Tuesday, October 24, 2006

العيد فرحة

طبعا أولا و قبل كل حاجة كل سنة و أنتوا طيبين ... رمضان خلص و اللى ما حققش اللى كان نفسه يعمله فيه قدامه اهه سنة كاملة قدامه يتمرن فيها علشان رمضان الجاى إن شاء الله يحقق اللى كان نفسه يحققه ... طبيعى و بديهى ان بعد رمضان بييجى العيد ... و على رأى صفاء أبو السعود العيد فرحة و أجمل فرحة يجمع شمل قريب و بعيد ... بس هل ده فعلا بقى حال العيد دلوقتى عندنا ؟ هل احنا دلوقتى بقينا بنفرح بالعيد زى زمان لما كنا صغيرين ؟ ... عن نفسى زمان تقريبا ليلة العيد دى ماكنتش بانام فيه من كتر حماسى لها .. و كان لبس العيد عندى شئ ضرورى .. و أحب جدا ألبسه و أنا رايحة أصلى العيد و باكون حسة ان الدنيا كلها بتبص على و على هدومى ... صلاة العيد عندى كانت شئ أساسى حتى لو معملتش حاجة غيرها فى العيد و فاكرة مرة لما مانزلتش أصلى علشان اخواتى الصغيرين كانوا نايمين و و الدنيا برد جدا قالوا لى خليكى انتى فى البيت ... بيتهيئلى انى انفجرت من العياط لما نزلوا ... فاكرة العيدية و انى ماكنتش باحسب لها حساب كنت بآخدها و بس ما بيكونش فى دماغى لا هاعمل بيه إيه و هى هتكون قد إيه .. لو جينا نشوف دلوقتى حالى بقى إيه .... أولا طبعا ماببقاش عايزة أنام مش لسبب غير انى عايزة أعد على النت ... لبس العيد ... و الله دى يمكن تكون تالت سنة مش باجيب فيها لبس للعيد ( سواء صغير أو كبير ) لانه مفيش وقت .. يمكن السنة دى النحس الحمد لله خف شوية و جبت كوتشى و شنطة ... العيدية .. باستناها و باعتمد عليها اعتماد كبير فى الميزانية اللى بقت على طول مخرمة و ربنا يخلى لنا الكلية الجميلة ... يمكن الحاجة الوحيدة اللى باحافظ عليها من حاجات العيد و مصممة عليها هى صلاة العيد حتى لو تعبانة لازم أصلى دى هى الشئ الوحيد اللى بيحسسنى ان العيد اهه جه .. و ياسلام لما بتكون فى مسجد بعيد و أصلى فى ساحة مش فى المسجد من جوة و اشوف جموع الناس و هى بتعيد على بعض و الناس بتوزع على بعضها تمر و شاى و شيكولاتة و بونبون و عصير و الهدايا على الأطفال ... باحس بالعيد فى هنا بس ...
لو جينا بقى انه بيجمع شمل قريب و بعيد ... بيتهيئلى ده ما بقاش موجود دلوقتى ... كل واحد ملهى فى حياته و شغله و بيبقى صعب التلاقى ( و خاصة لو محافظات مختلفة بقى ) .. تلاقى اللى عنده شغل مش عارف يوم إيه و مش هيقدر يسافر .. و اللى سافر هو و أسرته يقضوا العيد فى مش عارفة فين .. و العيلة قليل لما تتجمع .. بيتهيئلى اللى بيتجمع شمله هو أصدقاء العمل و الزملاء .. .بدليل ان لو أى حد بيشتغل فى الخاص هتلاقيه تقريبا من تالت يوم العيد و هو هيشتغل ... و ليه نروح بعيد .. أنا و أصحابى هنتجمع إن شاء الله .. بس لييييه ؟!!! علشان علينا بحث جماعى المفروض انه يتسلم بعد العيد فهنعد نعمله إن شاء الله غير الشغل الفردى اللى علينا
فى العيد بالذات بيبقى نفسى أوى أرجع صغيرة تانى .. و أرجع أحس بالعيد تانى .. و بأقول ربنا يستر علينا فى المستقبل ... إذا كنت كده دلوقتى و أنا لسة فى الكلية أمال إن شاء الله لما أشتغل بجد بجد و لو حصل انى اتجوزت و خلفت و بقى فى ناس مسئولة منى و الاجتماعيات اللى مش هاعرف أقضيها تزيد كمان و كمان ... هاعمل إيه ؟؟!!!! ... ربنا يستر علينا .. و ربنا يقوى أهالينا
و كل سنة و أنتوا طيبين

6 comments:

Yasmine Adel Fouad said...

