Tuesday, October 24, 2006

العيد فرحة

طبعا أولا و قبل كل حاجة كل سنة و أنتوا طيبين ... رمضان خلص و اللى ما حققش اللى كان نفسه يعمله فيه قدامه اهه سنة كاملة قدامه يتمرن فيها علشان رمضان الجاى إن شاء الله يحقق اللى كان نفسه يحققه ... طبيعى و بديهى ان بعد رمضان بييجى العيد ... و على رأى صفاء أبو السعود العيد فرحة و أجمل فرحة يجمع شمل قريب و بعيد ... بس هل ده فعلا بقى حال العيد دلوقتى عندنا ؟ هل احنا دلوقتى بقينا بنفرح بالعيد زى زمان لما كنا صغيرين ؟ ... عن نفسى زمان تقريبا ليلة العيد دى ماكنتش بانام فيه من كتر حماسى لها .. و كان لبس العيد عندى شئ ضرورى .. و أحب جدا ألبسه و أنا رايحة أصلى العيد و باكون حسة ان الدنيا كلها بتبص على و على هدومى ... صلاة العيد عندى كانت شئ أساسى حتى لو معملتش حاجة غيرها فى العيد و فاكرة مرة لما مانزلتش أصلى علشان اخواتى الصغيرين كانوا نايمين و و الدنيا برد جدا قالوا لى خليكى انتى فى البيت ... بيتهيئلى انى انفجرت من العياط لما نزلوا ... فاكرة العيدية و انى ماكنتش باحسب لها حساب كنت بآخدها و بس ما بيكونش فى دماغى لا هاعمل بيه إيه و هى هتكون قد إيه .. لو جينا نشوف دلوقتى حالى بقى إيه .... أولا طبعا ماببقاش عايزة أنام مش لسبب غير انى عايزة أعد على النت ... لبس العيد ... و الله دى يمكن تكون تالت سنة مش باجيب فيها لبس للعيد ( سواء صغير أو كبير ) لانه مفيش وقت .. يمكن السنة دى النحس الحمد لله خف شوية و جبت كوتشى و شنطة ... العيدية .. باستناها و باعتمد عليها اعتماد كبير فى الميزانية اللى بقت على طول مخرمة و ربنا يخلى لنا الكلية الجميلة ... يمكن الحاجة الوحيدة اللى باحافظ عليها من حاجات العيد و مصممة عليها هى صلاة العيد حتى لو تعبانة لازم أصلى دى هى الشئ الوحيد اللى بيحسسنى ان العيد اهه جه .. و ياسلام لما بتكون فى مسجد بعيد و أصلى فى ساحة مش فى المسجد من جوة و اشوف جموع الناس و هى بتعيد على بعض و الناس بتوزع على بعضها تمر و شاى و شيكولاتة و بونبون و عصير و الهدايا على الأطفال ... باحس بالعيد فى هنا بس ...
لو جينا بقى انه بيجمع شمل قريب و بعيد ... بيتهيئلى ده ما بقاش موجود دلوقتى ... كل واحد ملهى فى حياته و شغله و بيبقى صعب التلاقى ( و خاصة لو محافظات مختلفة بقى ) .. تلاقى اللى عنده شغل مش عارف يوم إيه و مش هيقدر يسافر .. و اللى سافر هو و أسرته يقضوا العيد فى مش عارفة فين .. و العيلة قليل لما تتجمع .. بيتهيئلى اللى بيتجمع شمله هو أصدقاء العمل و الزملاء .. .بدليل ان لو أى حد بيشتغل فى الخاص هتلاقيه تقريبا من تالت يوم العيد و هو هيشتغل ... و ليه نروح بعيد .. أنا و أصحابى هنتجمع إن شاء الله .. بس لييييه ؟!!! علشان علينا بحث جماعى المفروض انه يتسلم بعد العيد فهنعد نعمله إن شاء الله غير الشغل الفردى اللى علينا
فى العيد بالذات بيبقى نفسى أوى أرجع صغيرة تانى .. و أرجع أحس بالعيد تانى .. و بأقول ربنا يستر علينا فى المستقبل ... إذا كنت كده دلوقتى و أنا لسة فى الكلية أمال إن شاء الله لما أشتغل بجد بجد و لو حصل انى اتجوزت و خلفت و بقى فى ناس مسئولة منى و الاجتماعيات اللى مش هاعرف أقضيها تزيد كمان و كمان ... هاعمل إيه ؟؟!!!! ... ربنا يستر علينا .. و ربنا يقوى أهالينا
و كل سنة و أنتوا طيبين

