مش فاكرة مين اللى مرة قال ان عمر الإنسان بيقاس بعدد الأحزان اللى مرت عليه ... مش حسانى ماشية أوى مع الكلمة دى ... باحس ان عمر الإنسن بيقاس بذكرياته .. حلوة بقى وحشة كل واحد و حظه و كمان شطارته
الذكريات
... ساعات باستلذ جدا انى اغرق فيها و اسرح بخيالى و افتكر لما كنت صغنونة لما أهلى افتكروننى تهت و قعدوا يدوروا على و انا فى الحقيقة كنت باتفسح مع جيران الهنا .. فاكرة توهان اخواتى مننا لما كانوا صغيرين و قد إيه كنا بنترعب عليهم ... فاكرة أختى الأصغر منى أول ما اتولدت و انى كنت عاملاها زى العروسة اللعبة بتاعتى ... كنت
باحب اعملها كل حاجة
فاكرة غيرتى من اخواتى الصغيرين لما كانوا بطبيعة انهم لسة مولودين بياخدوا الاهتمام بتاع مامتى منى .... فاكرة عملية اللوز و الآيس كريم الكتير اللى جالى و الكلام اللى انا قلته أول ما اخدت البنج ... فاكرة الهدية اللى جاتلى من بنت خالى ... فاكرة براءتى و أنا صغيرة ... فاكرة لما هربت من الحقنة و التطعيم و وقعت الميس فى المدرسة و مامتى فى بعض و فى الآخر برضه اخدت الحقنة
فاكرة أيامنا فى السعودية لما اخواتى كانوا بينزلوا يصلوا و يخلونى اتفرج على كابتن ماجد و ابقى احكيلهم عليها لما يطلعوا ... فاكرة باور رينجرز و سبل بايندرز و مازنجر .... فاكرة شقاوتى أنا و ابن خالتى زمان و للى بطلناها من زمان علشان هم على طول مش فى مصر بس الصور بتتكلم عن التشرد اللى كنا فيه
.... فاكرة شوية من أيامى فى اسكندرية و ذكرياتى فى بيت خالتى ... فاكرة المدرسة بتاعت اسكندرية و كرهى لها لانى ماكنتش عارفة أعمل أصحاب و فين و فين لما عرفت أعمل أصحاب ... فاكرة غيرتى لما واحدة غيرى هى اللى كانت عندها الجرأة و قامت تورينا حركات الوضوء ازاى ... فاكرة أول مرة أعرف ان الريال المصرى غير الريال السعودى و ان الريال دى عندنا يعنى 20 قرش
فاكرة خناقاتى الكتير فى ابتدائى و إعدادى .. خناقات الأطفال يعنى
أحب المدرسين بالنسبة لى كانوا
كان بيديه لنا مستر عبد العزيز science
كانت بتديه لنا ميس مديحة math
الدراسات كان بيديه لنا مستر محمد فؤاد
الإنجليزى كانت ميس أسماء
فاكرة يوم وفاة نانى الله يرحمها ( جدتى لأمى ) و قد إيه اليوم ده كان بؤس بالذات على أمى لانها فى بلد و نانى فى بلد تانى .. فاكرة يوم وفاة تيتة و فاكرة يوم وفاة خالتى و يوم ما اكتشفنا المرض بتاعها
فاكرة أيام مدرسة ثانوى و اللى كنا بنعمله فى المدرسين .. و بالذات مستر فواز و مستر أسامة ... فاكرة رحلتين دريم بارك اللى طلعلتهم اكنى طلعتهم امبارح ... فاكرة أيام ثانوية عامة و الحبس اللى اتحبستها فى الأوضة قبل امتحان العربى بحوالى 10 أيام لانى كانت أول فتحة لى للمنهج و كانت الأوضة محرمة على اخواتى و التكييف شغال فيها تقريبا 24 ساعة ... فاكرة يوم النتيجة و انهيارى لما عرفتها
فاكرة دخولى الكلية و كرهى لها من أول يوم ... فاكرة ازاى اتصاحبت على الناس الحلوة اللى اعرفهم دلوقتى ... فاكرة ايام و شهور ازمة عدت و غارت فى ستين داهية
تقريبا معظم الحاجات للى حصلت لى فاكراها
قبل كده كنت باخاف انزل من البيت علشان ما اتعرضش لتجارب و اتجرح ... دلوقتى اكتشفت ان أحلى حاجة هى الحركة و انى أعيش الحياة ... و إنى لازم أعيش يومى علشان أحسه النهاردة و افتكره بكرة علشان أعرف بعده ..علشان لما اكبر و أعجز الاقى عندى حياة عشتها مش ندمانة على أى قرار اخدته فيها
ممكن ساعتها أبقى اكتب مذكراتى و ماحدش هيقراها لانها ذكريات عادية جدا بالنسبة لأى حد معدى ... بس بالنسبة لى انا غالية جدا
كفاية انها ذكرياتى
و باحبها
حتى لو كان فى منها اللى يغم