Saturday, March 27, 2010

قرأت لنفسى : ربع جرام




الرواية أعتقد إنها بقت أكتر من نار على علم .. يعنى أول مرة أسمع عنها كانت فى معرض الكتاب 2009 .. لما رحت أشتريها فى معرض الكتاب 2010 لقيتها الطبعة الـ21 .. مما يعنى إنها أكثر من رائعة إنها تخلص 20 طبعة فى حوالى سنة على الرغم من ضخامة الرواية "أكثر من 600 صفحة" .. الرواية زى ما الناس أعتقد إنها عرفت رواية واقعية حول شاب مدمن وكيفية دخوله دايرة الإدمان وبعد كده نشوف إذا كان هيخرج منها ولا لأ ..

الرواية من وجهة نظرى المتواضعة كانت OVERRATED تماما .. ومتهيألى أنا لازم أدين بالشكر للرواية دى إنها عرفتنى معنى الكلمة دى .. الرواية معقولة مافيهاش تفاصيل مملة ولكن ... أسلوب الكاتب هو الى ممل بدرجة لا يصدقها عقل .. كمية التكرار يخليك عايز ترمى الرواية وتسيبها .. زائد أسلوب الرواية نفسه كان ركيك . كان محتاج تدريب على الرواية أكتر من كده علشان يعرف يمسك خيوطها كويس .. يعنى فجأة بنلاقى شخصيات ظهرت من العدم والبطل يعرفها من سنين يحصل معاها موقف قوى وبعدين يسكت ما يجيبش سيرته تانى لفترة طويلة لحد مثلا ما يموت ولا تيجى مصيبة تناخده فالبطل يعيش حالة حزن على صديقه واحنا المفروض نتعاطف معاه .. بس أبدا عمر ما الإحساس ده وصلنى .. ده غير إنك فى نص الرواية بتضيع ما بتبقاش عارف مين بيكلم مين ومين اللى بيقول الجملة دى .. حد فاكر السؤال بتاع القصة فى الإنجليزى أيام المدرسة "comment" ... السؤال ده لو جه على الرواية دى الطلبة كلهم هيسقطوا وماحدش عمره هيعرف يجاوب على السؤال ده

الرواية ماكنتش مملة ولكنها كانت محتاجة لكاتب آخر يتلافى ركاكة الأسلوب ... بالنسبة لى عايزة أقول لعصام يوسف بالرغم من كل عدد الطبعات دى .. هارد لك وحاول تدرب قلمك أكتر من كده

ملحوظة : علشان مابقاش ظالمة انا فعلا حسيت بصلاح جدا "بطل الرواية" لما كان فى قاع بئر الإدمان اللى كان فيه .. وكنت متأثرة لدرجة الضيق والخنقة فى الحياة والناس حواليا كانت بتحاول تسلينى وتضحكنى وهى ماتعرفش مالى .. كل ده بسببك يا صلاح :))

3 comments:

None said...

انا قريتها من حوالى سنه ومتهيألى انى عايز اقراها كل شويه ممتعه بالنسبالى لاقصى حد اول روايه كامله 600 صفحه اقراها فى يويمن بس

انا طبعا بحترم رايك ممكن تكونى درسه ادب وراويه لكنى مش دارس بس انا حسيتها بجد بغض النظر عن ركاكه الاسلوب وماشابه من

غلطات فى ووجهه نظرك
لكنى بجد شايف اناه اثرت فى ناس كتير والدليل نجاحها الكبير
انا فعلا فى ناس فى معهد سينما قوليلى نفس رايك انه ركيكه وفى عيوب فى الشكل الادبى لكنى كغير متخصص مش يهمنى كل ده يهمنى انا استمتعت ولا لا

على العموم مبروك عليكى الروايه فى المكتبه عند حضرتك
والاختلاف فى الراى لا يفسد للكومينت قضيه
:)

Known as PHYSCO said...

أنا كمان باحترم رأيك جدا .. لعلمك أنا مش دارسة أدب نهائى .. بس زى ما انت حسيتها رائعة أنا حسيتها الأحاسيس اللى أنا حسّاها دى .. اختلاف الرأى لا يفسد للرواية قضية ... وأكيد ناس كتيرة جدا مع رأيك وإلا كانت عمرها ما هتوصل لعدد الطبعات الكبير ده وعصام يوسف يتقدم فى البيت بيتك على إنه الكاتب الكبير المبدع

الله يبارك فيك .. وعقبال الرواية القادمة :))

معتز said...

للأسف لا أراها تستحق 21 طبعة ...
شعور الحكاية المسيطرة علي من يقرأها فقط يعطي إنطباع بأنها رواية جيدة ..
لكن يتضح الفارق مع أي مقارنة تعقد ..
أنصح حضرتك بقراءة تحفتي الأديب الشاب أحمد مراد والذي وضع بصمة لا تمحي في عالم الرواية خاصة أدب الجريمة ..
أسلوب رائع .. مشوق .. محكم .. لغة متقنة ..
أعتقد إنها ستنال إعجابك ..