عشرة قروش .... دى الزيادة الفظيعة اللى حصلت لسعر تذكرة الأوتوبيس ... أو بمعنى أدق للمينى باصات الخضرا .... يعنى غير انهم فى منتهى الذكاء ... خلوا الجنيه المصرى يتحول إلى عملة معدنية ... يعنى بيقولوا له يا جنيه انت قيمتك قلت جدا ... تلاقيهم يرفعوا تمن التذكرة الـ 10 قروش دى .... طيب أصلا الناس هتجيب الـ 10 قروش دى منين ؟ ... فتلاقى الكل بيدى 25 قرش و السواق مش معاه أكيد 15 قرش تكفى العدد الهائل اللى بيركب معاه فى اليوم .... طبعا السواد الأعظم من الناس بيكبروا و مش بيسألوا على الباقى ... بس لو حد صمم انه ياخد الباقى فأكيد معاه حق ... و السواق برضه مظلوم لانه مش هو اللى بيحط القوانين ده مجرد منفذ لقوانين الحكومة الغبية ( الغبية تمشى على القوانين و على الحكومة ) ... و تحصل خناقة ما بين 2 واحد معاه حق و مظلوم و التانى مالوش ذنب و مظلوم و الدنيا تولع ... و على حسب بقى الناس اللى موجودة فى الأوتوبيس ... يا إما ناس مبقوقة من الحكومة و تيجى مع الراجل على السواق ... يا إما ناس مبقوقة من الحكومة برضه بس بتحاول تهدى الراجل ... و ما ينوبش الناس اللى موجودة غير حرقة الدم و ارتفاع الضغط و صداع و حاجات كتير ... كل ده بسبب 10 قروش فرضتها حكومة غبية
No comments:
Post a Comment