بأفكر بصوت عالى أوى

رحت النهاردة أمسية د. إبراهيم الفقى اللى كانت فى قاعة المؤتمرات و كنت رحت قبلها بكام أسبوع كده مقدمة لمحاضرات زدنى بما إن العالم كله حواليا بيتكلم عليها و خصوصا كمان لما لقيت واحدة من أعز صاحباتى مهتمة بالموضوع و هتحضر و كدة ... قلت أروح أشوف إيه اللى بيحصل هناك ... إيه الموضوع اللى بيشغل فكر الناس ده

بصوا مبدئيا أنا مش ضدهم علشان ماحدش ييجى يقولى انتى بتكرهيهم و انتى ما بتفهميش حاجة و الكلام الحلو ده ... أنا أولا مش باقتنع أبدا بالكلام النظرى و خصوصا لما حد يديهولى لإنه عايز يدهولى .. يعنى بيديهولى فى كورس مدفوع التمن ... باحس ساعتها إنى باخد درس ... و لإنى أساسا معقدة من حكاية الدروس دى، دى نقطة ... نقطة تانية و بأقول مرة تانية إن بتوع التنية البشرية على راسى من فوق ... إن كلامهم مكرر و معروف أو على الأقل بالنسبة لى و مش هارسم لقى عليكوا إنى البنت الفظيعة اللى الكتاب مش بيفارق إيدها .. بس أنا فعلا مش كلمة قالها ما اعرقهاش اللهم إلا النموذجين بتاع الكفاح اللى قال عليهم ... يعنى لما اتكلم عن الجوع المرضى اللى بيسد الفراغ العاطفى طيب ما أنا قريت عنه فى قصة لإحسان عبد القدوس مش فاكرة بالظبط انهى مجموعة قصصية بس متأكدة إنى قريت عنه .. حكاية توريث العادات فينا ياما د.أحمد خالد توفيق و د.نبيل فاروق اتكلموا فيها .. و باقى الكلام بيتاخد من كلمتين من التليفزيون و البرامج الدينية على كام فيلم أجنبى على مانشيتات الجرايد لإنى مش باحب اقراها و على كمان عمرو خالد .... طيب أنا استفادتى إيه بقى ؟؟؟!! ده حتى حكاية حب نفسك و ما ترميش اللوم عليها واحد لسة قايلها لى من كام يوم و قالى اعتذرى لنفسك بجد و خليها تحاول تسامحك على اللى انتى عملتيه فيها و حاولى تصلحى من نفسك واحدة واحدة هياخد وقت و هياخد جهد و تعب نفسى كبير لإنك ممكن تبعدى عن ناس بس لو الناس دى ما قدرتش تفهم انتى بعدتى عنهم ليه يبقى ما كانوش يستاهلوا .. قالى خليكى قريبة من ربنا و امشى على الصح اللى ربنا قاله ... قالى خليكى نفسك و علشان تتغيرى للأحسن لازم يكون فى حد صاحبك جنبك بجد تلجئى له علشان لو انتى لوحدك ممكن تضعفى ... طيب مادمت أنا لاقية الحمد لله الكلام ده إيه اللى يجبرنى إنى أروح التنمية البشرية ؟؟

للمرة المليون بأقول أنا مش ضد محاضرات التنمية البشرية ... بس أنا بجد مش عارفة إيه لزمتها .. هو احنا ما نقدرش نتغير بنفسنا لازم حد من برة هو اللى يغيرنا ؟؟ ... يعنى كنت باتريق على برنامج super nany و بأقول يعنى خلاص هم مش قادرين ينظموا حياتهم و علاقتهم مع بعض و علاقتهم مع ولادهم بطريقة صح و محتاجين حد ؟ ... مش عارفة .. نفس الحكاية باشوفها فى مستشارين الزواج ... يعنى دول اللى بجد هينظموا حياة المتجوزين .. فى كده مستشار جواز بييجى على Otv و باحب أتفرج عليه أوى ... ده إيه التناقض ده ؟ يا جماعة أنا لسة ما اتجوزتش و عايزة أعرف الغلطات اللى المتجوزين بيقعوا فيها علشان أحاول على قد ما أقدر إنى ما أقعش فيها .. طيب ليه الناس اللى اتجوزت ما سمعتش الكلام ده قبل ما تتجوز ؟

