كنت فاكرة انى أنا لوحدى اللى مجنونة و طقة ... بس حابسة جنانى ده جوايا ... بس الحمد لله ربنا بعتلى واحدة من السما ، بس الفرق بينى و بينها انى مجنة داخليا ... هى الحمد لله ما بتخبيش جنانها ... حتى البلوج بتاعها اسمه أنا حرة ( أى خدمة ادينى شهرتك اهه ) .... قريت موضوع هى كاتباه و حسيت بيه أوى و حبيت أسرق فكرته ... فيها إيه صحيح لو قلت و لا قالت ان الجواز و الشغل بالشهادة اللى واخدينها هو مش غايتنا الأساسية فى الحياة ؟ هو علشان أنا بنت يبقى لازم حياتى كلها نايمة صاحية قاعدة واقفة واكلة صايمة بافكر فى الجواز و الأمومة ؟ مين قال ؟ لو حصل فى السكة مفيش مشاكل ... مشكلتى الأساسية انه ماعدش فيه رجولة ( لا مؤاخذة يا ذكور ) .. طبعا أكيد لو ولد قرا الكلام ده هيهيج و يثور و مش بعيد انه يتهم انه ماعدش فيه أنوثة ... و انا مع اللى هيتهم ... فاضل بواقى أنوثة ممكن تسد ... لكن بواقى الرجولة استحالة تسد ... مش فاهمة ازاى ولد يقبل على نفسه ييجى الكلية بكت لونه روز كنا يا بنات هنتهبل عليه و نسأله جابه منين !!!... لما ولد يقف و يمشى بطريقة ما تعملهاش تحية كاريوكا أيام عزها .. يبقى قولوا عملنا إيه ببواقى الرجولة ؟ ممكن يكونوا فاضل كام راجل ما ماتوش فى الحرب موجودين ... بس الوصول ليهم شبه مستحيل .. يبقى على إيه أضيع حياتى و أنا بادور عليهم ... خلينى عايشة حياتى و لو حصل انى قابلت حد فى السكة يبقى مفيش مانع ... نرجع لموضوعنا الأصلى و نروح للنقطة التانية ...فيها إيه لو قلت انى عايزة آخد كورسات فى حاجات معينة و ما أشتغلش بشهادتى ( اللى إن شاء الله هآخدها ) مش معنى انى أخدت شهادة يبقى لازم إنى أشتغل بيها و خصوصا فى بلد مفيش حاجة فيها ماشية عدل .... قليلين اللى درسوا حاجة و نجحوا فيها زى أحمد زويل كده .. و اللى يدرس حاجة و يشتغل بيها يبقى لازم يكون بيحبها و إلا عمره ما هيوصل .. يوصل لإيه مش مهم دلوقتى .. المهم انه يوصل ... ازاى انجح فى حاجة انا مش حباها ... مش معنى ان الظروف خلتنى ادخل المجال ده فى الدراسة .. .يبقى معنى كده ان الدراسة تجبرنى و تحدد اتجاهى و شغلى .. ده مبدأ مرفوض حتى لو فعلا اتخرجت و اشتغلت بدراستى و شهادتى ... حاجات كتير أنا ناساياها دلوقتى ... بس مش ده المهم ... المهم هو فين مساحة الحرية اللى المفروض تكون موجودة لينا ؟ المشكلة ان احنا موجودين فى مجتمع من الصعب جدا عليه انه يغير أفكاره و معتقداته .. و لو حصل انه غيرها بيكون تحت تأثير ظرف قهرى و أمر واقع .... مش لازم عشان الأهل جربوا حاجة معينة و نفعت معاهم يبقى هى دى و مفيش غيرها ... لأ فى الدنيا حاجات كتير هم ما جربوهاش ... خلونا نجربها و ادينا تحت عنيكوا هنروح فين يعنى ! لكن ما ينفعش نمشى بنفس الخطى بتاعت السابقين و نقول ما هو ده الطريق ... فيه سكك تانية ماحدش راحلها سيبونا نجربها ... و طريق الرجوع مفتوح ماحدش قفله .. مادما ما بنعملش حاجة حرام ... يبقى أكيد ممكن أوى يكون معانا حق
