هارى بوتر و فيلم و يوم

و انتهى هارى بوتر .. مش قادرة أصدق إنه خلاص خلص .. اللى ما يعرفش هارى بوتر دى رواية مسلسلة لصاحبتها البريطانية ج.ك.رولينج .. عن عالم سحرى غير مرئى للبشر العامة اللى هو احنا و عن سيد الظلام و هارى بوتر الولد الذى نجا .. المهم إنها قصة خيالية جدا و لكنها حققت اعلى مبيعات على مستوى العالم و ترجمت للغات كتير .. القصة أساسا 7 أجزاء أخيرا نزل الجزء السابع منه ا.. و اتعمل منها 5 أفلام ... المهم بقى إن الجزء السابع نزل فى معرض الكتاب و كنت متخوفة من قرايته و فعلا قرايتى له كانت بطيئة جدا رغم أحداثه اللى كانت حلوة جدا .. بس كنت مش عايزاها تخلص أبدا ... الجزء السابع للى متابع حلو جدا أحداثه سريعة و مش ممل ده غير طبعا رون و هرمونى و اللى بيعملوه .. باحبهم مليون مرة عن هارى بوتر .. كمية الناس اللى ماتت فى الجزء السابع رهيبة .. يعنى لولا إنى كنت باقراها فى الكلية كان زمانى عيطت .. ... عيطت فى البيت على حد مات .. ماكنتش متخيلة إنى هاعيط عليه هو بالذات .. نيجى بقى للخاتمة بتاعت الأجزاء ... فى نظرى .. كانت واقعة جدا و حسيت إن نبيل فاروق هو اللى كان بيكتب و بعدين ست الحاجة اتفرجت على فيلم عربى قديم و كتبت آخر مشهد .. خنقنى جدا .. كنت مستنية حاجة أعلى من كده ... بس فى المجمل الجزء كان حلو جدا .. و مش قادرة أصدق إن خلاص كده مفيش هارى بوتر تانى

على فكرة ج.ك.رولينج بقت من أشهر الناس فى العالم و أغناهم

.

******************************************************

If Only ... مها صاحبتى اديتهونى .. ده فيلم من بطولة جنيفير لوف هويت و اللى ما شفتلهاش غير تمثيلية ghost whisperer بتيجى على mbc4 .. البنت عجبتنى و قلت ابقى اتفرجلها على حاجات تانية .. فلقيت مها بتدينى الفيلم ده .. الفيلم حلو و البطل اللى معاها جامد جدا .. شكله كده بريطانى و مش معروف .. بس إيه فظييييييع ... المهم مش هاحرق الفيلم بس هو حلو .. يعنى مش جامد و مش سئ .. من النوع اللى تخرج منه و انت إلى حد كبير مبسوط و مرضى و مش متضايق .. الفيلم باختصار بيحكى عن راجل بريطانى بيحب فتاة أمريكية و هم عايشين مع بعض فى لندن .. هو شغله رقم واحد فى حياته و فى يوم معين بيحصل فيه حاجات سيئة و يصحى تانى يوم يلاقى نفس اليوم اللى قبله بيتكرر مع اختلاف فى التفاصيل بس المبدأ واحد .. فيعرف ساعتها إن اللى بيحصله ده عبارة عن هدية علشان يعوض حاجات كتير ... ده اختصار مبتذل للفيلم بس ماحبيتش أحرق حاجة

.

اللى بيضايقنى بقى منى جدا ... إنى بابقى عارفة اللى هيحصل بعد كده و خاصة لو فيلم درامى أو رومانسى .. بابقى عارفة جدا اللى هيحصل فى الآخر و واثقة منه .. ماحصلش عكس كده غير فى كام فيلم يتعدوا على الإيد .. و دى حاجة باكرهنى فيها جدا .. مش بابقى عارفة اساتمع بالفيلم زى باقى الخلق اللى حواليا اللى بيقولوا ما توقعناش كذا .. بابقى باحقد عليهم جدا .. ازاى ما توقعوش كده اشمعنى أنا لوحدى اللى اتعذب ... يلا بقى قدرى ... حاجة تزهق

