كريم .. ابن عمتى لسة هيتم 8 سنين .. رغم إنى باكره السن ده فى الأطفال .. لكن إلى حد ما كريم مختلف .. وقعدته قدام التليفزيون ليل بنهار .. ووجود النت والأفلام خليته يقول كلام غريب .. كلام أكبر من سنه ..
يعنى علشان يخلينى أفتح التليفزيون فى بيتنا .. يسألنى .. هو التليفزيون ده بايظ ؟ أقوله لأ .. يقولى أمال مش مفتوح ليه؟
لما أسلم عليه بعد غياب سنيتن يمكن 3 سنين .. أقوله فاكرنى ؟ يقولى لأ .. أقوله طيب أنا آيات .. اسمى إيه بقى ؟؟ يقولى أوووووف اسمك آيات، إيه يعنى فايدة الأسماء .. أقوله علشان أقولك ازيك يا كريم فانت تقولى ازيك يا آيات ... يقولى وما نقول ازيك وبس .. قلتله طيب علشان لما أناديك .. أقول ياااااااااااا وبس ؟؟؟؟ .. قالى خلاص .. قولى يا أيا يكن .. قلتله وأنتى تقولى إيه .. قالى هأقولك يا أيا ياكنتى :))
لما يجيبنى علشان ألعبله اللعبة علشان أنا (ماهرة ومحظوظة )
لما يقولى لو سمحتى قعدينى مكانك علشان أنا متوتر ومش عارف أفضل واقف
لما يقولى الحنفية بتاعتكوا دى (رديئة)
لما ييجى يحكى لى على حدوتة من خياله هو البطل بتاعها .. بس كل شوية يعمل الموسيقى التصويرية بتاعت توم وجيرى
لما أخوه الأكبر منه بشوية يسألنى بحسرة الدنيا .. انتوا ليه كبار أوى كده :(:(:( .. فكريم يرد بكل تلقائية .. أصلهم مولودين قبلنا :)
لما يقولى فين الألعاب الكتير اللى كانت عندكوا .. انتوا بقيتوا ( مفلسين) فى الألعاب
لما يقولى أنا سعيد إنك من العيلة دى
لما أغلس عليه واحنا فى فرح أخويا واعد كل شوية أفتحله سوستة الجيب وهو يقولى بطلى بقى .. فلما يعوز يقنعنى إنى ما أقومش أهيص وأرقص فى الفرح .. ويقولى تعالى اعدى على كرسى السوستة .. وهاسيك تفتحى سوستة الجيب بتاعتى زى مانتى عايزة
لما يكون قاعد زعلان علشان باباه سافر . . فمامته تقوله تعالى اعد معانا وإلا خالتك هتفتكر إنك زهقان منهم .. فيرد بكل لباقة: هو حد برضه يزهق من أهله ؟
لما بابا يسأله فاكرنى يا كريم .. فيقوله : حد برضه ينسى خاله يا خالو ؟ :)
لما يقول لمامته : انتى عمود البيت :)
ساعتها .. عرفت ازاى الجيل بيتربى على سبيس تون :):):)
5 comments:
بسم الله ما شاء الله عليه يا آيات
ربنا يحميه ليكو
فعلا واضح جدا انه طفل مختلف
على فكرة الاطفال مبيحبوش غير الناس النضيفة والكويسة من جوه
وانتى إنسانة طيبه أوى وقلبها أبيض
وطبيعى الأطفال يحبوكى
من أجمل البوست اللى كتبتيها فى الفترة الأخيرة
تحياتى
وعودة موفقة جدا لعالم التدوين
سلام
ايات أنا من أشد المعجبين لمدونتك أنا عرفة أني مش كتبتلك تعليق قبل كدة بس بجد مدونتك تحفة أنا عندي سؤال انتي هتيجي يوم ٨/٨ الأزهر بارك؟؟؟؟؟؟؟؟؟؟؟؟؟؟؟؟؟؟؟
ده لما يكبر ببساطه هايبقى زى شخصيه بهيج فى فيلم طير إنت
فعلا
:)
فعلا والله عندك حق انا بلاحظ الموضوع دة فعلا مع اولاد اختى كلامهم بقى غرب واكبر من سنهم وتعبيراتهم مش تعبيرات اطفال انا بحس انهم اتسرق منهم الطفولة
كل سنه وأنتى طيبه
رمـــضان كــــريم
تقبلي مرورى
شموسه
Post a Comment