بقالى فترة باتفرج على أفلام فيها قوة وتغيير .. وغالبا بدون قصد منى بتكون أفلام فيها قوة نسائية .. أفلام بتدعو للتغيير فى نفسنا مش شرط فى العالم .. ماهو أصلا التغيير فى العالم بيبدأ من التغيير فى نفسك
المشكلة دلوقتى إن الأفلام دى جاية فى وقت مش وقتها .. أو يمكن هو وقتها بس أنا مش ناقصة لعب فى دماغى .. أنا أصلا فى مرحلة باحاول أعرف هاعمل إيه فى النيلة حياتى ومستقبلى .. أفكار كتيرة فى دماغة .. شخصيتى عمالة تتغير والله وحده أعلم إذا كانت لأحسن ولاّ لأوحش .. حاجات كتيرة مش عاجبانى .. شكلى، مهنتى، هواياتى ... حتى صحابى .. طريقة تفكيرى .. كتابتى وقراءاتى .. تعاملاتى مع الناس
الغريبة المرة دى غير كل مرة إنى يا سبحان الله ماعنديش حالة الاكتئاب بتاعت كل مرة .. بالعكس يعنى أقدر أقول إن جوايا شوية تفاؤل ... يمكن شوية حلم وشوية حالة من التبصر أو محاولة رؤية المستقبل بتاعى ورسمه .. تخطيطه يمكن :)) ... جوايا حسة إنى ممكن أنجح بجد فى اللى أنا نفسى فيه ... يعنى ماهو أكيد كل اللى نجحوا دوووووول يعنى ماهماش أحسن كتير .. وفى منهم اللى فعلا مش أحسن منى .. اللى أحسن منى فعلا هو إنهم يكون جواهم إصرار ... الأهم من كده مش حتى إنهم يكونوا مخططين كل الخطوات اللى بعد كده إيه .. الأهم معرفة أول خطوة وازاى تتعمل والباقى بعدين هييجى ... دى مشكلتى الأزلية دايما .. أول خطوة ... بدأت أفكر إن كورسات التنمية البشرية مش بالوحاشة دى :)))
يا مسهل
حاجة كده نعنشة شوية :))
1 comment:
وعي الانسان بانه محتاج يتغير للاحسن بداية جميلة .. و ما دام عندك الوعي و الرغبة تبقي عايشة لسه .. ساعات الواحد بيقضي وقت طويل محلك سر و مش بياخد باله الا لما الظروف تضغطه او الوقت يسرقه او تحصل صدمة قوية تفوقه من غفوته .. الوعي دليل الاحساس بالحياة لكن زي ما قلتي العمل المنظم .. الخطة هي الطريق المتعب اللي الواحد لازم يدور عليه و يقطعه .. المهم الواحد يعرف ايه اللي هو عاوزه .. علي أد ما يقدر
بالتوفيق
:)
Post a Comment