Wednesday, January 17, 2007

6 دقائق و ما يتبعها ... و ذلك نقلا عن مصادر موثوقة

شوفوا الفيلم ده هنا ... و قال يعنى أنا لما جاوبت على الأسئلة دى كانت ردودى

1- من هو بيرلسكونى ؟
ما اعرفش

2- ما هما الحزبان الرئيسيان فى أمريكا ؟
الجمهوى و الديمقراطى

3- من مؤلف رواية رجال فى الشمس ؟
ما اعرفش

4- من مؤلف رواية الحرب و السلام ؟
ليو تولستوى

5- من مؤلف مسرحية كاسك يا وطن ؟
ما اعرفش

6- من هو أمل دنقل ؟
شاعر

7- عدد ثلاث كتاب رواية أردنيين
طبعا ما اعرفش ... لكن ممكن أقول مصريين لو الفيلم كان مصرى

8- من هو الممثل الحاصل على جائزة الأوسكار بدوره فى فيلم American Beauty ؟
كيفن سبيسى

9- من هى الممثلة الحاصة على جائزة الأوسكار لعام 2004 ؟
هو أنا المفروض أحفظ مين أخد الجايزة سنة كام !!!!!

10- ماذا تعرف عن السبى البابلى ؟
و لا عمرى سمعت عنه

11- ما اسم كبير الآلهة عند اليونان ؟
زيوس

12- ما هى عقدة أوديب ؟
ان الولد يكون متعلق بأمه أوى و هى مأخوذة عن أسطورة قديمة ( أوديب الذى فقأ عينيه بدبوس شعر أمه )

13- أين تقع دولة المجر ؟
أوروبا !

14- ما هى عاصمة المجر ؟
و لا أعرف

15- ما الدول التى تحد قبرص برا ؟
برا ؟!! هى قبرص مش جزيرة ؟

16- ما الدول التى تحد الفاتيكان ؟
الفاتيكان مش دولة أصلا ... دى جوة روما / إيطاليا

17- متى وقعت الثورة الفرنسية ؟
مش فاكرة ... 1818 !!!!! ( خلاص عرفت انها غلط ماحدش يضرب )

18- متى انضمت إيران إلى جامعة الدول العربية ؟
هى إيران عربية علشان تنضم ؟!!

19- من مؤلف مقطوعة بحيرة البجع ؟
تشايكوفسكى ( و ابقوا قابلونى لو عرفت انطق الاسم صح )

20- من مؤلف مقطوعة الفصول الأربعة ؟
و لا عمرى سمعت عنها

21- من صاحب أغنية فى قلب الليل ؟
على الحجار

22- من صاحبة أغنية آه و نص ؟
ده سؤال ؟!!!!! نانسى عجرم
انتهت الأسئلة

عامة أنا باعتبرهم 21 سؤال لما أجاوب على 12 سؤال منهم و ده نجاح ... بس القضية دلوقتى مش فى انى جاوبت على كام سؤال و لا أبطال الفيلم ده جاوبوا على كام سؤال ... القضية انا شايفاها فى حاجتين ... انك تفرق بين انك تكون مش عارف أو انك تملك قدرا وفيرا من الغباء بحيث انك لما تتسأل مين الممثلة اللى اخدت الأوسكار ما تسألش عربية و لا أجنبية و بعد كده تقول نبيلة عبيد ... أو انه يتقالك مين الممثل الحاصل على الأوسكار عن فيلم أميركان بيوتى فتقول شون كونرى عن فيلم lord of the rings .. يعنى ياريت غبى بإجابة صح ... الحاجة التانية اللى شايفاها هى الشجاعة اللى بتتطلبها كلمة مش عارف ... يعنى فى الفيلم ده لقيت كمية مش عارفة كتير جدا .. وده فى نظرى أحسن بمراحل من نبيلة عبيد اللى اخدت جايزة الأوسكار ... و مش عارفة ليه قولة كلمة مش عارف صعبة كده ... يعنى فى برنامج تانى بس مصرى كانوا بيسألوا عن القرية الذكية اللى فى مصر .. قام واحد قال ان القرية الذكية دى حلوة أوى و هو نزل المية هناك و المية ألوانها تحفة بنفسجى و أخضر و حاجات حلوة كده ... مش هادعى إنى أعرف إيه القرية الذكية و لكن على الأقل مش هارد رد غبى زى ده .

