دخلت فيلم جنينة الأسماك .. و اللى يسألنى عجبك هاقوله أعرف بس هو عايز يقول إيه و أنا على طول أقول إنه عجبنى .. يعنى فيه حاجات فهمتها بس فى المقابل حاجات أكتر وقعت منى .. قريت فى الدستور حوار مع باسم سمرة و هو بيقول اللى مافهمش الفيلم أنا مستعد أشرحه له .. أجيب منين أنا باسم دلوقتى؟
كنت عايزة أقول كلام كتير جدا مش فاكرة منه أى كلمة دلوقتى غير إنى متعاطفة جدا مع إسراء البنت اللى قبضوا عليها .. و مش عارفة يعنى الواحد يعمل إيه علشان يساعد فى إنها تخرج .. شفت جزء من برنامج الطبعة الأولى بتاع محمد المسلمانى .. محمد قال إنه جاله على البرنامج 30 عريس لإسراء .. بس هم يفرجوا عنها .. أنا مش عارفة أساسا الأخبار اتقطعت من ساعة ما عرفنا انها اتقبض عليها .. و بعدين يعنى أنا خايفة الناس تنام و تنسى
بمناسبة إسراء فيه دعوة لصيام يوم الخميس الجاى 17 ابريل و الدعوة ساعة الفطار على مبارك و الحكومة .. ادعوا يا جماعة و ما تستسهلوش .. اللى يقول الصيام لوحده و الدعا مش هيعملوا حاجة ما هو طبعا لوحدهم مش هيعملوا حاجة بس معنى كده إننا ما نصومش!!! .. فيها إيه لما يبقوا الاتنين مع بعض .. نعمل حاجة و يكون معانا ربنا بدعانا الدائم له .. طيب و اللى يقول ما هو احنا على طول بندعى .. بس ده شئ مختلف .. أولا دعوة الصائم عند إفطاره مستجابة و دعوة المظلوم مستجابة .. و مش معنى مستجابة إن أحنا هنصحى تانى يوم نلاقى مصر اتغيرت .. بس اهه ..
أنا احتمال كبير ماقدرش أدخل الفترة اللى جاية إلا زيارات سريعة عند الناس علشان اتطمن عليهم ( عاملة نفسى بقى داخلة على امتحانات و حركات :)) رغم إن احنا أساسا لسة امتحاناتنا ما اتحددش امتى و لا نتيجة الترم الأول طلعت بس عندنا تسليمات كتير أوى و الواحد مش عارف اى حاجة فى المنهج اللى عنده .. بس هانت كلها إن شاء الله ييجى شهر و نص و أخلص من العك ده .. أهم حاجة إنى وسط كل ده عندى إدمان المسلسلات القديمة .. باتفرج على المال و البنون و عايزة اتفرج على بنات الأصول و تقريبا عصر الحب هييجى بعد ما المال و البنون تخلص و اكتشت المصيبة السودا .. إن ذئاب الجبل بتيجى .. المسلسل ده عمرى ما شفته .. دايما باشوف منه حتت لا أكثر .. ربنا يسهل و أعرف أوفق بين المسلسلات و الشغل :)
أشوفكم على خير
بمناسبة المسلسلات القديمة ... حد يعرف مين اللى بيغنى ؟ " أنا شاكة إنه الحلو بس مش واثقة "
15 comments:
اسراء خدت افارج امبارح بضمان محل اقامتها
يعني علي ذمة القضية
ربنا يطلعهم منها كلهم علي خير
أولا بالنسبة لموضوع الفيلم اللي مش فهمتيه..متهيالي مش حاجة غريبة ..تلتربع الافلام اليومين دول نفس النظام......
وثانيا بالنسبة لموضوع اسراء....زي ما قال محمد هي خدت افراج..اما بالنسبة لحكاية الصيام دي...تمام حلو اوي نصوم..بس بلاش موضوع ندعي على حسني مبارك...اوعي تفهميني غلط!!مش حبا فيه ولا في حكومته..لأ خالص..بس عشان المفروض ندعيلهم مش ندعي عليهم...ده اللي هيرضي ربنا.....وبعدين الامام الشافعي قال لو كانت ليه دعوة واحدة مستجابة لكان دعاها للحاكم....
..أما بالنسبة للمذاكرة..شدي حيلك..متهيالي ماحدش تعبان في البلد دي غير نا وطلبة هندسة.....وباش مسلسلات...