العيد فرحة أغنيتى المفضلة
يمكن دى الحاجة اللى فضلت معايا من زمان لحد دلوقتى

أنا كمان صلاة العيد عندى هى العيد
أو بمعنى أصح اول مراسم العيد الحقيقية

أم العيدية فدى حاجة رغم انى مش ببقى متلهفة عليها زى و انا صغيرة
بس دلوقتى أهم عندى بمعنى انها بتنقذ موقف مالى

بس بالنسبة للتجمع العائلى فالحمد لله عندنا شغال

بس طبعا ده لايمنع ان العيد اختلف عن زمان
يعنى الواحد بقى اللى يبسطه مش الحاجات الصغيرة بتاعة زمان
يعنى مش بالونة هتفرحك بنفس القدر

بس انا شايفه ان برغم كل المنغصات الغير حميدة
الا اننا لازم نحاول نفرح

لو ما فرحناش فى العيد امال نفرح امتى
و كل واحد يشتغل على نفسه
يحاول يفرح نفسه و اللى حواليه

ده كفاية العيدية علشان تحسى ان للعيد طعم يا شيخه


يللا كل سنة و انتى طيبة قومى يا بت هاتيلك كام بالونه و انفخيهم و العبى بيهم ان شاء الله فى البيت

و هاتى بمبم و عيشى علشان لو كنتى زى حالاتى بتخافى من الصواريخ

admelmasry said...

كل سنه وانت طيب

Anonymous said...

M3aky 7a2 wlahy ya benty el3eed mb2ash far7a wla 7aga da lw 7sena beeh asln
bs 3la fekra lw e7na 3malna nafs el7gat elkona bn3mlha zman akeed hnfra7 beha
ya3ny e7na zman kona bnfra7 b elbloonat we elbomb we elswaree7'we lebs el3eed
ymken nas t2ol en el7gat deh mb2etsh tfra7na delw2ty bs dah 3'lat l2enha bgad btfr7na;
ya3ny e7na embare7 mslan elmfrood enna kona mtgma3een nsht3'al bs lma fr23na shwayet bomb zy ma kona bne3ml zman we sh3'alna "TOOT TOOT"
we 3malna atr so3'ntoot bgad fre7na gedan we ymken deh el7aga el bgad 7ssetna enna fe el3eed 7ta elkotche we elshnta el gebteehom akeed fra7ooky ya ayat
fa bgad ektshaft enna lw estmrena 3la elkona bne3mlo zman lma kona atfaal 7ta lw kant 7gat hayfa fa hya bgad htfra7na gedan
"we kol sana we ento taybeen gamee3an"

RANA
"zameela fe elkefa7"

سوكــا said...

قرينتي في الهم وحشتيني يامضروووووووبة

كلام في سرك انا مش قريت البوست اصل وقتي خلص اصلنا بقينا من ارباب السيابر بقي
فانا قلت اقولك كل سنة وانتي طيبة فين قلت اقلك هنا وبعدين ابقي ارجع اقري البوست ونتكلم فيه
مع ان شكله بوست غم بس يلا خير خير

كل سنة وانتي طيبة ياقمر والعيد الجاي ان شاء الله نكون اتقابلنا وشفنا بعض اما عندنا في اسكندرية او حتي انزلك القاهرة

Anonymous said...

انتى فين من يوم العيد يا بنتى


!!!!!!!!!!!!!!!!

منها لله هندسة واللى بتعمله فيكوو

ههههههههههههه

Known as PHYSCO said...

لإن غالبا النت عندى عبيط أو الكمبيوتر شخصيا هو اللى عبيط فأن هأرد كده و أمرى لله لانه مش بيبين مين اللى كاتب ... فأعتقد ان أول واحدة هى ياسمين ، آدم المصرى ، سوسكا و البت رانا صاحبتشى و الضيفة المجهولة .... شكرا ليكوا كلكوا مروركوا و آسفة على التأخير مشغوليات المضروبة كليتى ده غير انه غالبا كان فى مشكلة فى البلوج نفسه ... و انا فى العيد فعلا كنت فى يومين منهم كنت فرحانة جدا ... اليوم اللى قضيناه مع بعض يا رانا و كان معانا دينا و دينا ... رغم اننا قضيناه فى البيت قال يعنى بنعمل بحث لكنا شغلنا أغانى و فرقعنا بمب من البلكونة و طلبنا أوردر كوك دوور و اتكلمنا كتير ... انبسطت أوى ... و تانى يوم لما خرجت معاكى يا ياسمين و مع بقية الشلة و كان معايا اخواتى ... بجد أحلى يومين ... و ما انكرش انى انبسطت لما خرجت مع أهلى أول يوم و قعدنا على النيل ... الحمد لله باحاول انبسط و لازم انبسط فانسطت فعلا و الحمد لله ... ربنا ما يقطعلنا انبساط أبدا