبقى كل فين وفين .. خبيت عليها حاجات كتير لإنى ماكنتش عايزة أشغلها وهى المشغولة بتجهيزات البيت والفرح .. ماكنتش باساعدها وماجتليش الفرصة إنى أساعدها ... بس كنت باسمعها ... ورغم كده حسيت إننا بعدنا اوى عن بعض .. وحشانى وحشانى وحشانى يا بت انتى

أكتر حاجة فرحتنى ... إنى كلمتها النهاردة .. كنت وصيتها فى الفرح مرتين أول ما ينفع أكلمها ترنلى وأنا أكلمها على طول .. كلمتها.. وحست إنى عايزة أديها حضن كبير أوى أوى أوى ... اللى عزّانى إنى عارفة الحمد لله إن جوزها بيحبها وهيحافظ عليها .. وإنه هيحاول على قد ما يقدر إنها ما تبعدش عننا أوى

ربنا يوفقكوا ويباركلكوا ... ويتمملك على خير يا تالتتنا :)


البنوتة التى شغلتنى طول الطريق للشغل




راكبة المترو زى كل يوم فى الطريق للشغل الممل جوايا بأقول اصطبحنا .. بس الحمد ماكنش زحمة تفعيص زى كل يوم .. بابص لقيت واحدة ست تخيييييييييينة وحطة ابنها على رجلها .. ابنها صغنون وكان باين عليه إنه معاق ذهنيا .. عمال يتنطط على رجلها ويعمل الأصوات اللى بيعملها ويلعب فى موبايل البنت اللى قاعدة جنبه .. ما فقتش من تأملاتى فى الولد الصغير غير لما واحدة خبطتنى جامد وهى بتعدى من ورايا .. بابص لقيتها ست سمرا أوى أوى وعجوزة أوى أوى أوى ... الزمن فعلا كان بيكتب قصته على وشها .. طبعا فين وفين لما واحدة خلت عندها دم وقامت لها لما لقت إن مفيش حد هيقوم لها .. قوم واحدة جاية من ورا بتجرى علشان تلحق تاخد المكان .. فالست اللى قامت من مكانها نبتهها .. والست العجوزة قعدت على الكنبة .. قاعدة جنبها واحدة ست حطة بنتها الصغيرة على رجلها .. البنوتة كانت تبارك الله جميلة جدا.. بيضا صغنونة ووشها مدور وخدودها حلوين ... لابسة بلوزة طويلة بمبى وبنطلون ليجن أبيض .. الجزمة بمبى والبرنيطة بيضا وفيها وردة بمبى ... كانت أكنها خارجة من كتاب أطفال .... ومرسوم على وشها ذهول الدنيا وهى بتبص للست العجوزة أوى اللى قعدت جنبها وبتنقل عينيها فى دهشة وحيرة ما بين الست العجوزة وما بين ملامح مامتها البيضا بياض التلج .. البنوتة ما فاقتش من سرحانها فى الست غير على صويتة من الولد المعاق ذهنيا اللى قاعد فى الكنبة اللى قصادها .. فبصت له جامد .. بص لها .. ابتسمت له وعملت باى باى .. فبطل يصوت وابتسم .. فالبنوتة ضحكت ...وقعدوا يعملوا حركات لبعض ويقلدوا بعض ... وفى لحظة ساد سكون غريب ما بينهم .. وقام الولد عامل حركة تشنجية كبيرة بجسمه ورفّص فى مامته وصوّت ... قامت البنوتة بصّت لمامتها نظرة كلها تساؤل .. و فى لحظة قامت متشنجة هى كمان ومصوتة .. والضحك بتاعها هى والولد ملا المترو بعد كده