Friday, October 20, 2006

مثقفين

كتير من صاحباتى لما بنتقابل بيقولوا لى " اوعى تفتكرى اننا كده مثقفين ... عمر ماحد بيبقى مثقف من قرايته للقصص بس " و أنا يا ما أحاول أقنع فيهم يا جماعة الثقافة دى أنواع ... يمكن احنا لسة فى بداية الطريق لكن ما تقولوش اننا كده عمرنا ما هنبقى مثقفين ... الثقافة أنواع و احنا ممكن نبقى مثقفين فى مجال الأدب ... و على فكرة انا اكتشفت ان الواحد ما ينفعش يبقى مرة واحدة كده عارف فى كل حاجة و ان الحاجة بتيجى واحدة واحدة ... بمعنى انى زمان لما كنت باقرا لأحمد توفيق بس ... كانوا بيقولولى سيبك من الهيافة دى و اقرى حاجة عدلة .. و رغم اعتراضى أصلا انهم يوصفوه و حاجته بالهيافة ... إلا إن هو اللى خلانى اقرا الحاجات التانية و من غير إجبار ... هو اللى خلانى أحب اقرا لإحسان عبد القدوس و يبقى عندى شوق انى اقرا لعباس العقاد ... هو اللى خلى حبى للتاريخ يزداد و انى أحاول أفهمه .... هو اللى عرفنى بأوسكار وايلد و دستيوقسكى و بو و ستيفن كنج و جون جريشام و غيرهم ... هو اللى خلانى رغم انى مش باحب الشعر احب انى اقرا لأمل دنقل و صلاح جاهين و أحبهم ... هو اللى خلانى أعتز بنفسى مهما كانت مادمت مش باعمل حاجة ... المهم لإنى خرجت عن الموضوع الأصلى بكتير ... أنا قصدى من اللى قلته قبل كده ياريت ما نستهونش بنفسنا ... ياريت مش دايما اننا نسمع غيرنا بيقولولنا إيه فى النقد بتاعهم لينا ... لان المجتمع ده بقى غالبا نقده هادم بيحاول يهبط من الواحد و بس ... قليل أوى لما تلاقيه بيحب يديك دفعة لقدام .... و احنا كده بنحاول نبقى مثقفين و بنحاول نطور من نفسنا ... سيبكوا من أى حد بيحاول يهدم