أول زيارة لمدونتك الجميلة...تقبلي مروري
شدى حيلك فى الامتحانات.. ربنا يوفقك
تفتكري ان كل البنات هتعمل زي اسراء عشان يجلهم عريس؟
ههههههههههههههههه
تبقي مصيبة
الله يكون في عونك في الامتحانات والحاجات دي
وبالنسبة للمسلسل انتي قديمة قوي ليه كده
مش فاكر الصراحه مين
AYAT
بالنسبة للفيلم فأنا عارف إنه فيه مناطق غامضة لكن مش اللى ماتتفهمش يعنى
لكن الفيلم جامد جدااااا من هنا للصبح
وبجد زى ماقال باسم الناس مابقاش عندها ثقافة سينمائية
وربنا يوفقك ف الإمتحانات اللى لسّة مااتحددش ميعادها
بالنسبة لباسم
http://www.facebook.com/profile.php?id=1146112177&ref=ts
مفهمتيش الفيلم والله كويس طلعت مش انا لوحدى اللى مش بفهم بس انا لسه مشفتش الفيلم ادعيلى اخلص الامتحانات وانطلق بقي
على فكرة انا بحب بوستاتك جدا بحب يومياتك لذيذة
وربنا معانا كلنا فى الامتحانات
ازيك يا قطة
اسراء ضايعة يا ايات
مش لاقينها ، بعد ما أفرجوا عنها اختفت من كل الاقسام قبل ما يخلصوا الاجراءات
حاجة غريبة جدا
أو مش غريبة ، بس مدام هما عايزنها ، افرجوا عليها ليه
اولا انا قريت البوست ده اول مرة اليوم اللي المفروض كان فيه صيام وكمان قريته بعد المغرب بفترة فطبعا وضح اني مش شاركت بس دعيت برده
غلاسة
الحاجه التانيه السبب الوحيد اللي ممكن يخليني ادخل الفيلم ده هو هند صبري
ممثلة جامدة جدا بالنسبة ليا
الحاجه التالته كويس اوي اني عرفت منك ان ذئاب الجبل بتتذاع علشان انا كنت عايز اشوفها من زمان
الحاجه الرابعة ربنا يوفقك ف امتحاناتك وان شاء الله تاخد الشهادة ويبقى مكتوب ف البطاقه بدل طالبه كلمة حاصله على
الحاجة الخامسة زي كل مرة اجي هنا حاسس اني مش عارف ايه ولا ايه عاجبني
مدونتك زي القطار السريع اللي ف دريم بارك تخرجي منه دماغك ف رجلك وكل حاجه فيكي مقلوبة بس برده ترجعي تلعبيه تاني
تحفة
بالنسبة لجنينة الاسماك فانا ف نيتى
ادخله بعد امتحان الtranslation
معرفش اشمعنا يعنى
بس لو فهمت حاجة هابقى اقولك
وعموما باسم سمرة ساكن جمب خالتشى :) ممكن اجيب لك عنوانه ونروح كلنا مع بعض ويشرح لنا الفيلم
..
.
مقدمة ونهاية المسلسل لمحمد الحلو اكيد اكيد يعنى
..
ربنا معاكى ف الامتحانات ويكرمك
ادعيلنا معاكى بقى احسن انا محتاسة
محمد .. ميرسى جدا على التوضيح .. و طبعا خلاص التطورات كلها حصلت
***********************
دواير .. الفيلم كان فيه أكتر مننقطة مش فاهماها يمكن زى ما بتقولى أغلب أفلام دلوقتى مش بتتفهم بس فيه فرق بين فيلم معمول كده بعبط و فيلم فعلا بيقول حاجة بس أنا اللى مخى مش قادر يوصله بالنسبة لإسراء فخلاص و بالنسبة للصوم فأنا كنت مقتنعة جدا بالحكاية و بإننا ندعى عليهم مش ليهم .. كفاية دعا لهم بقى .. بس أنا أساسا ما صمتش لإن يومها جالى برد .. و ربنا يسهل إن شاء الله و اللى بيتعبوا احنا وا نتوا و بتوع علوم كمان .. ربنا معانا كلنا إن شاء الله
عمرو .. ميرسى للدعوة دى
**********************************
مهند .. تفتكر .. وبلطريقة دى نحل أزمة العنوسة فى البلد .. إن شاء الله ربنا معانا كلنا رغم إنك خلاص مخلص
و باحب المسلسلات القديمة لإنها أحلى كدراما و أقصر كعدد حلقات
محمد صبحى .. أنا عارفة إن مخى صغير و إن ماعنديش ثقافة سينمائية علشان كده قلت إنى مش فاهماه علشان حد يفهمنى و أنا كنت فعلا عايزة أفهم .. بس الحمد لله محمد ياسر قام بالواجب :)
*********************************
عمرو .. شكراعلى صفحة باسم
ياسمين لأ من الناحية دى ما تقلقيش خالص أنا أكتر واحدة فى الدنيا مش بتفهم فى الرموز و الكلام ده عايزة تحسى إنك عبقرية تعالى اعدى معايا شوية :)
و ميرسى يا جميل ربنا معانا إن شاء الله
*********************************
سلمى .. خلاص كل حاجة حصلت و واأسفاه
حاتم .. أنا كمان ما صمتش لإنى كنت تعبانة جدا فمش مهم بقى .. و انا دلخت الفيلم علشان خاطر يسرى نصر الله و ناصر عبد الرحمن .. قلت أشوف لما يجتمعوا هيعملوا إيه .. على فكرة هند صبرى كانت غير هند صبرى فى الفيلم ده
ذئاب الجبل فعلا من أحلى المسلسلات و اديه خلاص خلص ... بيتهيئلى كل مسلسلات أحمد عبد العزيز حلوة أوى
كمان ربنا يسمع منك أنا لسة فاضلى سنة قول يارب نخلص بسرعة بقى
آخر حاجة بقى عجبنى جدا تعليقك على البلوج .. بسطنى أوى و أول حد يقولى الكلام بالطريقة دى .. مش لاقية غير شكرا بجد
********************************
يوتا ادخلى الفيلم و ابقى تعالى كملى على شرح محمد .. أو نروح لباسم مع بعض .. ده أحسن حل لما يفتحلى الباب اقوله انا جاهلة حضرتك فهمنى الفيلم
طيب الحمد لله أذنى لسة بخيرها و قدرت أميز صوته لحسن أنا بدأت أتحول لبطيخ
ربنا يكرمنا كلنا يارب و يارب تخلصوا بقى على خير
Post a Comment