بكرة إن شاء الله هاطلع المصيف .. و الحمد لله مش هنبقى تقليدين زى كل سنة و نطلع اسكندرية اللى بنطلعها فى الأساس لإن أهلى كلهم هناك .. هنغير و نروح مطروح يمكن لإننا زهقنا زائد إن أختى أمنية خارجة من 2 ثانوى و رايحة 3 إن شاء الله فلازم تدخل بنفسية كويسة .. هى الحمد لله جابت مجموع كويس و على رأيها احنا ماكناش متوقعين كده .. إن شاء الله خير و تفضل كده و هى فى سنة تالتة كمان ... ربنا يسهل و يستر
هنعد إن شاء الله يومين فى اسكندرية بعدين 10 فى مطروح و بعدين 2 فى اسكندرية .. مش عارفة ليه لما باقول الجملة دى بافتكر جملة " شاطر و مشطور و بينهما طازج " :)
طبعا لا هيبقى فى نت و لا أى حاجة و طبعا كل النتايج اللى فى الدنيا هتطلع و أنا مسافرة .. يارب الناس ما تستندلش و اللى نتيجته تطلع يكلمنى على الموبايل يقولى بلاش بخل .. و يارب نتيجتى و نتيجة كل اللى معايا و حتى اللى مش معايا .. تطلع حلوة و جميلة .. عن نفسى أنا و دينا مش عايزين أكتر من إننا نعدى صافى يارب .. و من موقعى هذا أحب أقول لـرانا ألف مليون مبروك .. و لسارة ألف مبروك التخرج أول خريجة من سنى .. و من بابا و ماما و تيتة و خالتى أم دعبس :)
يارب أستمتع هناك لإنى بقالى كتير ما استمتعش بحاجة .. اتأكد بس إن حاجتى معايا الـMP3 و عليه الأغانى اللى باحبها .. الكاميرا و شاحن البطاريات و شاحن الموبايل و الكارنيه بتاعى اتأكد إنه معايا .. كده ناقص حاجة ؟! آه خلاص وضبت اللعب بس ناقص حاجات بنك الحظ يارب نلاقيها و أخدت معايا كام كتاب سلفاهم من أشرف على قصتين من عندى .. كد بيتهئلى جاهزين و يارب أحمد يرضى يسيب اللاب توب بتاعه معانا علشان ننزل الصور بتاعت الكاميرا و نشحن الـMP3 .. و يارب يا ست سوسكا هانم أعرف اشوفك
و لا تقلقوا طلباتكوا معروفة و هأجيبها إن شاء الله .. لب و نعناع :)
هتوحشونى .. سـلام
11 comments:
آيات حبيبتى
بقالى كتير مش بعلق عندك
انتى الى هتوحشينا اوى وحلوه موت شاطر ومشطور وبينهما طازج ده ههههه
يارب تتبسطى وتستمتعى بوقتك وان شاء الله النتيجه هتبقى حلوه ليا وليكى يارب:))
الصوره الى انتى حاطاها تحففففففففه
مستنياكى تروحى وترجعى بالسلامه يارب:)
شيماء:)
تروحى وترجعى بألف سلامه
ويارب تقضى اجازة سعيدة
بعد السلام عليكم
ألف مبروك لأختك ياستى وعقبال سنة تالتة ان شاء الله
وألف مبروك لكل صحباتك
وعقبالك ونتيجتك تكون خير أن شاء الله
وان شاء الله تقضى أجازة سعيدة وتروحى وترجعى بالسلامة
تحياتى
بمناسبة اسكندرية
أنا عمري ما فكرت أروح شط غير شط اسكندرية
حتى أصحابي كلهم بيروحوا مطروح مثلا مؤخرا
أو بيروحوا شرم مثلا
أو أي مدينة
ده حتى ناس بتروح الأقصر وأسوان
أنا عمري ما فكرت أشد الرحال غير للإسكندرية
خصوصا في الشتا
إحساس وذكريات فرح وحزن وأماكن لا تقارن بأي مكان
انا عاوز لب
ماليش فيه انا بقول لك اهو
مالقيكيش جبتي هريسة من سوق ليبيا والكلام اللي ماياكولش معايا دة
اللب الابيض ثم اللب الابيض ثم اللب الابيض
كان نفسى اشوفك جدااااااااااا انتى وأمل مع امنية
فاتك كتير لما كلمنا أحمد شمس وأمنية موش عارفة تقوله ايه و لما نزلنا جوه البحر وامنية عمالة تتلفت حواليها زى اللى هايسرق سريقة كان يوم حلو اوى :)
فضحاكى انا يا أمنية :D
حلو اوى الاهداء كان ناقص يتبعت ل ما يطلبه المستمعون :)
شكراً خالص
بالمناسبة شوفتى الصورة اللى انا وامنية وغادة اتصورنا فيها جمب العروسة الكبيرة بتاعة ماكدونالز :D
طب مش كنتي تقولي كنت فضيتلكوا البلد بدل ماتروحوا تتخنقوا من الزحمة
بصراحة مطروح دلوقت لا تطاق ربنا يعينكوا مع ان البلاجات فاضياااااااااااااه خالص بس بالليل الدنيا بتبقى استاد القاهرة ف نهائي افريقيا
يالا اجازة سعيدة وترجعي بالسلامة ومش هاتعرفي تجيبي لب
دانا اللي ف البلد بقالي سنه باحجز علشان اجيب فمابالك بمصيفه جاية بومين وماشيه
شيماء حبيبتى .. مش مهم تعلقى أنا عارفة إنى جوة فى قلبك :) .. ميرسى يا حبي
*******************************
بلو ويف .. ميرسى جدا كانت من أحلى إجازاتى :)
أبو صلاح .. الله يبارك فيك .. و شكرا على تعلقيك :)
**********************************
حامد .. يمكن معاك حق فى إن اسكندرية لها سحر خاص بها لوحدها ما بتشاركش فيه حد .. بس المفروض إننا برضه نشوف حتت تانية .. ما احنا كده كده هنلف و نرجع لاسكندرية .. خاصة غن اسكندرية فى الصيف بتبقى زحمة جدا
ياسر جبت لب أبيض بس اتاكل كله .. ماكلش نصيب فيه للأسف :)
*********************************
رانا .. أنا برضه كنت عايزة أشوفك جدا بس يلا حصل خير لإنى كنت نازلة .. شفت الصور و انتوا فى المية و انتوا متصززرين جنب البتاع بتاع ماك .. حلوة الصور يا رانا .. و انتوا أحلى
حاتم .. شكرا على النوايا الطيبة :)
هى آه مطروح كانت زحمة جدا بس برضه لازالت لا تقارن أبدا بأى زحمة تانية .. و أنا طبعا جبت لب عيب عليك .. ده أنا آيات :)
Post a Comment