طيب أنا فكرت فى حاجة ممكن تبان لكوا تناقض بس استحملونى ... أنا مليانة إلى حد ممكن أقول إلى حد ما .. الفكرة إنى حاولت إنى أخس لوحدى و ما قدرتش و قاومت كتير إنى أروح لإخصائى تغذية بس فى الآخر رضخت و رحت لإنه كان مطلب قومى ... طيب نقدر نقول إن ده زى ده ؟؟!! ... بس أنا عارفة أنا ليه لجأتله ... لإنى كسولة .. لإنى باحب حد يكون مسئول عن شئ ما علشان كده أخدت دروس فى ثانوية عامة لإننا اتربينا على إن حد يقولنا ذاكروا أو ناموا أو كلوا ماكناش احنا اللى بنخطط لحياتنا فكبرنا و احنا فينا العقدة دى

أنا زهقت منى ممكن بعد ما آجى من السفر أكون لقيت حل للساقية دى أو إنى أكون اتحيرت أكتر .. أنا مسافرة إسكندرية إن شاء الله أسبوع تقريبا و مضطرة بس يلا بقى مامتى عايزة تشوف أهلها و اهه بالمرة أسلم على البحر و آخد لى كام صورة حلوة هناك .. ماحدش عايز شوية رمل :)

و آسفة على التطويل الفظيع ده

جربت

على طريقة الباحث عن الحقيقة بتاعت جربت و بما إنه جاب فى سيرة اضطهاد الولاد و انه بقى فى تمييز لصالح البنت و الكلام الكبير ده

طيب جربت شعور بنت لازم قبل ما تركب ميكروباص تشوف فيه بنات و لا لأ .. علشان ما تثقش فى ميكروباص كله رجالة

جربت شعور بنت بتعد تفكر لما سواق الميكروباص بيسيب المكان اللى قدام لغرض ما فى نفسه .. بس هى مضطرة لإن هى دى الوسيلة اللى قدامها

جربت شعور بنت مش قادرة غير إنها تركب ميكروباص و لما التباع يقول لأ لازم 4 يركبوا ورا يقوم واحد شهم يقول أنا هادفع و باقى الميكروباص يبصلهم .. انها لازم تدافع و تبعد عن نفسها شبهة معرفتها بيه حتى لو أحرجته

جربت شعور بنت ما تقدرش تمشى بحريتها فى الشارع

جربت شعور بنت بتمشى فى الشارع و تتعاكس رغم إنها محترمة

جربت شعور بنت ولد ماشى وراها و لا يعرفها فضل ماشى وراها و هى و لاحسة لغاية ما بقوا فى حتة ما فيهاش ناس و مسكها و لمسها و حاول يبوسها و هى تضرب و تهزأ و تشتم و مفيش حد حواليها ينقذها و أول ما يشوف حد مقر يقوم عامل حركة من أقذر ما يكون و يطلع يجرى الناحية التانية

طيب جربت شعور بنت جالها رعب و قررت ما تمشيش فى الشارع ده تانى بسبب الموقف اللى حصل

جربت ؟؟؟؟!!!!!

ياريت ياريت ياريت .. قبل ما أى ولد يفكر انه مضطهد و ان البنت مميزة ... يفكر فى كل الحاجات دى و أكتر .. و هيعرف ساعتها إنها لا مميزة و لا نيلة

طلة سريعة

البلوج وحشنى أوى بما إنى بقالى كتير مش باكتب فيه ... حصلى إيه من ساعة آخر بوست

أولا الحمد لله الحمد لله نجحت و جبت جيد

ثانيا احنا بنفور الشقة و بنعملها نيولوك ... يارب نخلصها بقى لحسنن زهقت من الشقة اللى احنا قاعدين فيها دى

ثالثا أنا بدأت فعلا أتعلم كروشيه يعنى شغالة كام غرزة كده لسة يعنى باتعلم و ربنا يخليها شيماء بتساندنى جامد فى الموضوع ده

رابعا إنى و الحمد لله شكلى هارجع تانى للقراية بعد ما عدت على فترة ما مستكش فيها كتاب أو قصة ... معايا دلوقتى دمى و دموعى و ابتساماتى بتاعت إحسان و لسة ما خلصتهاش

خامسا و ده شئ مهم إنى فعلا بدأت الريجيم صحيح لسة فى الأول و صحيح لسة ما خستش جامد بس دى خطوة مهمة جدا

سادسا فى ناس أصحابى و باحبهم فعلا بس للأسف مش قادرة اكلمهم .. بس عايزة اقول انهم وحشنى بجد

سابعا الدنيا حر أوى و الشقة اللى احنا فيها من غير تكييف و حر زيادة عن الشقة اللى كنا فيها ده غير اليومين المولعين اللى احنا فيهم ... ربنا يستر علينا

و بس كده :)