Tuesday, May 11, 2010

فى حاجة ماسّة للـ... حب




الحقيقة الغريبة بالنسبة لى إنى فعلا عمرى ما حبيت ... وأظن عمرى ما اتحبيت .. ومش لإنى مش باشوف ولاد أو لإنى مش رومانسية .. بس أنا فعلا ما حسيت ناحية حد بالحب ... اللى بيغيظنى لما حد يقولى بلاه أحسن وانتى كدة مستريحة .. طيب إيش عرف اللى بيقولى كده إنى فعلا كده مستريحة ؟ بيحاولوا يريحونى ؟؟ ياريت ما تحاولوش .. أنا كدة مش مستريحة .. أنا عايزة أحب .. وأتحب

اللى عارفاه كويس عن نفسى إنى ماباحاولش حتى إنى أدّى لنفسى أو للى قدامى فرصة إن حد فينا يحب التانى .. باقلب الموضوع تهريج وضحك وهزار .. يمكن ... لأ مش يمكن ده أكيد .. أكيد خوف .. أكيد رعب .. أكيد هلع من علاقة مجهولة لسة هتبدأ

برغم كل شئ .. أنا نفسى أوى أعيش حالة حب ... ولو مرة فى حياتى

Monday, May 10, 2010

عايزة إجااااااااااااااازة





المفروض يدونا بكرة إجازة .. هم مش شايفين درجة الحرارة كام ؟؟ مش شايفين التراب ؟؟ مش شايفين إننا مش شايفين حاجة ؟؟.. بقيت باتلكك علشان آخد يوم إجازة .. يارب يدونا يوم إجازة .. لأى سبب كان

Saturday, May 08, 2010

الحاجة الناقصة



لإنى ما كتبتش امبارح فحسب قونين الحملة لازم النهاردة أكتب تدوينيتن :D :D

من غير قوانين ولا حاجة .. أنا عايزة أكتب .. أكتب على جبنى وعلى كسلى

أنا حاليا باشتغل شغلانة مش باحبها .. بس قاعدة فيها لسببين .. لإنى أولا مش عارفة لو سبتها أعمل إيه فى حياتى .. وأنا جربت قعدة البيت .. وقعدة البيت مقرفة وزى الزفت .. والسبب التانى إنها خلتنى أعرف يعنى إيه استقلال مادى.. ولقيته إحساس حلو أوى وماعنديش استعداد بصراحة إنى أتخلى عنه .. عجبنى جدا .. وعرفت يعنى إيه إنى أبقى باعمل الحاجة بفلوسى فعلا لها طعم وإحساس مختلف

بس مانكرس إنه فى لحظة اعتراف وصفاء حقيقى مع النفس .. بالاقى حاجات كتيرة أوى ما باعملهاش فى حياتى لإن بيبقى عندى حاجة ناقصة ... لإنى ماعنديش لا الجرأة ولا الحماس المطلوبين واللازمين لعمل الحاجة دى بغض النظر بقى عن باقى الظروف ... أقربها إنى من جوايا واثقة ومتأكدة إنى لو فضلت أشتغل شغلانتى دى أكتر من سنتين أكيد أكيد أكيد هأصاب بانهيار عصبى ... ولا نفس المجال ده أصلا اللى ضيعت فيه الـ5 سنين بتوع الكلية .. مش حسانى فيه إطلاقا وأنا واثقة من كلامى ده .. أنا لو بابقى واثقة من حاجة بابقى عارفة أنا مش عابقى كويسة فى إيه .. وأنا مش هابقى أى حاجة فى المجال ده .. ماأنا أصلى لازم أحب اللى باعمله .. مش باعمل إطلاقا بميدأ حب ما تعمل حتى تعمل ما تحب ... ماشية بمنطق اصبر على ما تعمل حتى تجد ما تحب عمله... المهم رغم كل ده ماجتلييش ولا مرة الجرأة إنى أقول لأمى أو أبويا أى hint أوفكرة إنى بافكر أسيب مجالى ده وأنا عارفة إنه ساعتها هيبقى فيه نقاش حاد وصريخ فى البيت ... واثقة إنهم هيقفوا ضدى .. علشان كده ما ولو تنبيه صغير لمامتى غير النهاردة .. ولما قلتلها فى وسط نرفزة كان ردها علىّ "ربنا يهديكى" .. بس من جوايا متنرفزة أوى .. سيبينى ما تحاوليش تحطينى فى قالب محفوظ وروتينى ... فصبر جميل ... مستنية أكون عرفت الخطوط العريضة لحياتى الجاية إن شاء الله فى موعد أقصاه 1/12 اللى جاى .. لإنه بكدة يبقى فات سنة على وجودى فى الشغل ... يا مسهل

