رحت النهاردة أمسية د. إبراهيم الفقى اللى كانت فى قاعة المؤتمرات و كنت رحت قبلها بكام أسبوع كده مقدمة لمحاضرات زدنى بما إن العالم كله حواليا بيتكلم عليها و خصوصا كمان لما لقيت واحدة من أعز صاحباتى مهتمة بالموضوع و هتحضر و كدة ... قلت أروح أشوف إيه اللى بيحصل هناك ... إيه الموضوع اللى بيشغل فكر الناس ده
بصوا مبدئيا أنا مش ضدهم علشان ماحدش ييجى يقولى انتى بتكرهيهم و انتى ما بتفهميش حاجة و الكلام الحلو ده ... أنا أولا مش باقتنع أبدا بالكلام النظرى و خصوصا لما حد يديهولى لإنه عايز يدهولى .. يعنى بيديهولى فى كورس مدفوع التمن ... باحس ساعتها إنى باخد درس ... و لإنى أساسا معقدة من حكاية الدروس دى، دى نقطة ... نقطة تانية و بأقول مرة تانية إن بتوع التنية البشرية على راسى من فوق ... إن كلامهم مكرر و معروف أو على الأقل بالنسبة لى و مش هارسم لقى عليكوا إنى البنت الفظيعة اللى الكتاب مش بيفارق إيدها .. بس أنا فعلا مش كلمة قالها ما اعرقهاش اللهم إلا النموذجين بتاع الكفاح اللى قال عليهم ... يعنى لما اتكلم عن الجوع المرضى اللى بيسد الفراغ العاطفى طيب ما أنا قريت عنه فى قصة لإحسان عبد القدوس مش فاكرة بالظبط انهى مجموعة قصصية بس متأكدة إنى قريت عنه .. حكاية توريث العادات فينا ياما د.أحمد خالد توفيق و د.نبيل فاروق اتكلموا فيها .. و باقى الكلام بيتاخد من كلمتين من التليفزيون و البرامج الدينية على كام فيلم أجنبى على مانشيتات الجرايد لإنى مش باحب اقراها و على كمان عمرو خالد .... طيب أنا استفادتى إيه بقى ؟؟؟!! ده حتى حكاية حب نفسك و ما ترميش اللوم عليها واحد لسة قايلها لى من كام يوم و قالى اعتذرى لنفسك بجد و خليها تحاول تسامحك على اللى انتى عملتيه فيها و حاولى تصلحى من نفسك واحدة واحدة هياخد وقت و هياخد جهد و تعب نفسى كبير لإنك ممكن تبعدى عن ناس بس لو الناس دى ما قدرتش تفهم انتى بعدتى عنهم ليه يبقى ما كانوش يستاهلوا .. قالى خليكى قريبة من ربنا و امشى على الصح اللى ربنا قاله ... قالى خليكى نفسك و علشان تتغيرى للأحسن لازم يكون فى حد صاحبك جنبك بجد تلجئى له علشان لو انتى لوحدك ممكن تضعفى ... طيب مادمت أنا لاقية الحمد لله الكلام ده إيه اللى يجبرنى إنى أروح التنمية البشرية ؟؟
للمرة المليون بأقول أنا مش ضد محاضرات التنمية البشرية ... بس أنا بجد مش عارفة إيه لزمتها .. هو احنا ما نقدرش نتغير بنفسنا لازم حد من برة هو اللى يغيرنا ؟؟ ... يعنى كنت باتريق على برنامج super nany و بأقول يعنى خلاص هم مش قادرين ينظموا حياتهم و علاقتهم مع بعض و علاقتهم مع ولادهم بطريقة صح و محتاجين حد ؟ ... مش عارفة .. نفس الحكاية باشوفها فى مستشارين الزواج ... يعنى دول اللى بجد هينظموا حياة المتجوزين .. فى كده مستشار جواز بييجى على Otv و باحب أتفرج عليه أوى ... ده إيه التناقض ده ؟ يا جماعة أنا لسة ما اتجوزتش و عايزة أعرف الغلطات اللى المتجوزين بيقعوا فيها علشان أحاول على قد ما أقدر إنى ما أقعش فيها .. طيب ليه الناس اللى اتجوزت ما سمعتش الكلام ده قبل ما تتجوز ؟
