Tuesday, May 11, 2010

فى حاجة ماسّة للـ... حب




الحقيقة الغريبة بالنسبة لى إنى فعلا عمرى ما حبيت ... وأظن عمرى ما اتحبيت .. ومش لإنى مش باشوف ولاد أو لإنى مش رومانسية .. بس أنا فعلا ما حسيت ناحية حد بالحب ... اللى بيغيظنى لما حد يقولى بلاه أحسن وانتى كدة مستريحة .. طيب إيش عرف اللى بيقولى كده إنى فعلا كده مستريحة ؟ بيحاولوا يريحونى ؟؟ ياريت ما تحاولوش .. أنا كدة مش مستريحة .. أنا عايزة أحب .. وأتحب

اللى عارفاه كويس عن نفسى إنى ماباحاولش حتى إنى أدّى لنفسى أو للى قدامى فرصة إن حد فينا يحب التانى .. باقلب الموضوع تهريج وضحك وهزار .. يمكن ... لأ مش يمكن ده أكيد .. أكيد خوف .. أكيد رعب .. أكيد هلع من علاقة مجهولة لسة هتبدأ

برغم كل شئ .. أنا نفسى أوى أعيش حالة حب ... ولو مرة فى حياتى

4 comments:

Anonymous said...

انا عارفة ان الناس بتبقى حساسة تجاه التعليقات على مشاعرها الخاصة
فاتمنى متزعليش من تعليقى

انا مش عاجبنى حكاية نفسى ولو مرة فى حياتى اعيش حالة حب

انا كنت عمرى ما حبيت ووقتها كنت بتمنى انى لما احب يكون حب عمرى اللى هكمل معاه عمرى كله فى حب مش مجرد حالة حب مرة فى حياتى و تروح لحالها(ودى سهل تلاقيها وتدخليها على فكرة) واعيش بعدها بتعذب بذكراها

ولما قابلته وحبيته عرفت انه يستحق انتظاره جدا
وحبيته عشان هو الحد اللى عايزة اعيش معاه عمرى بكل تفاصيله واللى حابة جدا انى اعيش معاه كل تفاصيل حياته .. اللى هى بقت حياتنا سوا

مش صح نحب لمجرد اننا محتاجين للحب وعايزين نعيش حالة حب ومش مهم بعد كدا ايه

ولاء

Anonymous said...
This comment has been removed by a blog administrator.
Anonymous said...

ويارب تقابلى حب حياتك قريب جدا
وتعيشى اكبر من حالة الحب ان شاء الله

Known as PHYSCO said...

ولاء .. انتى بتقولى إنه سهل أدخل فى حالة حب .. أنا باقولك إنه بالنسبة لى صعب جدا جدا .. مش عارفة ليه .. إيه الغريب فىّ مش عارفة .. انتى بتقولى إنك بتحلمى إنه يكون حب حياتك اللى تكملى معاه .. وأنا كمان مافرقش عنك على فكرة .. الفكرة إنى باشكك فى قدرتى على إنى أعيش حالة الحب دى

ربنا يوفقك يا ولّ ويهنيكوا ويتمملكوا على خير إن شاء الله

ويارب :))