Sunday, October 15, 2006

كلام كتير غير متصل بس بيودى لبعضه

كنت فاكرة انى أنا لوحدى اللى مجنونة و طقة ... بس حابسة جنانى ده جوايا ... بس الحمد لله ربنا بعتلى واحدة من السما ، بس الفرق بينى و بينها انى مجنة داخليا ... هى الحمد لله ما بتخبيش جنانها ... حتى البلوج بتاعها اسمه أنا حرة ( أى خدمة ادينى شهرتك اهه ) .... قريت موضوع هى كاتباه و حسيت بيه أوى و حبيت أسرق فكرته ... فيها إيه صحيح لو قلت و لا قالت ان الجواز و الشغل بالشهادة اللى واخدينها هو مش غايتنا الأساسية فى الحياة ؟ هو علشان أنا بنت يبقى لازم حياتى كلها نايمة صاحية قاعدة واقفة واكلة صايمة بافكر فى الجواز و الأمومة ؟ مين قال ؟ لو حصل فى السكة مفيش مشاكل ... مشكلتى الأساسية انه ماعدش فيه رجولة ( لا مؤاخذة يا ذكور ) .. طبعا أكيد لو ولد قرا الكلام ده هيهيج و يثور و مش بعيد انه يتهم انه ماعدش فيه أنوثة ... و انا مع اللى هيتهم ... فاضل بواقى أنوثة ممكن تسد ... لكن بواقى الرجولة استحالة تسد ... مش فاهمة ازاى ولد يقبل على نفسه ييجى الكلية بكت لونه روز كنا يا بنات هنتهبل عليه و نسأله جابه منين !!!... لما ولد يقف و يمشى بطريقة ما تعملهاش تحية كاريوكا أيام عزها .. يبقى قولوا عملنا إيه ببواقى الرجولة ؟ ممكن يكونوا فاضل كام راجل ما ماتوش فى الحرب موجودين ... بس الوصول ليهم شبه مستحيل .. يبقى على إيه أضيع حياتى و أنا بادور عليهم ... خلينى عايشة حياتى و لو حصل انى قابلت حد فى السكة يبقى مفيش مانع ... نرجع لموضوعنا الأصلى و نروح للنقطة التانية ...فيها إيه لو قلت انى عايزة آخد كورسات فى حاجات معينة و ما أشتغلش بشهادتى ( اللى إن شاء الله هآخدها ) مش معنى انى أخدت شهادة يبقى لازم إنى أشتغل بيها و خصوصا فى بلد مفيش حاجة فيها ماشية عدل .... قليلين اللى درسوا حاجة و نجحوا فيها زى أحمد زويل كده .. و اللى يدرس حاجة و يشتغل بيها يبقى لازم يكون بيحبها و إلا عمره ما هيوصل .. يوصل لإيه مش مهم دلوقتى .. المهم انه يوصل ... ازاى انجح فى حاجة انا مش حباها ... مش معنى ان الظروف خلتنى ادخل المجال ده فى الدراسة .. .يبقى معنى كده ان الدراسة تجبرنى و تحدد اتجاهى و شغلى .. ده مبدأ مرفوض حتى لو فعلا اتخرجت و اشتغلت بدراستى و شهادتى ... حاجات كتير أنا ناساياها دلوقتى ... بس مش ده المهم ... المهم هو فين مساحة الحرية اللى المفروض تكون موجودة لينا ؟ المشكلة ان احنا موجودين فى مجتمع من الصعب جدا عليه انه يغير أفكاره و معتقداته .. و لو حصل انه غيرها بيكون تحت تأثير ظرف قهرى و أمر واقع .... مش لازم عشان الأهل جربوا حاجة معينة و نفعت معاهم يبقى هى دى و مفيش غيرها ... لأ فى الدنيا حاجات كتير هم ما جربوهاش ... خلونا نجربها و ادينا تحت عنيكوا هنروح فين يعنى ! لكن ما ينفعش نمشى بنفس الخطى بتاعت السابقين و نقول ما هو ده الطريق ... فيه سكك تانية ماحدش راحلها سيبونا نجربها ... و طريق الرجوع مفتوح ماحدش قفله .. مادما ما بنعملش حاجة حرام ... يبقى أكيد ممكن أوى يكون معانا حق