طيب أنا فكرت فى حاجة ممكن تبان لكوا تناقض بس استحملونى ... أنا مليانة إلى حد ممكن أقول إلى حد ما .. الفكرة إنى حاولت إنى أخس لوحدى و ما قدرتش و قاومت كتير إنى أروح لإخصائى تغذية بس فى الآخر رضخت و رحت لإنه كان مطلب قومى ... طيب نقدر نقول إن ده زى ده ؟؟!! ... بس أنا عارفة أنا ليه لجأتله ... لإنى كسولة .. لإنى باحب حد يكون مسئول عن شئ ما علشان كده أخدت دروس فى ثانوية عامة لإننا اتربينا على إن حد يقولنا ذاكروا أو ناموا أو كلوا ماكناش احنا اللى بنخطط لحياتنا فكبرنا و احنا فينا العقدة دى
أنا زهقت منى ممكن بعد ما آجى من السفر أكون لقيت حل للساقية دى أو إنى أكون اتحيرت أكتر .. أنا مسافرة إسكندرية إن شاء الله أسبوع تقريبا و مضطرة بس يلا بقى مامتى عايزة تشوف أهلها و اهه بالمرة أسلم على البحر و آخد لى كام صورة حلوة هناك .. ماحدش عايز شوية رمل :)
و آسفة على التطويل الفظيع ده
7 comments:
السلام عليكم
انتي ليه بتدافعي عن موقفك كتير
حتي لو ضد التنمية البشرية وفيها ايه؟
كل واحد فينا ليه الحاجه اللي يقف ضدها عادي يعني
بالنسبة للتخن وبالذات انتي بتقولي مليانه شوية
دا مش وحش الا لو كان بيعوقك في حياتك وبيسببلك مشاكل
في الحالة دي مفروض انك تتعالجي منه علي اساس انه سيصبح مرض
انتي تناقضتي مع نفسك في حته
انتي قولتي روحت للدكتور علشان انا كسوله
طيب ما هما كمان بيروحو لبتوع التنمية البشرية او لمستشارين الزواج علشان كسولين
تحياتي وترجعي بالف سلامه
طيب أولا التنميه البشريه ديه علم حديث اكتشفوه متأخر عن باقى العلوم وتقدرى تقولى بدأوا يهتمه بيه ويدرسوه عشان يكون ذى تطعيم ضد أمراض الإكتئاب والملل وكل الأمراض النفسيه الى مش هاتلاقلها علاج فى الصيدليات
ثانيا حتى لو انتى عارفه المعلومات ده من مصادر مختلفه هم بيجمعوها ويقولوها تانى وذكر فان الذكرى تنفع المؤمنين
على فكره انا فى الأول كنت برضه فكراه كلام نظرى بس لما بدأت أهتم بيه وأقرأ وأحضر فيه محاضرات كتير لقيته غير كده خالص لأنى لقيته بيجسد الواقع وبيوصف المشاعر الى انتى حاسه بيها ويبدأيشرحلك ازاى تكون نفسيتك أحسن
بالنسبه لموضوع الرجيم دا ليه أسباب برضه بس انتى مقرتيش عنها قبل كده لو كنا بنقرأ فى التنميه البشريه كنا عرفناها ياهانم ههههه