7 comments:
ايه الحلاوة دى
اسمى مكتوب و فى المقدمة
بصى يا بنتى
احنا لو بس كنا أقوى سنة صغيرة ماكانش هيبقى فى مشكلة إطلاقا
لكن تربيتنا بتخليكى تفكرى مش قبل ما تقولى لا لكن قبل تنفيذك القرار
فى وسط مجتمع بيهبط الواحد من قبل ما يفكر يطلع لفوق .. لازم تكونى نفسك و بقوة . حتى لو فشلتى مش مشكلة أكيد اتعلمتى .فى الحب فى زمن الكوليرا كانت عمة البطلة بتقولها لما واحد اتقدملها للجواز و ماكانتش عارفة ترفض و للا تقبل
" قولى آه لو ندمتى مش مشكلة لكن لو قلتى لا هتفضلى ندمانة طول عمرك "
طبعا مع الفارق و مع ان الواحد مايرميش نفسه فى تهلكة أكيده
لكن القضية ان المخاطرة ربما كانت ناجحة مادام انتى مش بتضرى حد و لا فى ضرر بيّن عليكى و خصوصا انك مش بتغيرى حياتك تماما يعنى شهادتك موجودة مش هتموت و دراستك فى حاجه ثانوية ايا كانت مش مستديمة. لكن أقولك راى واحده بعتبرها امى الروحية هى كاتبة و مذيعة و ان كانت فى الأصل دكتورة فى الجامعة .. قالت ايه بقى .. اشتغلى بشهادتك الاول و بعدين دورى على كل اللى انتى عايزاه معاه فى نفس الوقت
علشان ماتخسريش كل حاجة
أنا رأيى انك تشتغلى فى مجالك بصفة تجريبية مع التنقيب فى جهات تانيه و بعدين لو كرهتى المجال سيبيه و ماتسمعيش كلام حد لو مش طايقاه اصل انا مش مؤمنة بان لم تعمل ما تحب فحب ما تعمل
العمل لازم علشان الاستقلال المادى الصراحة برضة بس الواحد لما يجرب الأول يبقى يقرر
بصى يا امى هقولك كلمة السر
لما يبقى معاكى قرشك محدش هيقولك بم
عايزة تشتغلى حاجه تانيه حابها و تاكلك عيش و ربنا هيسيبوكى
عايزة تدرسى ان شاء الله الرقص " ههههه " هيسيبوكى
علشان كده الشغل بشهادتك الأولى اعتبريه قاعدة عريضه هتثبتى بيها نفسك
رغى رغى رغى
انا ما بصدق باين
صحيح أول سبت بعد العيد ما تشغليش نفسك خالص و هفهمك بطريقتى
يمكن ارجع تانى
على فكرة حكاية مجنونه ما بقيتش تشغلنى
انا معايا شهادة بكده و محدش ليه فيا حاجه
بس ايه الرغى ده كله
مش وراكى لوحات و للا بتفشى غلك و للا ايه ؟
جيت تانى
بصى بخصوص الرجولة اللى بتقولى اختفت .. أنا معاكى ان مفيش حاجة اسمها بواقى رجولة . بس الحق يتقال ان الرجالة لسه موجودين . بس القضية مش كده عندى بالنسبه لى المشكلة انك تلاقى الانسان اللى يكون مناسب ليكى انتى تحديدا فكريا و روحا و فى نفس الوقت يحس انك مناسبة ليه و تكون الظروف بعد كده مناسبة هى كمان . لكن ممكن قوى تلاقى ناس كويسين قوى بس انتو بس اخوات او انتو بس اصحاب . او انتى معجبة بيه و هو لا أو العكس ... بس يوم ما تيجى الطوبة فى المعطوبة انسى كل الحسابات مابيبقالهاش لزمة و بتاخدى على دماغك .