المشكلة مش فى بس الجملة اللى قالها يحيى العبد الله فى آخر الفيلم ( يقرأ الطفل العربى ما يقارب 6 دقائق سنويا خارج منهاجه الدراسى ) ... لان المعلومات مش بس بتتجاب من الكتب اللى برة المنهج الدراسى ... ممكن تيجى من خبر تقراه على النت أو حاجة تسمعها فى التليفزيون أو أو أو ... الحكاية مش بس قضية قراية ... لإن أغنية فى قلب الليل لعلى الحجار مش محتاج إنك تقرا علشان تعرف انها بتاعته ... المشكلة أساسا فى الإعلام هو اللى بيركز على حاجة معينة فبيخليك مهما كنت مالكش صلة بالحاجة دى بتعرفها ... يعنى كمثال على كده بابا كان مالوش أبدا أبدا فى الأغانى الحديثة و بيسمع أم كلثوم و كده ... لكن أول ما صاروخ نانسى انطلق عرفها الأول باسم مش عارف إيه عجرم .. ومفيش يومين و حفظ اسمها ... ده مش لإن بابا بيتابعها و لكن لإن الإعلام ما سابش مكان إلا و تكلم فيه عن نانسى ... دى أول حاجة .

تانى حاجة ... هى مشكلة تعليم برضه .... يعنى لو التعليم كويس ماكانش ده يبقى الحال .. لان معلومة زى متى قامت الثورة الفرنسية أنا متأكدة انى اخدتها بس مش قادرة افتكرها ... و نفس الحال مع أختى اللى فى أولى إعدادى .. قالت لى أنا لو كنت لسة فى 5 ابتدائى كنت زمانى جاوبت ... و هى دى القضية ... ان الدراسة ساعات بيبقى فيها معلومات أساسية و بديهية .. لكن لاننا تعودنا ان نرمى كل ما يتعلق بالدراسة فى أعماق النيل بمجرد ما نخلص الامتحان .. فأصبحنا نرمى حتى المعلومات التى لا تستلزم جهد لحفظها ... الحمد لله اننا ما رميناش الكتابة و القراية و رجعنا أميين بنبصم .

تالت حاجة ... هى مشكلة أهالى ... ان لو الأهل شافوا عيالهم ماسكين قصة و لا أى حاجة تانية غير المتعلقة بالدراسة ، الكلمة اللى بتتقال سيبوا اللى بتقروه ده و قوموا ذاكروا حاجة تنفعكوا ... طيب و هل الدراسة نفعتنا ؟ دى المعلومة الوحيدة اللى انا عارفاها من أيام الدراسة فى ابتدائى راحت مع الزمان ... لكن نفس المعلومات اللى انا عارفاها من أيام ابتدائى و إعدادى بس من القصص فضلت أغلبها فى الذاكرة ... لان القراية ماحدش بيجبرنا عليها .. لكن المذاكرة بتبقى شئ واجب للنجاح و التفوق ... إلخ .... سيبونا نقرا اللى احنا عايزينه و نوعدكوا اننا هننجح بإذن الله رغم يعنى اللى نجحوا عملوا إيه بنجاحهم ده ... بس ماشى .

غير كل ده بقى سياسة الدولة اللى فعلا عايزة الشعب يبقى أمى فلا هو عارف يقرا و لا هو عارف يكتب ... و قال إيه عاملين معرض كتاب ... و يعدوا كل سنة يعيطوا و يلطموا فى كل الجرايد ان ماحدش بيشترى و ما بقاش فى مثقفين .. إلخ ، القضية مش انه ما بقاش فى مثقفين .. القضية ان الناس مفلسين ، أسعار الكتب تغلى و الناس ما تشتريش و الكتَاب و الناشرين يصوتوا و الحكومة تبتسم لانها كل سنة غرضها بيتحقق أكتر و أكتر ... مفيش حد فى البلد دى هيعرف يقرا نياهاهاهاها ... و طبعا كفاية انها هى اللى بتحط المناهج اللى تخنق على نفس الواحد .