لغتى العجيبة

كتير من اللى شافونى باتكلم فى الحقيقة بيستغربواو ساعات بيضحكوا و كتير اهلى بينهرونى انى اتكلم بالطريقة دى ... بس اعمل إيه إذا كنت أنا أصلا عايشة فى بلد ملخبط ... فيها إيه لما اتكلم كلام عربى و دخلت فيهم بتاع 4 أو 5 كلمات انجليزى ؟! الدنيا اتهدت ؟! فيها لما أتكلم و تلاقينى دخلت مرة واحدة لغة عربية فصحى و لا طلعت لسانى صح و انا بانطق الـ(ث) و الـ(ظ) و الـ(ذ) و لا حصل انى نطقت القاف فى كلمات متعودين ننطقها بالألف ؟! فيها إيه لو أنا باتكلم دخلت كلمتين بلدى فى كلامى ؟! فيها إيه لو قلت كام كلمة من كلام جيلى ؟! حصل حاجة ؟ مش كلامى مفهوم و الحمد لله مادمت مش باتكلم بانجليزية ديكنز و لا بفصحى معقدة و لا ببلدى خالتهم فرنسا و لا بروشنة كاريكا .... ليه الناس ممكن تقبل من مصريين زينا و زيهم بس كل الحكاية انهم اتربوا كام سنة فى أمريكا انهم يتكلموا مقاطع كاملة بالانجليزى و ما يقروش غير بالانجليزى ... و ييجوا عندى لما أقول كلمتين من نفسى ( و الله من غير قصد بس بيطلعوا كده ) و يقولوا انتى هتعمليهم علينا ما احنا عارفين ... ليه ما تسيبونيش اتكلم براحتى ماهى البلد كلها ماشية ملخبطة و لا جيتوا عندى و قلتوا لأ اتعدلى ... ليه كل جيل متمسك بالكلمات اللى كانت بتتقال فى عصره ... رغم برضه ان وقتهم الكلمات دى اتحاربت و كان وقتها بيقولوا الشباب باظ و فسد علشان طلعوا كلمات زى واو و كبر .... ياريت كل واحد يسيب التانى يتكلم زى ما هو عايز ... مادام كلامى مفهوم و مافيهوش حاجة حرام ... يبقى ماحدش له حاجة عندى
و السلام عليكم

اسمى و الإسلام

طبعا الإسلام جه و عمل حاجات كتيرة جدا و صلح حاجات كتيرة جدا و مفاهيم كانت كلها غلط فى غلط ... أنا مش دارسة و لا فاهمة أوى علشان أتكلم فيها .... هامسك جزء صغنون منها ألا و هو إصلاح النظرة الموجهة للمرأة ... و مش هاتكلم فيها عن قضايا كبيرة زى وأد البنات و كل الكلام ده ... لكن هاتكلم عن موضوع أنا حساه بجد و كل ما افتكره باحس إنى باحب الإسلام جدا فوق الوصف .... حكاية ان المرأة اسمها ما يتغيرش لما تتجوز و يبقى اسمها التانى على اسم جوزها... يمكن الموضوع ده مش كتير حسين بقيمته ... بس لو ركزنا فيه هنحس قد إيه الإسلام لما خلى المرأة تفضل باسمها التانى على طول و هو اسم أبوها .... انه قد إيه حافظ على كينونتها و على إنسانيتها ... انه ماخلهاش مجرد تابع للزوج .. و لو اتطلقت خلاص ترجع تانى لاسم باباها ... زى النظام اللى ماشى دلوقتى فى أمريكا و أورويا ... قد إيه باحبه انه بيأمرنا اننا نطيع أجوازنا و لكنه فى نفس الوقت يحافظ على ماهيتنا .... من أكتر الحاجات اللى بتخلينى أعتز انى بنت مسلمة .... إن إسلامى بيحافظ على مش بيخلينى مجرد تابع .. سامعة يا ست سوزان ... دى السيدة خديجة رضى الله عنها و كانت زوجة الرسول صلى الله عليه و سلم .. و كلنا عارفين ان اسمها خديجة بنت خويلد .... اتقى الله يا سوزان