بخصوص بقى موضوع الجواز فمحدش ليه عندك حاجة خالص خالص قوى و الحمد لله احنا ناس اهلها ما بيجروهومش على حاجة و لو ع الكلام اللى نفسه اطول هو اللى هيقدر يكمل للآخر هم اهلك عايزين ايه غير يفرحوا بيكى .. وانتى عايزة ايه غير تفرحى بنفسك بس كل واحد مفهومه عن الفرحة مختلف اثبتى انك عارفة توصلى لسعادتك اللى بتتكلمى عنها و محدش هيكلمك لكن ما تقعديش كده و هم هيسكتوا ..
أما بقى بخصوص موضوع الأمومة فأنا لو قلت رأيى هنا هتفرم من الولاد و البنات بس النظرية ان فى اعتقادى يوم ما تتجوزى ربما تلبى نداء الأمومة و تسعيله بنفسك .. لكن اعرف ناس دلوقتى لما بيشوفوا عيال صغيرين بيتهبلوا .. بنات يااه نفسهم يتجوزوا بس علشان يبقوا أمهات .. براحتهم احنا مالناش دعوة لكن كل واحد عنده دماغه يمكن تكونى فى نظر ناس مجنونة و ناس مش مقدرة النعمة و ناس عايزة الضرب و ناس و ناس المهم حضرتك كل ده كلام سابقى لأوانه خديها خطوة خطوة و هى عاملة زى بكرة الخيط كله هيجرك لبعضه
المهم بس يكون عندك الشجاعة و القدرة انك تحددى اول الطريق و تحطى رجلك عليه
و اسمعى للناس و احسبيها و بعدين قررى
عارفة حكاية انى اشتغل بشهادتى و جنيها اعمل اللى انا باحبه مش مرفوضة أوى ... بس متعبة جدا ... انا لما كنت باتدرب فى الصيف كان واحد معايا فى المكتب بيقولى انه بيموت فى المجال ده بس مش عايز يشتغل فيه لان الوسط اللى حواليه مش عاجبه و قرر انه يشتغل فى الجرافيك و بيعمل شخصية كارتونية و بيحلم ان الفيلم بتاعه يطلع و الناس كلها تشوفه ... و شغله فى المكتب كان كده بس علشان يلاقى الفلوس اللى يمول بيها مشروعه الكارتونى ... وعلى فكرة ده برضه اللى انا باعمله شوية رغم انى لسة فى مرحلة الدراسة .... فى الصيف بآخد كورسات تبع الدراسة .. لكن فى نفس الوقت بأقوى اللغة و باحاول أعمل حاجات تانية ... ممشية الاتنين خطين متوازيين ... و لما نشوف بعدين مين اللى هيكمل و مين اللى هيقف
حكاية بقى الرجولة و المش عارفة إيه ... أنا معاكى ... و رغم اقتناعى التام بوجود الحب ... إلا إنى كمان مقتنعة انى عمرى ما هالاقيه مش لسبب معين ... فعلشان كده الحدوتة دى مش فى دماغى أوى ...
شكرا لرغيك يا يوكا
أنا معاك فى كلام كتير من اللى انت قلته ... بس ماهو لو المجتمع سابنا فى حالنا نجرب ساعة لما ننجح هيهلل .. و لو وقعنا يبقى ساعتها يشمت فينا زى ما هو عايز ... بس يسيبونا نجرب مادام مفيش ضرر علينا
و على فكرة حتى البنات دلوقتى مش آلهة جمال و لا حاجة ... مفيش حاجة دلوقتى بقت زى زمان ... بس الجمال الخارجى لو راح مش هى دى القضية .. القضية لو الجمال اللى جوة كمان راح
أهلا بيك يا مصطفى .. و ابقى تعالى ارغى بكيفك
بصي بقى يا جميل
لو على الجنان اتجنني براحتك
اما كل اللي بتقوليه يا بنتي نصيحة مني
اعملي كل اللي في نفسك مادام مش غلط
دوسي
ما دام ماشية صح ما تخليش حد يحسسك انك غلط لمجرد انك واخدة سكة مختلفة
لاميا
و الله ساعات فعلا باكبر و أعمل اللى فى دماغى ... بس المشكلة الحقيقية فعلا انى مش باقدر ألغى المجتمع .. نفسى أمنعه من قولة عيب مادمت مش باعمل حاجة غلط
منورانى :D
Post a Comment