ملحوظة : الصورة اللى فوق تظبيطى بالفوتوشوب :))

من جديد



طيب من الواضح إنى كنت باعمل الحكاية بطريقة غلط .. اتضح إن الحملة دى معمولة بشكل منظم وإنى أنا عايشة فى مية البطيخ .. واتضح إنى لازم أزور جلالتها فى مملكتها علشات تكتمل نواحى الحملة بالنسبة لى وأعتقد بالنسبة لهم .. فأنا من هنا باقول إنى كنت مغفلة مغفلة مغفلة :)))

عامة أدينى أكنى بابدأ من جديد .. أو أنا فعلا بابدأ من جديد .. مش مهم أنا باعرف اكتب ولا لأ .. مش مهم فعلا .. ومش هاكتب عن إيه .. قررت إنه مادامت حاجة باحبها ماينفعش أقف متكتفة بقى :S :S :S

Thursday, May 06, 2010

مسلسلات أجنبى ... مونك


عودة لمتابعة المسلسلات الأجنبية .. حاليا باتفرج على "Lost" بعدما خلصت كل مواسم المفضل دائما وأبدا عندى "Friends".. أنا أصلا بنى آدم محب جدا لمسلسلات وأكيد يعنى لما يكون مسلسل حلو مش أى حاجة والسلام .. تقريبا المسلسلات الأمريكية هى أكتر حاجة تابعتها بكل أنواع المسلسلات .. يعنى درامى وإجتماعى وأكشن وكوميدى وبوليسى باتفرج عليهم كلهم .. لإنهم بيبقوا معمولين بحرفية عالية .. طيب هاتكلم النهاردة على "Monk"مثلا






مونك ده اسم مسلسل بوليسى كوميدى شهير جدا .. اسمه على اسم البطل بتاعه وهو محقق خاص تم تسريحه من البوليس لأسباب خاصة بيتم التعرف عليها فى الحلقات الأولى .. مونك بيعانى من مرض غريب .. موسوس لأقصى درجة وبيحب كل شئ منظم وبيتبع منهجية معينة علشان يقدر يعيش لازم تكون له مساعدة أو ممرضة تساعده على الحياة بالطريقة دى وغالبا ما يدفعش أجرها .. الشئ المميز فى مونك واللى يخليهم يعملوا عليه تمثيلية هو قدرته الفائقة على التركيز وحل قطع البازل الصغيرة جدا والبعيدة عن بعضها فى اللغز الكبير .. حبه للتفاصيل الصغيرة هو ده دايما اللى بيخليه يحل الجريمة .. واللى بيخليه دايما محل سخرية من الناس .. واللى غالبا بيوقعه فى أكثر المواقف كوميدية .. تستلقى على قفاك من كتر الضحك زى ما بيقال :))

الشئ الغريب فى "كره" بعض الناس لمونك .. إن تونى شلهوب بطل المسلسل لبنانى الأصل يهودى .. يا جماعة هو حد قال إننا هنتجوزه؟؟ طيب حد قال إنه بيناصر إسرائيل مثلا ؟؟ طيب ما ستيفن سبيلبرج اللى كل فلوسه رايحة على إسرائيل وبناء حضارتها بتتفرجوا على أفلامه زى المجانين ... بعض الناس بيبقى لهم منطق غريب جدا

عامة لو حد عدّى من هنا وماعندوش نفس الإحساس من ناحية تونى شلهوب .. يتفرج على المسلسل وبعدين يحكم عليه :)