Saturday, October 07, 2006

شباب عاوز الحرق


ثمة إجماع في وسائل الإعلام والأعمدة الصحفية على أننا رزقنا – من دون الأمم – بألعن جيل من الشباب الرقيع المنح الشهواني التافه.. (شباب عاوز الحرق) باختصار شديد.. نحن وكل جيلي سلبنا الشباب أحلامه، واحتللنا المناصب التي يمكن أن يطمح إليها، وحرمناه أبسط الحقوق التي يمارسها أي قط في زقاق: الملجأ والزواج، وأعطيناه سفينة غارقة نخرة امتلأت بالثقوب نُهب كل لوح خشب وكل مسمار فيها، وقلنا له إن عليه أن يتولى الإبحار بها بعدنا .. وينظر الشاب إلى البحر الذي يعج بالأساطيل وحاملات الطائرات التي صنعها الآخرون، فيتساءل: ماذا كنتم تفعلون طيلة هذا الوقت حينما كانت السفينة لكم ؟.. فنقول له: أنت شاب شهواني قليل الأدب .. وربما سافل كذلك .. مشكلتك هي أنك كسول تريد كل شيء بلا تعب .. نعم .. وسائل الإعلام تنظر بريبة واضحة إلى هؤلاء الأوغاد بشواربهم نصف النامية والحبوب في وجوههم وأصواتهم الخشنة .. وهي تتظاهر بحبهم وتقدم لهم الكثير من (نانسي عجرم) و(أليسا)، لأنهم ما زالوا الوسط الاستهلاكي الأفضل، لكنها تعتقد في قرارة نفسها إنهم خطر أمني داهم، وأنهم يدارون ذيولهم في سراويلهم .. المشكلة فعلاً أن الشباب لم يعد على ما يرام .. هذه الطاقة الكاسحة المعطلة التي حرمت الأمل والمشروع القومي المشترك تزداد خطرًا يومًا بعد يوم، والفراغ يهدد كل شيء وكل بيت .. لاحظ انتشار الكافتيريات وملاعب البلياردو ومقاهي السايبر.. باختصار: ثقافة البطالة. لاحظ نمو التطرف الديني الذي تزامن مع غياب المشروع القومي والأمل في الغد. ولغة (الروشنة) التي يستعملها الشباب تحوي في 90% من كلماتها معاني الاستهتار والتحدي .. دعك من الوقاحة التي يشكو منها كل مدرس .. يحكي الدكتور (جلال أمين) – العالم الوقور عظيم الشأن - عن شاب من هؤلاء دنا من سيارته وهو جالس فيها ينتظر زوجته، فاستند على النافذة بجواره، وراح يثني مرآة سيارته ويفتحها بلا توقف وبلا هدف واضح وعلى سبيل التحدي فقط، بينما ظل الأستاذ الكبير جالسًا في السيارة صامتًا يرقب هذا السلوك غير المفهوم.. لكننا نحن المسئولون بالكامل عن خلق هذا الوحش .. وكما يقول الشاعر العربي: إنا بأيدينا جرحنا قلبنا .. وبنا إلينا جاءت الآلام قرأت لأحد الصحفيين الكبار (الفلاسفة) – ولن أذكر أسماء لأن بلاط السجن سيكون باردًا جدًا في هذه الفترة من السنة - أنه كان في رحلة مع مجموعة من الشباب حينما سمعهم يغنون: الأقصر بلدنا بلد سواح .. فيها الأجانب تتسوح .. وكل عام وقت المرواح بتبقى مشتاقة تروح .. وتسيب بلدنا ! يتساءل الأستاذ العبقري: أين ذهب الانتماء لدى جيل الشباب ؟... ذهب يا سيدي الفاضل بسببك وسبب أمثالك، الذين أيدتم كل نظام حكم وكل سياسة، وعملتم جاهدين من أجل الوصول إلى الثراء والنفوذ صاعدين سلمًا من أجساد الشباب المطحون .. في عصر كانت الصحف المصرية ترسم فيه الزعماء العرب جالسين على (قصرية) أطفال، وفي عصر كان يعلن فيه في الصحف عن زيادة الأسعار فتكتب مقالاً كاملاً تؤيد فيه هذه الخطوة المباركة التي تأخرت كثيرًا، وحينما يضع السادات كل قوى مصر السياسية في السجن تكتب مباركًا (ثورة سبتمبر) هذه .. يؤمن الشباب بعبد الناصر فيخرج ألف كتاب يلعن عبد الناصر .. يحن الشباب إلى سعد زغلول فتمزقون سعد زغلول ..