تم النهاردة و الحمد لله انى قفلت 20 سنة و الحمد لله بالتمام و الكمال ... 20 سنة بتساوى خمس قرن ... عقبال ما أتم القرن كله إن شاء الله .. و أنا بجد و الحمد لله فرحانة انى بقيت 20 سنة ... طبعا مش علشان كبرت وعقلت و نضجت و الكلام ده ( بعد الشر على ) إنما مش عارفة ... يمكن انى زهقت من الأرقام اللى آخرها ( اشر ) ... احتمال برضه أصلى بازهق بسرعة جدا فتخيلوا فضلت 9 سنين كاملة الأرقام دى موجودة معايا و عارفة انى هازهق بسرعة من حاجة و عشرين ... بس انا لسة داخلة العشرين النهاردة فمش وقته انى أفكر أزهق منه كده على طول ... الشئ اللذيذ انى اتعرفت على واحدة صاحبتى زى العسل .. اكتشفنا اننا مواليد نفس اليوم نفس السنة ... كل سنة و انتى طيبة يا رودى و عقبال ما نتم مع بعض عدد السنين اللى مكتوبة لنا ... و نعيش و نتجنن و نجنن اللى حواينا أكتر
.
.
بالنسبة لى ده من أحلى أعياد الميلاد اللى عدت على رغم إنى خارجة من مرض أصلا و مش هآكل تورتة ( و مامتى قالتلى نعملك بطاطس بيورية بدل التورتة ) ... بس يلا مش مهم ... اقولكوا ليه ده يمكن من احسن أعياد الميلاد اللى عدت على ... أولا كفاية انى هاتم 20 سنة ... ثانيا و ده الأهم إنى و الحمد لله علاقتى بالناس اللى أعرفهم اتحسنت أوى و بقينا قريبين من بعض .. و ده شئ فرحنى جدا و خصوصا بعد سنة غم عدت علينا ربنا ما يرجعها ... تالت حاجة انى حسة انى بقيت كويسة مع عيلتى و الحمد لله ... رابع حاجة انى اتعرفت على ناس جديدة أصحاب لذاذ و دمهم خفيف و جدعين بجد ... و بدأت فعلا فعلا أقرب منهم بطريقة باسطانى ... فشكرا لكل واحد خلى عيد ميلادى ده عاجبنى رغم عدم وجود تورتة :)
.
.
و يارب يارب السنة الجاية زى دلوقتى أكون حققت حاجات كتير من اللى نفسى فيها ... و يارب تفضل علاقتى بالناس كويسة ما تدهورش تانى ... و يارب اتعرف على ناس كويسة كمان و كمان
.
.
قولوا آمين .... و كل سنة و أنا طيبة
7 comments:
كل سنة و انتي طيبة يا آيات و عقبال مائة سنة تقضيهم كلهم في فرح و سعادة و صحة و خير
البطاطس البيوريه مش وحشة.. بس انتي لما تشدي حيلك متسيبيش حقك في تورتاية
يوتى
كل سنة وانتى طيبة
انا كنت فاكراكى كملتى 19 سنه كده هتكبرينا ياعفريته
عيد ميلاد سعيد بس انا بقى شايفه انك ماتسيبيش حقك فى التورتة أقولك خدى حقك ناشف و اشترى انتى بيه دوريتوس بمعرفتك
ههههههههه
احساس جميل فعلا انك تحسى انك قربتى من اصحاب ليكى بشكل اعمق أو أقل سطحية و انك توسعى دايرة علاقاتك بناس من جهات مختلفة
كلية و نادى و مدرسة و نت و كده
ربنا يديمها عليكى نعمة
و عقبال 43 سنة ساعتها هتقولى فينك يا عشرينات و ماترضيش تقولى سنك لحد
" وش واحدة مطلعالك لسانها "
كل سنة و انتى يبة
و حساب عيلتك معايا بعدين فى موضوع المنتدى اللى بيتدمر فى اعياد ميلادكم ده
كل سنة وانتي طيبة
بقى عندك عشرتاشر سنة كده بالتمام
مش عايز تورته
بس فين نصيبي من البطاطس البوريه ؟
أنا بقالي كام يوم بحاول أرد في الموضوع ده مش نافع..يا رب المرة دي بقى
كل سنة وانت طيبة يا يويو..ويارب أشوفك دكتورة أنف وأذن ( علشان مناخيري متعورة)
وأشوفك مهندسة ومحامية وعضوة مجلش شعب ( بس مش تبع الحزب الوطني)
السنة الجاية ان شاء الله ابقى كلي في عيدميلادك بيتزا..أهي أحاى من البطاطس البيوريه
نمنمة ... و انتى طيبة ... و البطاطس البيورية مش وحشة بس يعنى مش بتاعت عيد ميلاد .. و أنا الحمد لله عملت بنصيحتك و ما سبتش حقى فى التورتة :)
يوكا ... و انتى طيبة 19 مين بس يا بنتى انا من كبارات البلد دى ... فعلا بادعى ربنا دايما انه يديمها على نعمة و يارب ما نتفرق كالعادة المعتادة و يارب اللى ما جربش الحكاية دى قبل كده إنش اء الله يجربها لانها من أحسن الحاجات اللى فى الدنيا ... و لو على المنتدى اللى بيتدمر فى أعياد ميلادنا نعمل إيه بيفرح زيادة عن اللزوم فبيطق من الفرحة و ينفجر :-p ... و انتى طيبة يا افندم
خلاخيلو ...و انت طيب و يا مرحب بيك هنا .. و حتى لما اخلص من الـ(اشر ) رسمى تقولى بقى عند عشرتاشر ، ربنا يسامحك .. و كويس انك عايز بطاطس مش تورتة لاننا عملنا تورتة مش بطاطس :-p
سلومتى .. الحمد لله نفع و انتى طيبة و سلامة مناخيرك .. و كمان لما اعمل كل الحاجات دى امال سبتكوا لكوا تشتغلوا إيه؟ تعملوا مظاهرات ضدى ؟ لأ يا ستى خدوا نتوا كمان اشتغلوا و اتلهوا فيها :) ... ماشى السنة الجاية إن شاء الله اعملها بيتزاو اعزمكوا بالذات انتى و سيماجو :)
كل سنة وانتي طيبة يا جميلة والف سلامة عليكي
بلاش بطاطس بورية مبحبهاش
خليها مكرونة او فرخاية مسلوقة
وربنا يخليلك صاحبتك وكل سنة وانتم مع بعض
خلاخيلو ... يادى الحداشرتاشر سنة ... ماشى يا سيدى مقبولة منك ...
لاميا ... و انتى طيبة يا جميل و الله يسلمك الحمد لله خفيت و ولا بقى فراخ مسلوقة و لا الحاجات دى ... و يارب دايما مع أصحابى كده و كل واحد مع أصحابه
Post a Comment