مقدمة مونك الموسم الأول .. من غير أغنية كان ساعتها


Tuesday, May 04, 2010

آآآآآآآآآآآآآآآآآآآآآآه





احنا ليه كبرنا ؟؟ واحنا ليه ممكن سننا يعدّى بس من جوانا نفضل صغيرين فنتحدى الطبيعة وأكيد بنخسر

Monday, May 03, 2010

أنا والسواق والربع جنيه


امبارح ما كتبتش رغم إنى كنت ناوية أكتب .. واتضايقت إنى مادخلتش كتبت .. دلوقتى رغم إنى هلكانة وورايا حاجات كتير بس مصممة أكتب .. عايزة ألتزم ولو بحاجة صغيرة

النهاردة وانا رايحة الشغل فوجئت إن الراجل أخد من البنت اللى قاعدة جنبى راكبة من نفس المكان ورايحة نفس المكان 75 قرش .. يعنى أخد جنيه وردلها ربع .. بينما أنا اديتله جنيه وما ردليش حاجة .. الفكرة بقى دايما اللى بتعد تروح وتيجى فى دماغى فى المواقف اللى زى دى .. إنه أولا الربع جنيه ده حقى .. بما إن المشوار بـ75 بس وانا مدياله جنيه .. ثانيا إن قيمة الربع بالنسبة للأجرة الأصلية هى التلت يعنى نسبة مش بسيطة .. زائد إن لو الربع ده للسواق مش لىّ مش هيسيبنى طبعا غير لما ياخده .. ده من ناحية الحق والمستحق والقيمة الجوازية للربع الجنيه

بينما لو بصيت للقيمة الفعلية للربع جنيه بالاقيه ولا حاجة .. وانا ساعات كتير باركب تاكسى المشوار ده بياخد على الأقل 5 جنيه .. الربع جنيه فعليا ولا حاجة .. ومش باحس بنقص مثلا لو ما اخدتش الربع جنيه ده .. ولا فلوسى فى البنك هتكتر لما آخده .. بس باقول أنا لو سبت حقى فى الصغير يبقى مالومش على أى حد بيتسرق وساكت .. وبعدين أوقل ياختى اتلهى مانتى يوميا بتتسرقى .. ولا لما بتنزلى تشترى هدوم شوفى كمية الفلوس اللى بتترمى على الأرض


الرأيين دول دايما فى دماغى .. على الربع جنيه الحيران :s :s :s :s

Sunday, May 02, 2010

أول يوم فى الحملة الفجائية :)


فوجئت بصديقة على الفيس بوك حطة لينك للمدونة بتاعتها بتدوينة جديدة وكاتبة أول تدوينة فى الـ30يوم تدوينة .. قلت أشوف الحكاية لقيت إنها حملة قايمة بها مدونة زميلة للرجوع عن الانقطاع عن التدوين .. الفكرة لقيتها جميلة جدا .. وحبيتها وقلت أحاول أبقى فيها حتى لو دماغى فاضية ومش لاقية حاجة حاليا .. بس حسة إنى محتاجة حاليا لأى نوع من الالتزامات .. حتى لو كان التزام بسيط زى ده ومايخصش حد غيرى

بس قعدت أفكر أكتب عن إيه ولا لمين ؟؟ لقيت إن الإجابة عن السؤال التانى هى إنى باكتب لنفسى فى الأساس .. مش مهم أوى إذا حد قرا الكلام ده ولا لأ .. مش مهم حد علّق ولا لأ .. المهم إنى أخدت خطوة ناحية أى حاجة .. أما هاكتب عن إيه فدى فعلا مشكلة ... بس قلت أنا لو بصيت لحاجة صغيرة من اللى بتحصلى كل يوم بشكل مختلف أكيد هالاقى حاجة أكتب عنها .. مانا حياتى مش فاضية أوى كده .. وفى الأول والآخر .. غالبا ماحدش هيقرا الكلام ده :)))