******************************************************

يوم الأربع كان عندنا presentation فى الكلية .. و دينا و رانا اللى معايا فى الجزء اللى كنا المفروض نعمله قالوا مش هيروحوا .. قلت أروح أنا و أمرى لله بدل ما باقى الجروب يتضايق مننا ... نزلت الصبح بدرى عن الميعاد المعتاد لنزولى علشان أركب الأوتوبيس المكيف و ساعتها افتكرت شيماء لما كتبت التدوينة بتاعت يارب ييجى .. وقفت نص ساعة و ماجاش قلت خلاص بقى أركب لرمسيس و من رمسيس آخد تاكسى .. و هو اللى حصل وقفت التاكسى و قلتله زمالك قالى ماشى بس هآخد 5 جنيه .. قلتله ماشى أنا كنت متأخرة على المحاضرة .. لما وصلنا اديتله 10 جنيه و بافتح الباب أخدت بالى انه حط الفلوس بسرعة فى جيبه و بعدين بصيتله لما لقيته بيقولى إيه ده وماسك فى إيده نص جنيه .. بقوله و انا ايش عرفنى . بيقولى إيه ده؟! اعمل بيه إيه ؟؟!!! ... قلتله أنا مدية لحضرتك 10 جنيه .. قالى برضه أعمل إيه بده ؟؟ قلتله و انا مالى انا مدية لحضرتك 10 جنيه .. قالى طيب و قام رامى النص جنيه و ادانى الفلوس قمت رزعت الباب و مشيت بعد ما بعدت شوية لقيت الجزمة مدينى 4.5 بس مش 5 و الله ما انا مسامحاه فيهم .. و حاجة غاظتنى جدا فى نفسى إنى و انا متضايقة من الراجل و بازعق كنت باقوله حضرتك .. إيه الأدب اللى على كبر ده مش عارفة

.

ما علينا .. لما رحت الكلية اكتشفت إنى أنا اول واحدة هاعمل presentaion فى الدفعة كلها و الدكاترة طبعا زنقونى باسئلة سخيفة بس الحمد لله عدت على خير ... لما جيت مروحة بقى مها قالتلى تعالى ناخدها مشى لعبد المنعم رياض .. مشنا لغاية هناك و وقفنا بتاع نص ساعة مش عارفين نركب ميكروباص ... ناس كتير جدا و الرجالة طبعا بتجرى و تاخد البنات و الستات فى رجليها .. لاحظت المرة إن عدد البنات كان أكتر من كل مرة .. و فى الزحمة لقيت بنت ماشفتهاش بقالى 6 سنين تقريبا .. المهم الحمد لهل عرفنا نركبها و فضلت أنا و مها واقفين .. شوية و لقيت المكيف بجلالة قدره واقف فى المحطة جرينا عليه اكنه المنقذ و بعد ما قعدنا فيه 10 دقايق السواق قالنا ده بايظ و مش طالع ... طبعا ما اتضايقناش لإن ده حظنا الطبيعى .. فضلنا نضحك و رجعنا تانى للميكروباص فقابنا 2 سواقين قالوا لتا مدينة نصر قلنا آه .. قالوا اقفوا مع البنات اللى هناك دول .. شوية و لقيناهم جابوا كمان 3 ستات .. طبعا أنا و مها قعدنا نتريق و دول بيجمعونا علشان يخطفونا و كلام كده ... المهم جه ميكروباص أولانى و اتملى و جه التانى و اتملى و جه التالت فالسواقين شاوروا للسواق اللى فيه انه ييجى علينا على طول و احنا ركبنا قدام جنب السواق و سبنا الستات تزق بعضها ورا .. فالرجالة طبعا لاحظوا حركة الخيانة فجريوا علشان يركبوا و يزقوا فى الستات و الستات تزق فيهم و السواق اللى محرضنا عمال يقولهم " قولو انكوا شركة قولوا انكوا شركة " فالستات اكنهم ماكينات تسجيل قعدوا يقولوا شركة شركة ... و الميكروباص اتملى على آخره فراجل قام قايل :" إيد ده بقى ميكروباص سيدات " ساعتها كان نفسى أوى انزل اضربه ... ما هو عدى من قدامه فوق ال 7 ميكروباصات رجالى بس .. ماحدش نطق يعنى ... جته الغم .. بس صعبت على بنوتة فضلت واقفة لوحدها ما عرفتش تركب .. أساسا ورا بدل ما يركب 12 كانت راكبة 14 .. بس الحمد لله أنا و مها ناصحين و قعدنا قدام .. السواق مشى بسرعة من الموقف و هو بيسألنا انتوا لقيتوا بعض ازاى و لا انتوا فعلا شركة ؟ ... قلنا له لأ دول زميالك هم اللى جمعونا :]

.

.

رغيت كتير أوى .. بس أصلى مكتئبة من الدراسة و قلت الرغى فى البلوج هو اللى ممكن يفك عنى ... لعل و عسى .. ربنا يسهل