طبعا إن الواحد يلاقى تاكسى فاضى يوديه للمكان اللى هو عايزه بقت حاجة صعبة .. وإنه يلاقى تاكسى يرضى باللى دفعناه له من غير ما نكون ظالمينه بقت حاجة أقرب للمعجزة .. من الآخر بقت حاجة قلة أدب
كليب قديم بتاع سيمون بتترجى فيه التاكسى .. صراحة أول مرة أشوف أغنية عن الموضوع ده :)
14 comments:
هههه
حلوه الاغنية دى
بس سيبك انتى من كلام الاغنيه شفتى الكليب عامل ازاى انا قعدت اضحك عليه بجد كانت سيمون والاخراج بتاع الكليب يموت من الضحك
وسلاااااااام
ياااااااااه ده كليب ضارب في أعماق الطفولة
عموما سيمون مكانش ليها لزمة باستثناء كليب متقولش الحد مع حميد الشاعري
توقفى التاكسى وتقولى له اى حتة يروح باصص لك باشمئزاز فزيع فزيع زيسيبك ويمشى مرة وقفت تاكسى ومرضاش يروح الحتة اللى انا عايزاها قربتها له شوية بردو مرضاش روحت قلت له طب سيادتك رايح فين؟؟؟ تصدقى فعلا روحت على سكته وركبت تانى من هناك
هههههههههههههههههههههه
حلوة بجد
ياااه
الأغنية دي بقالي مدة ما سمعتهاش
طبعا هي تتسمع ما تتشافش
وأنا ليا تعليقين
الأول: إن الذوق في الموسيقى في هذه الفترة كان له مذاقه الخاص مش زي دلوقتي الأغاني الموسيقى بتاعتها مالهاش شكل ولا هوية ولا لون ولا طعم
تاني حاجة: سيمون ليها أغاني جيدة غير ما تقولش لحد
زي (مبسوطة)
اللي بتقول فيه مطلعها:
ماشية وساعتي مش مظبوطة
ولفين رايحة ماكنتش عارفة
لكن ماشية وأنا مبسوطة
ماشية بخطوة ماهياش خايفة
ع الرصيف واحد بيعاكس
ليه مع إنه كبير في السن
في الميدان بياع جرايد
بيقول اقرا رياضة وفن!
==
برضه آخر الأغاني اللي بفتكرهلها وكانت لذيذة جدا وبحبها
(فيه حاجة كده)
فيه حاجة كده مش عارفة دي إيه
وبقول لو كده.. راح يحصل إيه
أنا دبت .. أنا دبت خلاص في عنيه
وأخدني حنيني إليه
وبقول لو يعشق قلبي ازاي ما يبانش عليه
=
طبعا بخلاف مسرحياتها الأخيرة
=
المهم سيمون من الأصوات الخفيفة اللذيذة.. ولكن هي كانت زي مغنيات كتير أغبيا في تسويق نفسهم وفي رسم خطوط فنية قوية ليهم زي أنوشكا ومنى عبد الغني وخلافه من مغنيات هذه الفترة
يخرب عقلك يا أيات
أنا مش فاكرة الكليب بس خلانى ابتسم و فكرنى بريحة زمان
على رأى منير : يرحم أيام زمان
سلام جامد
ايه حكياتك مع المواصلات... مره مترو ولا مره تاكسى
طبعا عندك حق..القاهره عجيبه فى موصلاتها وخصوصا التاكسى..الواحد يفتح الباب ويقفله يدفع عشره جنيه طوالى من غير كلام
الكليب جميل...انا اول مره اشوفه الصراحه
فنان .. طبعا إخراج زمان كان يفطس من الضحك ده غير انفعالات سيمون الزايدة .. بس فى النهاية أهم حاجة انك انبسطت :)
__________________________________
عمرو .. أنا أصلا أساسا ماكنتش أعرف الكليب ده .. بقى خلاص أغلب الحاجات اللى فى سنى عارفينها وأنا لأ أعرف إنها أيام ما كنا فى السعودية .. يعنى حتى ماتقولش لحد ماعرفتهاش غير قريب
إنجى .. دى حاجة قلة أدب وسافلة .. زودى بقى على التاكسى
الميكروباصات .. الناس اتجننت
__________________________________
بلو ويف .. طيب الحمد لله
حامد .. يمكن فعلا فى الوقت ده أغلب الأغانى كان ليها شئ مميز .. يعنى لما أسمع أى أغنية من الفترة دى باعرف أميزها من لحنها بسهولة
تانى حاجة .. أنا مش باكره سيمون لكن زى ما قلت أساسا الفترة دى كنا تقريبا فى لاسعويدة فأغلب الحاجات دى فاتتنى .. أنا باحاول أعوض
ومعاك جدا فى نقطة غباءهم فى تسويق نفسهم .. بالرغم إن الأسامى اللى قلتها كان فيه منها الأصوات القوية .. وكان فيه منها الأصوات الخفيفة اللذيذة
نهال .. نفس اللى حصلى لإنى أساسا ماعرفش الكليب .. أجمد سلام ليكى .. ابقى عرفينى أخبارك
_________________________________
عمرو .. حكايتى مع المواصلات حكايتى مع الزمان .. أنا كل يوم لى أكتر من حكايتين مع وسيلة مواصلات شكل وساعات العربيات .. طبيعى لإنى ماعنديش عربية فلازم أحتك بالمواصلات اللعينة
سعيدة إن الكليب عجبك :)
انا اكتشفت ان احنا البلد الوحيدة فى العالم الى بنقول للتاكسى احنا رايحين فين قبل ما نركب
وبردو احنا البلد الوحيدة فى العالم اللى من حق السواق انه يرفض يودينا
واكتشفت بردو ان دى اغنية
انا كنت فاكر ان ده الفاصل بتاع برنامج تاكسى السهرة
اللى كان بيجي يوم الاتنين بليل
وكانت فى واحدة-اللى هى طلعت سيمون- بتقول تاكسى فى الفاصل
بجد شكرا للاضافة
انا شايف ان سيمون مغنية كويسة جدا وموهوبة بس هي اتظلمت وكل بنات جيلها زي أنوشكا ومني عبد الغني وحنان وعايدة الأيوبي وحنان ماضي رغم إن الجيل ده كان جيل عمل تجديد في الأغنية وحتي لو في بعضهم قدم أغاني عبيطة فالاغاني دي علي عبطها أفضل مية مرة من اللي موجود دلوقتي,بالنسبة للكليب انا شايف انه لذيذ ودمه خفيف وكويس بالنسبة للوقت اللي اتعمل فيه اللي هو سنة 1990 علي ما أظن فما نحكمش عليه بمعايير زماننا ده وما تنساش ان الكليب ده مسروق من كليب لمادونا -علي م أذكر- المهم أحلي حاجة إن الكليب ده فكرني بطفولتي عصر ما قبل الدش وقت ما كان الشعب المصري كله بيستني عدد محدود من البرامج الترفيهية زي تاكسي السهرة يوم الاتنين ونادي السنيما يوم السبت وبانوراما فرنسية يوم التلات وأوسكار يوم الاربع ولمحبي الكآبة برنامج حدث بالفعل يوم الأحد .كان وقت حلو ساعات كان نفسي اني أرجع أعيش في التسعينات تاني
Post a Comment