أقول عن الفيلم اللى شفته النهاردة

Le fabuleux destin d'Amélie Poulain





الفيلم ده ماكونش مبالغة أبدا لو قلت إنه رائع ومثالى .. جميل جدا .. تصويره وفكرته وتمثيله وإخراجه .. أفكار البنت الحيالية وطفولتها وطريقتها المبتكرة اللى بتغير بيها حياة الناس اللى حواليها .. بس مش قادرة تغير حياتها وبتقول إنها مستريحة كده وإن لها خطة علشان الدنيا تنجح .. بينما هى فى الحقيقة جبانة .. يمكن خايفة من الفشل .. يمكن الحل بيكمن فى الجملة اللى قالها لها الرجال العجوز فى آخر الفيلم "انتى مش معمولة من زجاج .. اخرجى للدنياوإلا قلبك هيبقى جاف وهش" .. هى كانت خايفة من التجربة بينما كانت هى زى اليد السحرية اللى بتغير حياة الآخرين ... الفيلم رائع وجميل فعلا

Thursday, April 08, 2010

صحوة ربيع


امبارح بطريقة غير مقصودة ولا فى الحسبان أساسا حضرت العرض المسرحى "صحوة ربيع" ... على حسب ما فهمت من الورق اللى وزعوه علينا قبل العرض إن المسرحية مأخوذة من أخرى أجنبية بنفس الاسم وإنها تعبر عن الشباب ..علىّ أن أعترف إن القصة نفسها حلوة ولكنها فوق الجريئة .. أنا أتقبل الجرأة ولكنها على رأى صديقتى "مسرحية فجّة" ... حاجات كتيرة جدا ضايقتنى وماكنش لها لزمة كبيرة ... كمجمل العمل لم يعجبنى ولكن حاجات أكيد عجبتنى .. من الممثلين أعجبنى أحمد الجندى"يوسف"، على خميس "مصطفى" وسلمى سعيد "رشا" ... من الآخر إلى حد كبير صدقتهم ... كإخراج عجبنى تداخل الصوت المسجل بأصوات الممثلين الحيّة .. ولكنها كانت محتاجة دراسة وتمكن أكبر من كده حتى بالإمكانيات البسيطة اللى عندهم ... حاجة كمان ... بيقولوا إن العرض بيعبر عن الشباب .. هو عدم اللامؤاخذة يعنى أنهى شباب دول .. دول مناطق معينة .. ما أظنش إنى اتربيت على إنى ماهرشش (لا أهرش :)) قدام الناس .. أكيد ماكنتش ماشية فى الشارع عندى جرب مريع بالمنظر ده يعنى

العرض اسمه صحوة ربيع ... أنا لاشفت صحوة ولا حسيت ربيع .. الممثلين كلهم أكنهم نايمين والشباب اللى المفروض على حسب ما فهمت إنهم الربيع يبانوا ولا أكنهم عواجيز

حاجتين تانيين مافهمتش فى العرض .. الولد اللى كان بيحب بنت من خياله .. هو بيحب فعلا بنت من خياله ولا هو شاذ ؟ ده الأولانى ... التانى .. آخر مشهد اللى كانوا واقفين فيه بضهرهم .. مافهمتوش أساسا واحنا جوة العرض .. لما خرجنا واحدة صاحبتى شرحتولى .. وعلى قد سفالته على قد ما أنا مش فاهماه .. مقحم جدا على النص ومش شايفة له لزمة .... آخر سؤال .. مش فاهمة مين الراجل الملثم اللى جه لمصطفى وكان بيقوله ثق فىّ وأنا أقولك أنا مين ... برضه إيه يعنى مش فاهمة

من الآخر يعنى .. تجربة جديدة بالنسبة لى ماندمتش إنى دخلتها

الصورة من العرض .. بعدسة صاحبتى الموهوبة جدا مها الديب



Tuesday, April 06, 2010

شاهدت لنفسى : Pride & Prejudice





مسكت الرواية أكتر من 5 مرات حتى الآن ولم أتجاوز الفصل الثانى على أحسن تقدير .. مش لسوء فى الرواية ولكن لعدم قدرتى على متابعة القراءة بلغة غير العربية لفترة طويلة ... غير إنى بقالى فترة مش بالقصيرة شبه منقطعة عن مشاهدة الأفلام وخاصة بعدما أكملت مواسم "فريندز" المسلسل المفضل .. ولكن كنوع من أنواع التغيير وربما كنوع من أنواع التحفيز لقراءة الرواية وربما ربما ربما إنى أقع فى حب "كييرا نايتلى" بأسنانها الغير مثالية وابتسامتها السوبر مثالية

