Monday, September 24, 2012

كالعادة .. فراغ



عايزة أكتب .. مش لحاجة غير إنى زهقانة وهاطق .. والبوست بادئ على فراغ وغالبا هينتهى على نفس الفراغ إن مانتهاش بفراغ أكبر منه .. هاكتب اللى ييجى على دماغى وخلاص ويمكن اللى يساعدنى أكتر فى ده إن كده كده البلوج مهجور فهاكون أكنى باكلم نفسى وده أفضل كتير .. البوست الأخرانى لما باقراه دلوقتى شوية باتحسّر وشوية باتصبّر .. اللى حصل من وقتها لدلوقتى إنى قعدت ادرس خطط كتيرة أوى أوى أوى لحد ما بقيت حامل .. وحسيت ساعتها إنه نهاية الكون .. الحمل تعبنى وتاعبنى وأكيد هافضل بعد الولادة كده اهتمامى بالعيل وخلاص .. إذ فجأة حسيت إن حياتى بتنتهى .. وماحدش يفكر إنه يجرب يقولى مانتى اللى سيبتى الشغل .. أنا اصلا ماكنتش بنى آدم سوى وأنا فى الشغل ده .. بتجيلى إذ فجأة كده بقى حاجت إنى مش أستسلم للإحساس ده وإنى لازم أنمّى نفسى .. وإنى ماغرقش فى دوامة أنا حياتى بتنتهى لإنى غالبا مقتنعة إن الحياة بتنتهى بالإيحاء وبعدين بالاقتناع إن الإيحاء ده حقيقة لا مفر منها .. أول مرة جالى الإحساس ده قلت هاطبخ وأعمل حلويات .. بس نظرا لغممان النفس والوحم وكده بعدت مؤقتا عن الفكرة ... بادوّر فى الوسيط لقيت مطلوب مذيعة أطفال لراديو على النت .. أحمد شجعنى جدا جدا عليها وقدمت فيها وبدأت آخد كورسات وبعدين وقفنا علشان ظروف لأصحاب المحطة أصلا .. المشروع كله وقف .. وجعت تانى عايشة فى الفراغ العظيم .. باقرا؟ بدأت اقرا بس ممكن فى خلال يومين اقرا 5 حاجات وبعدين أوقف شهر مثلا .. مفيش حاجة بتشدنى  .. حاليا مثلا شغالة فى الكروشيه وشاددنى جدا .. مش إنه يبقى مشروع طبعا ولكن باعمل حاجات للبيبى ولو إيدى مشيت ممكن أعمل حاجات للكبار ليا ولأصحابى وكده .. ربنا يسهل يعنى .. الله أعلم الحكاية هتستمر قد إيه معايا .. بس أنا متوقعة إنها تنتهى سريعا ككل حاجة باهتم بيها فى حياتى .. ربنا يسهل .. بافكر أكتب كتير من الخزعبلات اللى مالهاش لزمة دى .. أعتقد إنها إلى حد بتساعدنى علشان ماتخنقش زيادة 

Sunday, March 18, 2012

الخروج من جنة الحكومة ... وما يتبعها








بعدما اتخرجت بـ 3 شهور "فنون جميلة - قسم عمارة" اشتغلت عن طريق الواسطة "أبناء العاملين" مهندسة تخطيط فى هيئة تابعة لوزارة الإسكان .. قضيت سنتين من اسوأ سنين عمرى .. يعنى لو غضّينا النظر عن أصحاب حقيقين عملتهم فى الهيئة .. فأنا فعليا وحرفيا ضيّعت سنتين مهمين جدا فى حياتى، أعتقد إن الكل عارف إن السنين القليلة اللى بعد التخرج بتكون الأهم فى تحديد المصير والمستقبل، وضاعوا منى فى مكان بيروقراطى بتتحكم فيه مديرة مستبدة بتكرهنى ومنعت عنى أى وسيلة لاكتساب خبرة فى المجال، الكل كان عارف كده وبسبب البيروقراطية لم يكن فى الإمكان تغيير الإدارة، وعلشان كده أكملت السنتين تحت رحمة من لا ترحم ، وعلشان كده قبلت إنى أفضل سنتين من غير خبرة ومن غير شغل حقيقى يساوى المرتب اللى بآخده، ولكن ساكتة لإنى فعلا كنت محتاجة المرتب، ومش هنضحك على بعض.

