تانى مرة أكتب عن المترو وده رغم إنه سريع وآمن ومريح إلا إنه مش واخد شهرة كفاية، يعنى صعبان علىَ وسيلة مواصلات زى دى ما تخدَمش على الشعب المصرى كله، يعنى تخيلوا الكوميديا السوداء والمهزلة لما يكون بينى وبين اللى حواليا 1 مم وساعات توصل لـ2مم كاملين، منتهى البذخ فى استخدام موارد الدولة وعدم استغلالها الاستغلال الأمثل ... وعلشان أشجَع الناس على ركوب المواصلة دى هأقول 10 فوائد لركوب المترو على غيار الريق
1- إنه بيديك خبرة كبيرة جدا فى الحياة وفى التعامل مع أصناف البشر المختلفة والغير صالحة غير للهرش فى دماغها.
2-بيدرَب الأنف على التمميز بين الروائح المختلفة .. وكمان ما بين الطبيعى والصناعى، يعنى فى روايح عرق و"غازات طبيعية" وفى ريحة جاز وبرفانات هادية وقوية وشامبوهات إن وجد.
3-التدرب على السرعة الدائمة على العكس من حياتنا الرتيبة المملة، يعنى سرعة إخلاء وامتلاء العربيات فى محطات زى رمسيس والتحرير فى خلال ثوانى قليلة شئ بديع يستحق رؤيته إن لم يكن المشاركة فيه، وده الشئ اللى بيثبت إن المصرى قادر على إثبات وجوده دائما من أول بناء الأهرامات لغاية المترو.
4-بدلا من شيتوكال والكلام الفارغ ده المترو عنده الحل اليقين .. المفروض المشروع ده يتحول اسمه إلى "المواطن الورقة" ويتسجل براءة اختراع.
5-تعلم ألفاظ جديدة وأخلاق لن تتعلمها إلا فى المترو وبتستدعيها حياة البنى آدم المصرى، ولكت لا يمكن تعلمها غير فى المترو.
6-تفريغ شحنة الغضب عند المواطن قبل ما يروح الشغل.
7-لو شحنة الغضب ما خلصتش فى المترو هتبقى طول اليوم متنرفز وده هيخلى الكل مش عايز يقرب منك، الشئ اللى بيعملك هيبة برضه.
8- تعلم مبدأ الثواب والعقاب، يعنى اللى يتأخر ويعمل نفسه ابن ناس ومش عايز يركب المترو علشان زحمة ويستنى اللى بعده واللى بعده، هيلاقيه أزحم من اللى فات بس ساعتها هيضطر يركبه علشان ما يتأخرش عن الشغل، وبالرغم من كده برضه هيتأخر رغم إنه نازل بدرى، وده اللى بيعلمنا حكمة الرضا بالقضاء والقدر فى نفس الوقت.
9- عدم حرمان أى مواطن من خبرات معينة فى الحياة، يعنى اللى ما نزلش مظاهرات ولا كان وقت تجمع البنى آدمين فى العيد، ما يقلقش خاااالص هيعيش نفس الظروف فى المترو.
10-أهم حاجة إنك مش هتحس بالحاجات الوحشة اللى بيحس بيها بقية الناس اللى اسمها "القصور الذاتى" طبعا فى قلة قليلة مندسة بتقول إن ده سبب الزحمة وإنه كده حاجة مش حلوة، الجهلة ما يعرفوش إن ده أحلى ما فى الموضوع ... "تلاحم قوى الشعب المصرى".
برجاء اللى لسة ما ركبش المترو لغاية دلوقتى يركبه .. حرام مميزات كتيرة زى دى يتمتع بيها عدد قليل من الشعب.
4 comments:
زرتك النهاردة بالصدفة و لقيت نفس الصورة اللي حطيتها في موضوعي من يومين موجودة عندك فلو كانت الصورة من تصويرك و ليها حقوق ملكية يا ريت حضرتك تبلغني عشان اشيلها من عندي حفظا لحقوق الغير
-----------
انا على فكرة جيت الصورة من جوجل
و شكرا
شكرا لك
وحياك
www.gh-fnoon.com/vb
ههههههههه
بالنسبة للبشر فانا افتكر الاخ اللي سألني مرة هو حلوان من هنا قلتله أيوه فسألني و هو بيبص يمين و شمال : اللي جاي من هنا و لا من هنا ؟؟
بالنسبة للخبرات الحياتية أضيف عليها حاجة .. قصاد تفريغ الغضب فيه برده التدريب علي ضبط النفس و التحكم و السيطرة علي الاعصاب و المشي جنب الحيط مهما كانت الظروف .. بالذات في اوقات الخناق اللي بيحصل عالفاضية و المليانة و اللي ممكن يكون و را دماغك مباشرة و يتخلله كميات معتبرة من الالفاظ اياها و عمليات دفع و جذب و شد تمتد لكل الاشخاص في محيط العنصرين المتنازعين .. و الصبر هنا هو السلوك الوحيد الممكن حتي تنجلي الغمة و يستسلم طرفا النزاع الذي دائما ما ينتهي علي مفيش
بس مع دا كله للمترو سحر خاص بيتولد بالليل .. متهيالي الحياة في القاهرة كان ناقصها كتير قبله .. مش بس كوسيلة مواصلات لكن كمركز عجيب للسحر
تحياتي
موضوعك جميل ومميز يا آيات بالتوفيق وانا من كارهي مترو الانفاق لأشياء كثيره من ضمنها الى قولتيها ومن ضمنها انه بيعتبر فُسحه للمغتربين اقاربي لما يجو مصر بفسحهم ف المترو !!!
Post a Comment