Saturday, July 03, 2010

My name is Khan



أخيرا وبعد صراع مرير مع النفس لإنى باعاقبها علشان مادخلتش الفيلم ده سينما أنا اللى مغرمة بشاروخان والناس العاديين كلهم دخلوه وأنا وقفت برة باتفرج عليهم ... شئ خلانى ساخطة على نفسى لحد ما رضيت عنها وقررت أسامحها وأفرّجها على الفيلم النهاردة على الكمبيوتر




هاحاول أكون منصفة ومحايدة على قد ما أقدر وأنسى شوية حبى لشاروخان ... الفيلم تحفة فنية .. بداية من طفولة خان ومامته وهى بتعلمه مبادئ الإنسانية .. من فقرهم وبساطتهم مش قادرين يفهموا إن خان عيان بمرض التوحد .. ولكنها بتحبه كده وبتعرف إنه مختلف بس ذكى وذكى جدا .. بتصر على تعليمه حتى لو فى المدرسة الأطفال الآخرين ما قبلهوش بتوديه لمدرس متقاعد فى البيت وبيبدأ فى تعليمه من البيت لما شاف عبقريته واقتنع بيها ... أهم درس فى الحياة مامته يتديهوله لما بتلاقيه بيردد كلام الناس إن مفيش فرق بين الناس باختلاف دياناتهم ولا لونهم ولا جنسيتهم .. لكن فى بنى آدم طيب وبنى آدم شرير ... أى شئ آخر لا يهم .. وتموت مامته ويضطر للسفر لأمريكا لأخوه اللى هاجر لهناك واتجوز .. وهناك فى بلد التقدم والعلم يعرفوا إن اختلافه بسبب مرض .. ويبدأ يحاول يخليه يشتغل وساعتها خان بيقع فى غرام مانديرا وببساطته وحبه وبراءته أخيرا بيقدر يقنعها إنها تتجوزه وابنها اللى كان عنده ساعتها 6 سنين بيحبه جدا .. لكن أخوه لإنه مافيهوش نقاء خان بيقوله إن مانديرا من الهندوس مش مسلمة ولو اتجوزها يبقى مالوش مكان تانى فى البيت ده .. وبيتجوزها خان لإنها إنسانة طيبة ويعيش معاها الفترة ما قبل 11/9 ... وقبل التركيز على المسلمين بالمنظر الشنيع ده ... ساعتها حياتهم كلها هتتغير تماما ... للأسوأ ... ويلاقى نفسه محطوط قدام حل واحد ... لازم يروح لرئيس الولايات المتحدة علشان يوصله رسالة
"My name is Khan .. and I'm not a terrorist"

رحلته علشان يوصل الرسالة البسيطة دى والمهمة جدا وبتحمل جواها 100 رسالة تانية هى النص التانى من الفيلم ... رحلة مش بسيطة أبدا ورحلة بتمثل الحياة نفسها

الفكرة فى اختيار دور البطل مريض بالتوحد بيتهيئلى هى جاية من إنهم عايزين مثا ل مش ملوّث بالأخلاق العادية بتاعت البنى آدمين .. عايزين يجيبوا مثال على واحد مسلم نضيف لسة بيعتبر البنى آدمين زى بعضهم بس حسابهم على ربنا مش عليه هو .. لسة بيعتبر إنه مش من الطبيعى إنك تشد الرحال علشان تقتل الناس وهم أبريا ... حد لسة مؤمن بربنا حق إيمانه .. حد قد يطلقوا عليه لقب متخلف .. وبرضه ماكنوش سايبينه فى حاله

الفيلم مؤثر جدا وتقريبا قعدت ساعتين ونص من العياط المتقطع ... ده غير التصفيق فى أكثر من مشهد ... سيناريو عبقرى .. كفاية المشهد بتاع التبرع للفقرا فى أفريقيا ... مين فى الدنيا عنده القوة دى إلا لو كان برئ فعلا ... الفيلم فى رأيى كانت ناقصاه النهاية اللى بس تتظبط .. النهاية سعيدة زيادة عن اللزوم .. الدنيا مش هتمشى بالطريقة الرمزية اللى عملوها فى آخر الفيلم ... لو عملوها علشان هو فيلم هندى ولازم نهاية سعيدة فياريت يبطلوا العادة دى ... ولو عملوها انطلاقا من مبادئنا احنا المصريين من ناحية حكاية العصر البائد وتمجيد الرئيس الحالى يبقى إخييه عليهم ... شايفاها كانت هتبقى نهاية أحلى بكتير لو فضل مش عارف يقابل الرئيس ... لإن هى دى الحقيقة .. للأسف

ده لا يمنع إطلاقا إن الفيلم تحفة ... بداية من شاروخان طبعا اللى أتقن دوره بطريقة خرافية ... وكاجول بتمثيلها التلقائى جدا بطريقة تفوق الوصف ... ولا لحظة حسيتها بتمثل .. جميلة ... كل ما فى الفيلم جميل ويستحق المشاهدة ... بس غلطتى الوحيدة اثناء مشاهدتى للفيلم .. ماكنش جنبى مناديل كفاية .. فماتغلطوش نفس غلطتى :))







2 comments:

None said...

انا اتفرجت عليه لوحدى فى السينما
وكانت السينما فاضيه تقريبا مفيش الا اربعه تانين وكانت بليل لكى ان تتخيلى والفيلم موثر جدا هو عباره عن تحفه

مؤنس فرحان said...

اتنين لتر دموع .. أنا جالى جفاف
أنا لسه متفرج عليه إمبارح .. قاعد ساعتين ونص قدام الجهاز عمال أعيط و أشنشن ... الفيلم عندى عالجهاز من فترة وكنت مكسل أتفرج عليه لحد مااتنين اصحابى مدحولى فى الفيلم كتير

المشهد لما اخدها يوريها شروق الشمس وسط السحاب
ومشهد فرحهم لما لبس البدلة
والمشهد لما اخوه كان بيعيط وهو كان بيقول له كلمة مامته انتى ابنى الصغير وبيطبطب عليه
ومشهد التبرع لأفريقيا
والكلمة اللى قالها عن سمير فى الكنيسة
والمشهد لما شاف مانديرا لما خرج من الحبس ومارضيش يكلمها لأنه كان لسه ماوفاش بوعده وقابل الرئيس

يمكن أنا عشان لسه شايفه إمبارح فمشاعرى لسه متأججة بالفيلم

السنما الهندية واضح انها اتطورت أوى ودا ظهر من الفيلم السابق
slumdog millionaire

السينما الهندية اللى لحد دلوقتى بنتريق عليها .. خلاص عدت مرحلة الناس اللى بتطير فى الجو والأخ اللى بيضرب 100 والبطل اللى مصاحب الفيل والقرد والصقر وبيحارب بيهم

واحنا لسه فى كل عيد القنوات بتاعتنا بتذيع الأفلام القديمة بتاعتهم ونتريق عليها بردو .. وحانفضل احنا عايشين فى الماضى

أنا جوايا شحنة كبيرة أوى من الفيلم

بس موش عارف أكتب كل حاجة