كل إنجازات يوليو تحولونها إلى كوارث يوليو .. تهللون للاشتراكية في عهد عبد الناصر ثم تلعنون أباها في عهد السادات .. وتلعنون أمريكا في عهد عبد الناصر وتكتشفون أنها الشريك الكامل الأمين في عهد السادات. ولولا بعض الحياء والخشية من النظام الحالي الذي يستمد شرعيته من أكتوبر لشككتم في حرب أكتوبر ذاتها : "المصريون لم يعبروا القناة في أكتوبر .. القناة هي التي تحركت إلى الغرب بضعة كيلومترات". في إحدى فترات الخلاف العابرة مع أمريكا قرأت مؤخرًا لصحفي كبير جدًا يقول: "علينا أن نشفى من خرافة أن 99% من أوراق الحل في يد أمريكا!". والحقيقة أنك يا سيدي كتبت هذه الخرافة مرارًا من قبل خاصة في عهد السادات ..من حسن حظ الشباب أنه لم يقرأ مقالاتك القديمة تلك وإلا لجن بالتأكيد.. تخرج وسائل الإعلام للقاء الشباب ومعها المذيعة التي سكبت زجاجة أكسجين كاملة على شعرها ووضعت طنًا من المساحيق كأنها إحدى بطلات مسرح الكابوكي الياباني.. تسأل الشاب عن اسم وزير (التوابع المضادة) أو وزير (التعاون الإعلامي التخطيطي) فلا يمن الله عليه بكلمة .. من ثم تخرج الصحف صارخة: الشباب تافه شهواني رقيع .. ليت الشباب يهتم بعقله كما يهتم بالدهان الذي يسكبه على شعره .. الحقيقة أن الإجابة عن هذا تكمن في كلمات (أورويل) في روايته الرائعة 1984 عندما دبت مشادة بين البطل وحبيبته حول (هل كان الحزب في حرب مع أيستاسيا أولاً أم كان في حرب مع إيوراسيا ؟)... يقول (أورويل) إن الفتاة لم تكترث بهذا على الإطلاق لأنها لا ترى فارقًا بين هراء وهراء آخر .. الشاب لم يختر وزير (التعاون الإعلامي التخطيطي) ولم يسمع عنه من قبل، ويوم يرحل هذا الوزير فلن يعرف أحد السبب .. إذن ما جدوى معرفة اسمه ؟.. لا فارق بين (هراء وهراء آخر).. اسمحوا للشاب أن يختار وزير (التعاون الإعلامي التخطيطي) ثم طالبوه بأن يعرف اسمه، وانصبوا له المشانق لو لم يعرفه .. نفس الشيء ينطبق على الأسئلة من طراز (متى مات بيلاطس البنطي ؟).. (ما طول نهر المسيسبي ؟).. (من مؤلف كتاب تثقيف الشعوب في تقنية الحاسوب ؟).. السيدة المذيعة لو انتزعوا منها البطاقة الأنيقة لن تعرف الإجابة، والسيد المعد لا يعرف الإجابة وأنا لا أعرف الإجابة، وليس مما يفيد الإنسان المعاصر أن يعرف طول نهر المسيسبي ما دامت هذه المعلومات موجودة في أية دائرة معارف .. إنها ثقافة (الكلمات المتقاطعة) التي يصرون على أنها هي الثقافة ولا شيء سواها، بينما الثقافة هي أن تستخدم ما تعرف في تكوين مفهوم متكامل للعالم من حولك وكيفية التفاعل معه .. لكن وسائل الإعلام لا ترضى بهذا .. هي لا تريد إلا أن ترى الدماء تسيل وتلطخ كل شيء .. لهذا تطالب برأس الشاب التافه.. بينما اسم آخر أغنية لراغب علامة أو عيد ميلاد روبي هي بالفعل معلومات تبدو مهمة للشاب .. على الأقل هو لا يُرغم على معرفتها، وتمس حياته – ورغباته – بشكل واضح .. ولا تتعالى عليه أو تعده بما لا يمكن تحقيقه .. ولا تهدم ما آمن به من قبل بلا مبرر.. والأهم أنها لا تسد عليه طريق الترقي والنمو في الحياة .. باختصار: (روبي) تبدو هي الشيء الوحيد الحقيقي وسط كل هذه الأوهام وكل هذا الكذب .. الشباب ليس مجموعة من الملائكة، لكنهم ليسوا شياطين ..سوف يصيرون كذلك لو لم نفق من غيبوبتنا، ونحن لسنا ملائكة ولا شياطين .. نحن ملاحون خائبون غرقت سفينتهم أو كادت .. وعلينا أن نترك قطعة خشب واحدة طافية ليتمسك بها من يأتون بعدنا.