مبدئيا لازم أقول إنى باقع فى غرام العصر اللى بتدور فيه الرواية .. الإهانات كلها شكل تانى .. باحب الفساتين والرقصات المنظمة والبرانيط اللى بشريطة ستان .. باحب الريف الإنجليزى وباحب وقت كانوا بيصوروا فيه الرجالة بنبل أخلاقهم مش بشكلهم

بعد كل الكلام ده يبقى أكيد غنى عن القول إنى الفيلم عجبنى .. حبيت إليزابيث بينيت ومستر دارسى جدا .. باحب فى الروايات دى إن أغلب البنات بيكونوا إما خبثاء بزيادة أو طيبين ورقيقين بزيادة بينما البطلة دائما ما تحمل روح مختلفة .. روح صريحة لا تخاف من قول رأيها بقوة ووضوح وفى نفس الوقت تفضل راقية

مش عارفة أحكى على الفيلم يمكن لإنه تقليدى جدا ويمكن لإن الرواية معروفة جدا .. بس باتساءل ليه دايما فى الروايات القديمة دى الرجالة بتبقى غامضة ومعقدة؟ يعنى مستر دارسى هنا وهثكليف فى مرتفعات وذرنج ومستر ريد فى جين إير ... هل كانوا كده فعلا ولا هى بتقفل معاهم ؟؟

من الآخر كل حاجة فى الفيلم عجبتنى والموسيقى التصويرية بالبيانو أخدتنى لعالم تانى ... الشئ الوحيد اللى كان مضايقنى فى الفيلم هو مستر بينيت ... ما قدرتش أحبه ولا أكرهه لشخصه ولكن كرهته علشان حسيت إن الراجل مش عارف يمثله صح .. أو مأفور فى التمثيل مش عارفة .. بس حاولت على قد ما أقدر إنى أتغاضى عنه

الفيلم يستحق المشاهدة إذا كان حد معدى من هنا بيحب نوعية الأفلام دى والجو ده .. ويمكن يمكن يمكن أحاول اقرا الرواية من جديد

Saturday, March 27, 2010

قرأت لنفسى : ربع جرام




الرواية أعتقد إنها بقت أكتر من نار على علم .. يعنى أول مرة أسمع عنها كانت فى معرض الكتاب 2009 .. لما رحت أشتريها فى معرض الكتاب 2010 لقيتها الطبعة الـ21 .. مما يعنى إنها أكثر من رائعة إنها تخلص 20 طبعة فى حوالى سنة على الرغم من ضخامة الرواية "أكثر من 600 صفحة" .. الرواية زى ما الناس أعتقد إنها عرفت رواية واقعية حول شاب مدمن وكيفية دخوله دايرة الإدمان وبعد كده نشوف إذا كان هيخرج منها ولا لأ ..

الرواية من وجهة نظرى المتواضعة كانت OVERRATED تماما .. ومتهيألى أنا لازم أدين بالشكر للرواية دى إنها عرفتنى معنى الكلمة دى .. الرواية معقولة مافيهاش تفاصيل مملة ولكن ... أسلوب الكاتب هو الى ممل بدرجة لا يصدقها عقل .. كمية التكرار يخليك عايز ترمى الرواية وتسيبها .. زائد أسلوب الرواية نفسه كان ركيك . كان محتاج تدريب على الرواية أكتر من كده علشان يعرف يمسك خيوطها كويس .. يعنى فجأة بنلاقى شخصيات ظهرت من العدم والبطل يعرفها من سنين يحصل معاها موقف قوى وبعدين يسكت ما يجيبش سيرته تانى لفترة طويلة لحد مثلا ما يموت ولا تيجى مصيبة تناخده فالبطل يعيش حالة حزن على صديقه واحنا المفروض نتعاطف معاه .. بس أبدا عمر ما الإحساس ده وصلنى .. ده غير إنك فى نص الرواية بتضيع ما بتبقاش عارف مين بيكلم مين ومين اللى بيقول الجملة دى .. حد فاكر السؤال بتاع القصة فى الإنجليزى أيام المدرسة "comment" ... السؤال ده لو جه على الرواية دى الطلبة كلهم هيسقطوا وماحدش عمره هيعرف يجاوب على السؤال ده

