النهاردة 13/9/2007 بيصادف إنه يكون 1 رمضان ... طبعا كل سنة و الكل بألف خير و رمضان كريم، الله أكرم ... بس كمان بيصادف حاجة تانية ... مولد المدونة دى
نبدأ بميلاد المدونة اللى جه صدفة أساسا لما البنات كلمونى و قالوا لى تعالى نعمل بلوج مشترك قلت مفيش مشاكل .. شوية و قالوا لى علشان تشتركى يبقى لازم تعملى واحد بتاعك قمت عملت واحد فى السريع علشان مجرد يبقى عندى واحد و أعرف أدخل معاهم و فاكرة إن أول بوست كتبته كان عبارة عن حيرة و تخبط و ماكنتش عارفة إذا كنت هاستمر فى التدوين و لا هاعمل إيه فى دنيتى ... بس بعد كده حبيته بجد و حسيت إنه حتة منى كده و مش قادرة استغنى عنه إلا لظروف قهرية .. و اكتشفت ناس بجد جميلة و حلوة جدا يمكن مش عارفاها بشخصها بس أنا اتشرفت بمعرفتى لمدوناتهم و لأ سلوبهم و كتاباتهم .. مش هاذكر أسماء بس كل واحد رد هنا يبقى أنا باوجه له رسالة حب و شكر و تقدير و باتمنى دوام الاتصال بينا و بينه
جينا بقى للجد .. و رمضان .. أنا مش هأقول أنا ناوية أعمل إيه فى رمضان ده لإنى دايما بأقول حاجات كتير و مش باعمل حاجة .. فقررت إنى أنوى بينى و بين نفسى و لما يخلص الشهر إن شاء الله أبقى آجى و أقول أنا علمت إيه و يارب يحقق لى اللى فى بالى .. و يحقق لكل الواحد اللى فى باله من ختم قرآن و زيادة إيمان و عبادة و تقرب لله سبحانه و تعالى ... و رمضان كريم و كل سنة و الكل بخير
آخر حاجة بقى فالدراسة خلاص يوم الحد ( يع يع يع ) .. طبعا غنى عن القول إن باكره الكلية بس بالرغم من كده ساعات بالاقينى مشدودة مش عارفة إيه العلاقة السيكوباتية اللى بينا دى .. فحبيت أقول أى كلمة بمناسبة الدراسة ( مش عارفة الناس بتقول كل سنة و انتوا طيبين على إيه ) ... بس بمناسبة الكلية أحب أقول القوى فيه اللى أقوى منه
13 comments:
كل سنه ومدونتك طيبه عقبال كده يارب متجوزيها وتتطمنى عليها فى بتها ههههه
لاء بجد
كل سنه وانت طيبه وربنا يتقبل منا جميعا يارب
ومتكرهيش الكليه ده أجمل ايام يا أختى عيشى حياتك قبل المسؤليات والأرف
سلام:)
بعد السلام عليكم
كل سنة ومدونتك الجميلة أجمل و أجمل وعقبال متخاويها بمدونة تانية جميلة برضه
وكل رمضان وأنتي طيبة و بخير وبصحة وسعادة
وكل رمضان وأنتي إلي الله أقرب
وكل سنة وأنتي محققة اللي في بالك أن شاء الله
أما بخصوص الدراسة
فكل عام دراسي وربنا مقوينا عليه
تحياتي
ورمضان كريم
كل سنة وانتى طيبة ويارب تعرفى تعمليى كل اللى انتى عيزاه فيه
ومبروك على مرور عام على مدونتك الجميلة وعقبالى
والدراسة طبعا يع يع
هروح يوم الاتنين اول يوم كده اشوف الاخبار
كل رمضان و انتى طيبة و احب اقولك اللى ييجى على الغلابة مابيكسبش :d
أدعوكم للمشاركه وإبداء الرأئ في مسابقات الشعر وهي عباره عن خلق وصحابي ..ولا تنسوا
1-المشاركه
2-إيجابيتات
3-سلبيات
4_مقترحات
ربنا يقدرك وتحققي كل اللي تمنتيه قبل رمضان
وبالنسنة بقي للدراسة
طب تقولي ايه لناس اممتحاناتهم بقي في رمضان
ومش اي امتحانات
دي امتحانات البكارليوس
ههههههههههههههه
القوي فيه الاقوى منه فعلا
امتى الواحد بقى يخلص ويتحرر من الكلية ووجع القلب
-----------
المدونات دي انا شايف انها مش مجرد صفحات بنكتبها وخلاص
لاء ده كل مدونة انا بعتبرها انسان قائم بذاته
كل مدونة وراها روح شخص مع اننا مش بنشوفه ولا نعرفه شخصيا الا اننا بنشعر بانجذاب غريب تجاهه
وعلى فكرة مش كل مدونة الواحد بيدخلها بيحس فيها بالانجذاب ده
انا عن نفسي بتعامل مع المدونات زي ما بتعامل مع اصحابي واخواتي بالظبط
بعتبرهم اشخاص وبتكلم معاهم كأني شايفهم بالظبط
انا اسف ع الاطالة وكل سنة والكل بخير وسعادة وزيادة ايمان وطاعة ان شاء الله
انا بمسي التماسي اجدع تماسي لحسن قولو ان انا ناسي
كل رمضان وانتي في مشاريع
-وجه شرير جدا-
كل سنة وانت طيبة، ويارب رمضان الجاي يكون الحال أفضل.
السلام عليكم
كل عام وانتم بخير وإعاد الله عليكم الشهر الكريم بالخير واليمن والبركات
وجعل ايامكم كلها اعياد وافراح اللهم أمين
تحياتي
كل سنه وانتي بألف خير وانشاء الله السنه الجايه يبقى معاكي الشهاده الكبيره
اتمنى من الله انك تكوني من الموفقين ف رمضان
عيد سعيد
ربنا يوفقك في كليتك و في مدونتك و كل سنة و انت طيبة مرتين
و عقبال 100 سنة
عارفه اجمل حاجه في الكليه ايه
هي اللمه بعد المحاضرات وفي السكاشن قبل ما المعيدين يدخلو ولما بيبقى في مشاريع ونتلم كلنا في بيت حد عشان نرسم ونشغل منير ونديها نيسكافيه للصبح ونطلع الفجريه نفطر على اي عربية فول ومعانا الشيله والليله .. ونجري عالكليه عشان نسلم المشروع ونرجع البيت مقتولين ننام قد بتاع اسبوع
يااااه .. انا عايز ارجع الكليه تاني ماليش دعوه
والسلاموز ختاموووز
Post a Comment