*************************************
الله عليك يا د. أحمد ... مش هأقول انك قدوتى ... بس هأقول انك أنت اللى فاهمنا صح

Wednesday, October 04, 2006

متأكدين إن احنا بنى آدمين ؟

مش هاتكلم على المعاملة الجميلة اللى بيشوفها الشعب من حكومته يوميا ... لكنى هاتكلم عن المعاملة اللطيفة اللى بيلاقيها الطلبة بتوع كليتنا المعظمة من دكاترتها الأفاضل .... رغم انى شايفة ان أصلا لو البلد عاملت شعبها صح الكلية هتعاملنا صح .. بس يلا مش مهم هاعمل نفسى مش واخدة بالى و قال يعنى الدكاترة بس هم اللى بيعاملونا وحش ... حد هيقولى ما هو فى كل الدنيا كده .. هأقول لاااااااااااااا و ألف لاااااااااااااااااا ... دكاترة عمارة فى كل حتة تحس كده ان سيماهم على وجوههم ... داخلين علشان يعذبوا الطلبة ... مش فارقة بقى رجالة ستات محجبات أو لأ من الكلية و لا منتدبين ... مش فارقة ... كل واحد همه حاجته و بس ... و يطلبوا منك حاجات النهاردة علشان تطبق و تعملها و تروح توديها بكرة يقولوا لك احنا كنا بنقول اعملوها علشان نفسكوا مش علشاننا ... و النبى إيه .... لأ لطاف فعلا ... يدونا امتحان آخر السنة فى حاجة ما اخدناهاش ... علشا ييجوا أول السنة اللى بعدها يشرحوا الحاجة دى .... طيب ليه الظرف من الأول ؟! ... أكيد الكلية ليها يومين اجازة زى باقى الدنيا ... بس لاننا عمارة يبقى أكيد شوية شوية اليومين دول مش بيقعدوا فى البيت .. يا اما فى الكلية يا اما فى المواقع يا اما فى المكتبات ( ده لو كانت فاتحة أصلا ) ... و المطلوب اننا نتقبله بصدر رحب ... رمضان جه و المفروض ان الواحد يحاول يحسن من نفسه و من أخلاقه و يختم القرآن ( ما هى الشياطين متسلسلة ) ... بس دكاترة الكلية أحرار .. رمضان هننزل فيه الحسين علشان التصميم و الكنايس علشان التاريخ ... طيب و ربنا ... نعبده امتى ؟
مش طالبة الكتير ... طالبة اننا نتعامل كبنى آدمين أو حتى كآلات ... لإن حتى الآلات احنا بنكون رحيمين بيها و بنفصلها علشان تستريح .. افصلوا عنا الكهربا و لو يومين ربنا يهديكوا