الفيل الأزرق

أحمد مراد .. متهيألى خلاص مش محتاج تعريف .. بالمختصر المخل هو روائى شاب كتب قبل كده فيرتيجو وتراب الماس .. وحاليا فى المكتبات روايته الجديدة الفيل الأزرق

طبعا تحمست جدا لقرايتها .. وازاى ماتحمسش وأنا اللى منبهرة جدا بتراب الماس .. استنيتها تنزل بفروغ الصبر واشتريتها امبارح من دار الشروق وبدأت قرايتها بالليل والنهاردة الصبح خلصتها .. رأيى إن أسلوب أحمد مراد بيتطور رواية عن رواية بشكل ملفت وجميل .. يعنى وانا باقراها كنت بافتكر الترجمة النضيفة الحلوة دى بتاعت أحمد خالد توفيق للروايات الأجنبى ..  الأسلوب مشوّق جدا وجميل ورائع .. لكن الرواية كرواية .. مش عارفة أقولها ازاى .. يعنى هى كانت مشوقة لدرجة تفوق الوصف وكانت شدانى لحد مثلا آخر 50 صفحة بدأت أحس إنى مش عايزة يكون هى دى النهاية بتاعت الرواية .. كنت أفضل نهاية تانية .. أو يمكن النهاية دى بس تكون محبوكة أكتر شوية .. تحت أنا هاحكى بتفاصيل فاللى مش عايز الرواية تتحرق عليه ياريت ما يقرهاش 
بى إس: الرواية دى حتى لو كان فيه حاجة فى آخرها ماكنتش مفضلاها اوى .. بس هى خلتنى أرجع اقرا تانى وأنا مستمتعة بكل حرف بعد ما قريت 500 كتاب ماكنوش بيعملولى حاجة غير إحباط وخنقة .. شكرا أحمد مراد :)

spoiler 

أولا فكرة إن الحكاية تطلع مس هى جديدة أنا ماقدرش أنكر .. بس أنا كنت عايزاها مرض نفسى أو حتى حاجة لعبية زى بريمال فير كده .. مش عارفة ده هل لإنى مش متقبلة حكاية المس دى ولا لإنها ماكنتش محبوكة حلو ؟ .. ده غير حاجات كتير ماشوفتش لها تفسير .. يعنى مثلا إيه اللى حصل لمايا وليه اللى حصل ليحيى كان بيحصله لما بياخد الحباية؟ .. وفى الآخر لما جت مرات المأمون وباست يحيى وإذ فجأة سنتين من حياته عدّوا من غير ما يحس بيهم .. ازاى نائل ده اتنقله عن طريق الست مش المفروض تكون موشومة؟ وازاى أصلا السنيتن عدّوا؟ .. وأنا عن نفسى مافهمتش ازاى الأرقام بتشتغل أصلا ؟ .. حكاية قتل سامح أنا مش شايفالها مبرر أصلا مهما شريف قال؟ .. وليه الكلب الأسود كان بيطارد يحيى من الأول، هل علشان شريف بعتله الجواب إيه؟ .. وحوار عم سيد الىل طلع مات من ساعة ما قطعوا شجرة الكافور؟ والموبايل اللى بيكلمه ؟

عامة الرواية عجبتنى وإن كان آخرها ضايقنى .. وده ما منعنيش إنى أحاول أتخيلها كفيلم :)

يحيى .. أحمد حلمى 

لبنى .. هند صبرى

شريف .. عمرو واكد

مأمون ..  خالد الصاوى

مايا .. بسمة

سامح .. محمد شاهين

الإخراج عمرو سلامة .. الموسيقى التصويرية عمرو إسماعيل .. وللأسف مش عارفة أحط مين سيناريست