الرواية ماكنتش مملة ولكنها كانت محتاجة لكاتب آخر يتلافى ركاكة الأسلوب ... بالنسبة لى عايزة أقول لعصام يوسف بالرغم من كل عدد الطبعات دى .. هارد لك وحاول تدرب قلمك أكتر من كده

ملحوظة : علشان مابقاش ظالمة انا فعلا حسيت بصلاح جدا "بطل الرواية" لما كان فى قاع بئر الإدمان اللى كان فيه .. وكنت متأثرة لدرجة الضيق والخنقة فى الحياة والناس حواليا كانت بتحاول تسلينى وتضحكنى وهى ماتعرفش مالى .. كل ده بسببك يا صلاح :))

Saturday, March 06, 2010

شاهدت لنفسى






The blind side


قالوا إنه فيلم أوسكار قالوا إنه فيلم ساندرا بولوك قلت يبقى لازم أتفرج عليه :D :D

مبدئيا من الإعلانات أنا ماكنتش عاجبنى لو شعر ساندرا حساه مفتعل ومش لايق عليها .. المهم جبت الفيلم واتفرجت عليها ولقتنى مش حابّة شخصيتها دى مش متعودة عليها فى الأدوار دى .. شوية بشوية اندمجت مع الفيلم وحبيت الشخصية وحبيت الفيلم .. ما اوهمتش بيه ومش شايفة إنه فيلم اوسكار .. بس حسة إنى بقالى فترة مش شايفة فيلم يستاهل الأوسكار عن جد .. مفيش فيلم بيبهرنى لذاته ولشخصيته فمش فارقة بقى

بس لاحظت إنه فى الفيلمين الأخار إن الأزواج طالعين طيبين ومطيعين لزوجاتهم .. مش حد كان يقولنا إن الأفلام دى درامية خيال علمى شاطح

حاجة كمان تحسسك إن الفيلم خيال علمى أكتر ماهو درامى .. نموذج السيدة الغنية اللى بتعطف على الفقير ولها شخصيتها القوية المستقلة فى البيت وفى الشغل .. نموذج شايفاه فى الأفلام دى فى الفترة دى بالذات اشمعنى ؟؟ حركة جديدة ؟؟؟؟





رسائل البحر

أحلق شعرى زيرو وابقى فى نفس الوقت شبه جوليا روبرتش لو الفيلم ده مافيهوش رموز .. الفيلم كله رموز من أوله لآخره .. النقطة فى الأذكيا أمثالى اللى مش بيفهموا الرموز بس بيفهموا وجودها .. الفيلم لو هآخده كقصة كده فقط من غير رموز يبقى الفيلم مش قد كده وفى حاجات كتير مش شايفة لها لزمة .. لو هناخده على إنه برموز فليه مابيتوزعش علينا كتالوج الفيلم واحنا داخلين ؟؟؟

بس ما ندمتش على دخولى الفيلم .. على الأقل أخيرا دخلت فيلم ساعتين لآسر ياسين .. طبعا استحالة أنمدم على حاجة زى كده .. وكمان نضيف لها نص ساعة مع بسمة اللى غالبا مش باحبها بس كانت رهيبة فى الفيلم ده .. رهيبة بشكلها أو ماكياجها أو حتى لبسها .. والنبى اللى يفهم الفيلم يشرحلى .. حاجات كتيرة أوى واقعة منى