التناقض عندك فى محاضرات الزواج وتربيه الأولاد طبعا الواحد بيكون محتاجك كورسات قبل الجواز لأنهم اكتشفوا ان الأهل ممكن يدمره الطفل وهم فاكرين نفسهم بيربوه ذى مثلا ممكن يحاولوا يقارنوه بأخوه وهم فاكرين نفسهم بيشجعوه عشان يكون أحسن وميعرفوش انهم بيأثروا تأثير سلبى جدا عليه وممكن كمان يخلوه يكره أخوه ده والجواز نفس الحكايه بيشرحلك احتياجات الجنسين البسيطه ممكن كل حد فيهم ميكنش فاهما ولو عرفها ممكن تسعد الطرف الأخر جدا مره حد برضه كان بيقول لو انتى بتحبى القطط وبتحبى الشكولاته مش هاينفع تدى الشكولاته الى انتى بتحبيها للقطه الى انتى بتحبيها لازم تعرفى القطه بتحب ايه عشان تسعديها وتسعدى لسعادتها
طولت عليكى انا عارفه بس بجد هتوحشينى قوى ترجعيلى بالسلامه يارب وان شاء الله هتتبسطى هناك
شكرا جدا على اهتمامك بالاستقصاء وابداء رأيك
انتي صح بس الواحد ساعات بيبقى في اوقات بتمر عليه مش بيقدر يحدد هو عايز ايه او ان افكاره بتبقى مشتته فده بيبقى زي اعاده لترتيب الافكار ممكن تاخدي بيها وممكن لا بس اعتقد انها على الاقل بتغير حاجه
انا عمري ماحضرت حاجه زي كده بس شفتها كذا مره ف التليفزيون
مهند
و عليكم السلام .. أنا مش بادافع عن موقفى و لا حاجة أنا فعلا مش ضد التنمية البشرية
التخن عامة أنا شايفاها حاجة مش حلوة أبدا .. بس بتكون مصيبة لو حد مش قادر يتكيف مع تخنه ده و عمله مشكلة أو كان محل سخرية الآخرين .. بس اكتشفت إن حكاية التخن دى بتفرق من مكان للتانى ... يعنى لما اتفرجت على فيلم أجنبى ألا و هو
the devil wears parada
كانت البطلة جسمها حلو عادى بس هم كانوا معتبرينها تخينة .. مش عارفة إيه اللى دخلنى المتاهة دى ما علينا نخرج منها
انا عارفة انى تناقضت مع نفسى فى الحتة دى بس لعلمك أنا رحت للدكتور و أنا متضايقة لانى مش باحب الفشل و عارفة ان الدكتور مش بيعمل حاجة عظيمة و الكلام اللى بيقولوا كل أسبوع بيبقى مكرر .. عامة أنا هاحاول ماروحلوش لإنى من البداية ماكنتش عايزة أروح
و الله يسلمك :)
شيمااء .. كنت مستنية ردك (;
بصى يا ستى التنمية البشرية أنا مقتنعة بيها بس كل الحكاية إنى مستغربة من أعداد الناس الكبيرة اللى مش قادرة تاخد الحل بنفسها رغم إن الكلام معروف .. أنا مش ضد المساعدات و كده بس اكتشفت إن العدد كبير جدا
فى حكاية الجواز و كده أنا مقتنعة إنى لازم على الأقل اقرا فى التربية و فى تحمل المسئولية و خلافه ده إن ماكنتش هآخد كورسات كمان .. لإن ساعتها أنا مش بس مسئولة عن نفسى و لكنى المفروض إن شاء الله هأبقى مسئولة عن أسرة يبق لازم أتجهز و أتعلم صح بدل ما أضيع الناس اللى مالهاش ذنب غير إنى مامتهم .. أنا أعرف شوية حاجات و أكيد ما تكفيش
حبيبتى طولى زى ما اتنى عايزة .. انتى واحشانى أوى و إن شاء الله هاشوفك قريب
و لو ... كلامك صح .. أنا يش استغربت و يمكن أكون اتضايقت إنى لقيت كل العدد ده مش قادر يحدد خو عايز إيه أو إنه عايز حد ياخد بإيده بس بينى و بينك لما فكرت شوية لقيت إن طلب المساعدة و حد محتاج أحسن لما يكون أساسا مش عارف إنه محتاج و يعد ضايع
Post a Comment