المهم فى أول فرصة حقيقية لىّ انتهزتها وبكامل قوتى أعلنت رفضى للوضع ده واعتمدت فى رفضى على أسباب من نوعية مش هالاحق على الجواز والشغل، أنا هاسكن فى العبور وشغلى فى وسط البلد ومش باعرف أسوق، أى أسباب قد يقبلها البعض من "المنطقيين" لكنها أسباب غير حقيقية بالمرة لإنى مستعدة إنى أروح الهرم بالمواصلات لو حاجة أنا فعلا باحبها .. لكن عند التكلم مع "المنطقيين" عليك أن تتكلم بأسبابهم .. المهم .. طبعا قرار زى ده أثار مامتى بشكل غير طبيعى .. وكانت بتحاول تثنينى عنه، مرة بالابتسام ومرات بالتهديد ، آخر مرة قالتلى أنا مش عارفة مين قارى عليكى "بمعنى آخر مين ساحرلك" .. ودى كانت زى ما بيقولوا القشة التى قسمت ظهر البعير .. كان رد فعلى عنيف إلى حد ما فبطلّت تكلمنى فى الموضوع.

الظريف فى الموضوع إن ناس كتيرة شايفانى فعلا اتجننت ولسة مقتنعين بمقولة "إن فاتك الميرى اتمرمغ فى ترابه"، مش عارفة ليه يعنى، إيه الرائع إن حد يفضل فى مكان مش مكانه فى العالم، ومع العلم يعنى برضه إن اللى عارفين القصة كوي أنا مش متثبتة فى الحكومة ولا حتى بعقد حكومى ، أنا كنت بعقد خاص متعاقد مع الحكومة، يعنى علشان أبقى يا حسرة دى سابت الحكومة كان هيبقى قدامى بتاعع 5 سنين تانيين قدام، ومش مضمونة ... واللى يعرف أكتر، يعرف إنى كنت اسمها مهندسة تخطيط، فعليا كنت سكرتيرة احتياطى، يعنى لما السكرتيرة بتغيب كنت أنا باحلّ محلها.. يا حلاوة، خمس سنين دراسة وتعب وتطليع فى الروح وفى الآخر سكرتيرة، وياريتنى سكرتيرة أساسية ولكنى سكرتيرة استبن.

بمناسبة الكلام عن السكرتارية، أفتكر كويس جدا إنى لما جيت أختار كلية كنت رافضة كلية هندسة بشكل قاطع وكنت عايزة أدخل آداب، بينما مامتى كانت رافضة آداب بشكل قاطع وكانت عايزانى أدخل هندسة، وكحل وسط وافقنا احنا الاتنين على فنون جميلة- 
عمارة، من ضمن أسبابها إنه ليه لأ لكلية آداب خلّت خالتى تكلمنى إنه كلية آداب وحشة وإنهم فى الآخر بيتخرجوا يشتغلوا سكرتارية، اللى هى الشغلانة اللى فى الآخر اشتغلتها ولكن تحت اسم مهندسة، واللى بالمناسبة برضه السكرتيرة اللى كنت باحل 
محلها لما بتغيب كانت متخرجة من تجارة، ولما سبت الشغل كل ما أكلم شركة طالبين فيها مترجمين أو مدرسين يقولولى "وظيفة السكرتيرة متاحة، تحبى تملى بياناتها ؟" .. وسلملى على كلية آداب.

كلمة أخيرة .. لولا لحظة ندمت فيها على دخولى الكلية دى، بالعكس إلى حد بأرجعلها حاجات كتيرة جدا باحبها فى شخصيتى، ومش ندمانة أبدا على إنى سبت لاشغل اللى كان بيستزفنى نفسيا وعاطفيا وبدنيا، وبادوّر على شغل، وباحاول ما ايأسش ، مانا 
أكيد مش فاشلة لدرجة إنى مش هاعرف أشتغل غير بواسطة، هاطوّر من نفسى، وأكيد فى الآخر يعنى هالاقى حاجة باحبها ولايقة عليا وأقدر أنجح فيها، بالرغم من أى حد.

