Sunday, May 08, 2011

من أناشيد الإثم والبراءة






"ذلك هو الحب فى كلمة واحدة: التناسب .. تناسب النفوس والطبائع قبل تناسب الأجسام والأعمار والثقافات" 


د. مصطفى محمود

Monday, April 11, 2011

عن وودى آلن وآنى هول




بقالى فترة عايزة أتفرج على فيلم آنى هول بدافع حبى لديان كيتون، ومن كام يوم اتفرجت عليه بدافع حب أحمد لوودى آلن، اللى حصل إنى خرجت من الفيلم حبى لديان زايد ولسة إحساسى ناحية وودى آلن إنى مش قادرة أحبه، ولكن على مستوى الشخصيات العكس تماما، شخصية آنى بسذاجتها وسطحيتها فى بداية معرفتهم ممكن تفكرنى بنفسىوإن كان عمرى ما وصلت للمرحلة المتقدمة من التغيير دى اللى وصلت ليها فى آخر الفيلم، لكن أكيد اللى فكرنى بنفسى كان ألفى مش بس فى علاقته بآنى اللى كان فيها
ups & downs
كتيرة، لكن المبدأ نفسه فى شخصيته؛ حكاية إنه يكون عارف فى حاجة ويحبب حبايبه فيها وياخد بإيدهم لأول الطريق ويفاجأ بعدين ويحس بالغيرة لما يلاقيهم انطلقوا فى الطريق ده وسبقوه بمراحل وهو لسة واقف فى مكانه، إنه يشجعهم ويخليهم يفكروا بطريقة جديدة ويديهم شجاعة بس ماقدرش يديها لنفسه بإنه يتحرر من قيوده ومخاوفه، وفى الآخر ما بيقدرش يجاريهم ويفضل يتندم ويبص لحواليه ويسأل، هو إيه اللى حصل غلط وانا مش واخد بالى

الفيلم مش بطال وإن كان أكيد هيبقى جميل جدا لمحبى وودى آلن

Saturday, January 22, 2011

شالوم عليخم


عشان ماحدش يجرؤ إنه يقول إنى كسلت العادة دى من أولها .. 10 حاجات اتعلمتها أو اكتشفتها الأسبوع اللى فات 

الخضار المشوى بزيت الزيتون طعمه جميل جدا .. بس شرط إنه يتاكل وهو سخن وطازة

إنى طلعت باحب الفضة جدا 

إنى لازم دايما أدّفى رجلى فى الشتا  لإنها أول وأطول حاجة بتتجمد فىّ 

إن دايما الخروجات اللى أنا باخططلها بتفشل فشل ذريع، قررت ماأخططش لخروجة من تانى

إنه  -ويا للمفاجأة - الحاجات اللى اتعلمتها فى الكلية تساعدنى فى إنى أساعد حد محتاج يتعلم

إن العفو عند المقدرة شئ جميل، بس عمر اللى انكسر ما بيتصلح 

إن أديداس مش غالية أوى مقارنة بـأكتيف اللى برضه غالى بس حاجته مش حلوة وبرضه غالية

إنى عرفت سبب (آخر) بس مهم جدا فى حدوتة أنا ليه مش مستحملة الشغل 

إن السيكم طعمه أوحش بمراحل من البردقوش (العفركوش سابقا)

وأخيرا رقم 10 وأهم حاجة، إنى اتعلمت الأبجدية العبرية وبدأت أعرف اقراها :))