صحيح أنا مش حسة إن الجروب الشغل لايق على بعضه بس حسة إن كل ممثل من دول لايق على الشخصية وهيعملها حلو :)

are you nuts? هل أنت بندق ؟

طول عمرى باحب أتفرج على أفلام أجنبى .. بدأتها طبعا بأفلام التليفزيون وبعدين لما اتنقلت للكمبيوتر كنت لازم أتفرج على الفيلم مترجم علشان أفهمه .. وكنت باشوف بقى بلاوى فى الترجمة عرفتنى إن المترجم تقريبا عمره ماكان على حق .. بس بقيت عامة من الناس اللى بتركز فى الترجمة وبتضايق لو الترجمة وحشة وشوية بشوية بدأت أحاول أستغنى عن الترجمة ويا أشوف الفيلم كده يا أشوفه بـ subtitle  إنجليزى .. وبعدين حصل وجود الدش فى حياتنا وبقيت عارفة أغلب قنوات الأفلام الأجنبى المجانية طبعا .. لما سيبت الشغل وكنت بادوّر على شغل تانى لقيت فى الوسيط إعلان عن حاجتهم لمترجمين أفلام لقناة أفلام فضائية .. طبعا الفكرة شعشعت فى دماغى ومين أحسن منى ينفع لشغلانة أيها الوغد وتبا لك وبحق السماء وكل الكلام الحلو ده اللى اتربينا عليه .. كلمت الرقم وعرفت إنها قناة top movies  .. طبعا كنت عارفة القناة كانت قناة من البدروم لو ينفع نقول كده .. أفلامها كلها كانت سيئة  من بتاعت الدرجة التالتة وبير السلم .. بس ماكنش عندى مانع بما إنى بابدأ كارير جديد يعنى .. المهم روحت المكان اللى كان بعيد جدا عنى .. واستنيت علشان نقابل المدير اللى هيقابلنا بتاع ساعتين وفى الآخر جه كان راجل ظريف وسألنى ليه عايزة أغيّر الكارير وبعدين قالى على المرتب اللى هاآخده لو حصل إنى اشتغلت معاهم "وكان مرتب حقير بس كالعادة ماقولتش لأ لإنى لسة بابدأ كارير" .. ودانى أوضة فيها كمبيوترات وادانى ورقة وقلم وفيلم وسماعات وكاختبار قالى ترجمى مش فاكرة 10 او 5 دقايق .. المهم إنى أفهم هم بيقولوا إيه أكتب كلمة وأسقّط عشرين .. فقلت للبنت اللى شغالة فى القناة مترجمة وقاعدة جنبى إنى مش عارفة أسمع حاجة ومش قادرة أفهم .. قالتلى خلاص نزلى subtitle إنجليزى وهو هيساعدك فى إنك تترجمى .. طبعا الطريقة دى كانت أسلس وأحسن مليون مرة ولما خلصت ترجمة نزلت للمدير وللولد المسئول عن الترجمة والحركات دى .. وريتهم الترجمة عجبتهم جدا بس قلتلهم إنى احتجت إنى أنزّل subtitle  .. ساعتها الولد المسئول ده وشه جاب ألوان ويا فرحتى ماهو أنا لو هاترجم بالطريقة دى يبقى أنا أقعد أترجم فى وقت فراغى بلاش نجيب حد من برة .. قلتله يعنى أنا بافهم لما بيتكلموا بالإنجليزى بتاعنا ده لكن فيه لهجات مش باقدر أفهمها .. فقالى آه مانا عارف وأصلا فيه معاهد متخصصة لتعليم اللهجات المختلفة وهم مش عارفة كام لهجة وأساميهم إيه ورغى كتير كده .. قلتله طيب إيه المشكلة لما اترجم كده ؟ .. وشه جاب ألوان تانى وازاى ومش عارف إيه ودى حاجة سهلة أعملها كده فى وقت الفراغ وكمان مش كل الأفلام بنلاقيلها subtitles .. كنت هأقوله علشان أفلامكوا هابطة بس سكت لإن المدير أصلا كان محترم معايا .. وسيبتهم ومشيت ... دلوقتى لما باتفرج على القناة مستوى الأفلام اتقدم جامد جدا ولكن الترجمة زبالة .. ويبقى السؤال .. إيه الفايدة لما باكون باترجم سماعى وتكون نتيجة الترجمة هل أنت بندق؟

نفسى فيها

نفسى فى هدية .. بس ببساطة كده أنا نفسى فى هدية .. مش عايزاها كبيرة ولا غالية .. بس عايزة بيها أعرف إن اللى قدامى ده أنا فى باله وإنه فاهم إيه اللى ممكن يسعدنى .. هدية كده من غير مناسبة .. صعبة دى ؟