Wednesday, August 10, 2011

بأمارة إيه









طيب يوم 28 يناير لما الشرطة انسحبت وفرضوا حظر التجوال والدبابات نزلت شوارع مصر والناس هللت وقالك ده الجيش نازل معانا زى تونس، مع إن تونس الدنيا فيها مش وردى كده بس مش مهم ما علينا اهه ده اللى حصل، قالوا بعد كده الجيش نازل يحمى المتظاهرين الكلام اللى تماما ماشوفناهوش يوم 2 فبراير اللى هو موقعة الجمل، قالك بعدين أصل الجيش ماعندوش أوامر يضرب فى المليان ورغم إن دى قلة أصل بس عملنا نفسنا مش واخدين بالنا وقال يعنى صدقنا الكلام ده ونفتكر إن ماجد بولس حالة استثنائية بينما ده اللى كان المفروض يحصل، يوم 11 فبراير واحنا ماشيين من مصر الجديدة للتحرير الناس حوالينا كلهم كانوا عمّالين يهتفوا " الجيش والشعب .. إيد واحدة" .. غصب عنى وعلشان الحالة اللى جوايا ولإنى كان نفسى أهتف أوى هتفت معاهم، ولإنى كان نفسى أهتف أوى هتفت بحاجة مش مقتنعة بيها، ولما كنت باسأل هو انتوا ليه واثقين فى المشير ماهو تربية مبارك وبقاله قد إيه فى منصبه فيكون الرد علىّ " لااااا إلا المشير، المشير ده حاجة تانية" ورغم اقتناعى التام إن ماحدش فى موقع قيادى فى فترة مبارك كان شريف إلا إنى كنت باسكت ... دلوقتى المفروض بقى لما آجى أكتب عن المجلس العسكرى ولا عن الجيش  أسكت ازاى ولا بأمارة إيه أنا بأمارة إيه أسكت؟؟ بأمارة كشوف العذرية اللى مش فاهمالها سبب، ولا بأمارة فض الميدان دايما بالعافية والضرب والاعتقال، ولا يمكن بأمارة المحاكمات العسكرية اللى بترمى الناس فى الحبس على طول، جايز جدا يكون بأمارة المعالمة القذرة اللى بيتعاملوا بيها مع الناس اللى بيعتقلوهم، بأمارة الهجوم على مسيرة وزارة الدفاع وتحريض الأهالى لضربهم فى العباسية، غالبا بأمارة الشهيد محمد محسن اللى اتضرب قدامهم وبأوامرهم ومات بعدها بكام يوم وجنازته كانت متحاصرة أكنها جنازة السفير الإسرائيلى، لأ لأ ده بأمارة الهجوم بالكلام على نجلاء بدير وطرد دينا عبد الفتاح، بأمارة الإشاعات اللى بيغرقونا بيها وتشويههم لصورة الثوار وتشويههم لحركات المعارضة، لازم يكون بأمارة ضرب الناس المعتصمين فى التحرير من أهالى الشهدا ومسانديهم فى نهار أول يوم رمضان وتشجيع الأهالى على ضربهم وسبّهم، أو جايز بالجرى ورا المتظاهرين بالليل فى اليوم اللى بعدها والقبض عليهم فى شوراع التحرير الجانبية، احتمال يعنى يكون برضه بضرب الناس بعد الفطار فى الكعكة الحجرية اللى فى التحرير فى أول جمعة فى رمضان، إيه اللى يمنع إنه يكون بأمارة إن الميدان دلوقتى محتل منهم وهم اللى بقوا معتصمين فيه، أو غالبا هيكون بأمارة الشباب والبنات اللى بيتجابوا من بيوتهم ويمتثلوا لمحاكمات عسكرية وللإفراج عنهم بيتطلب مبالغ بالآلاف ولتهم هبلة، خلاص أنا دلوقتى بقيت واثقة إنه أكيد أكيد أكيد .. بأمارة صوباع الفنجرى