عامة علشان ماحدش يتقهر مش احنا بس ( كعرب يعنى ) اللى مش بنقرا ... أمريكا برضه عندها نفس الأزمة و بتعانى منها بعكس اللى بيوحوه لنا فى أفلامهم .. من البرنامج ده لقيت ان كتير من الأمريكيين عاملين زى شخصية جوى فى فريندز .. شخصية ظريفة و مرحة و لكنها سطحية تماما ما عندهاش أى معلومات عن أى حاجة ...

الأفلام ضحكتنى و لكنها ما أبكتنيش على حالنا ... لإن الحال ده معرف من زمان و مش أول مرة نكتشفه ... كل الحكاية إنه يوم عن يوم الحكاية بتتفشى أكتر و بتنتشر ... ربنا يستر .

Thursday, December 14, 2006

Spiderman 2 ... Choice ... Destiny

امبارح كنت قاعدة زهقانة قلت لما افتح الكمبيوتر و أدورلى على فيلم ... اخترت سبايدرمان 2 ... لإنى كنت متفرجة على الجزء الأول من مدة مش بعيدة ... و كنت متوقعة الأسوأ باعتبار انه جزء تانى ... و أنا اخدت على إن الأجزاء التانية عادة ما بتكون وحشة ... و لكنى فوجئت من البداية بمقدمة الفيلم اللى عجبتنى جدا ( انا ما اتفرجتش على مقدمة الجزء الأول ) .... و لما دخلت فى الأحداث اكتشفت انى ظلمت الفيلم ظلم كبير جدا لإنه طلع رائع و من وجهة نظرى طلع أحسن من الجزء الأول



الفيلم متصنف انه أكشن و خيال علمى و فانتازى ... لكنى باصنفه فيلم إنسانى من الدرجة الأولى ... الفيلم ماكنش بيعبر عن بس حالة صراع بين سبايدر مان و عدوه ... و لكنه كان فى صراع أكبر جوة بيتر باركر نفسه ... صراع حول عايز إيه ... هل هو عايز فعلا انه يفضل سبايدر مان بكل اللى بيجيبه له من مشاكل و عدم استطاعته انه يوفى بوعد بسيط جدا زى انه يحضر العرض المسرحى بتاع (ام جا ) عدم استطاعته انه يتوفق فى دروسه و عدم استطاعته انه يجيب فلوس الإيجار للمكان الحقير اللى ساكن فيه .... بيقع فى صراع بين انه يبقى سبايدر مان اللى بينقد الناس و ييجى على حساب بيتر باركر اللى الناس بدأت تبعد عنه و حياته بدأت تتدمر .... أو إنه يبقى بيتر باركر اللى الناس بتحبه و سبايدر مان يختفى ... و اتخذ القرار الصعب خصوصا بعد المشاكل اللى اتعرضلها .... و بيرجع و بيتخذ قرار تانى



الفيلم صراحة عيطت فيه كتير جدا .... عيطت لما كان مش قادر يلاقى فلوس ... عيطت لما عرف ان خلاص ( ام جا ) هتتجوز ... عيطت لما صاحب عمره ( هارى ) ضربه بالقلم فى وسط الحفلة ... عيطت لما اعترف لعمته ( أو اللى فى مفام عمته ) انه كان السبب الغير مباشر فى قتل جوزها .... عيطت و شتمته كتير جدا لما قال لـ(ام جا ) انه مش بيحبها ..... بس كانت اللقطة الأكثر إنسانية .. لقطة القطر ... لقطة الناس اللى تعرف سبادير مان كمنقذ للناس و هو بينقذها و بيستنفذ كل قواه و القناع بيتقلع عنه و يوقف القطر و الناس تلحقه قبل ما يقع ... لقطة الإيدين اللى بتمسكه جامد علشان ما يقعش... لقطة الإيدين اللى بتتنقله علشان فى أللآخر تنيمه فى وسط العربية ... بيتعاطفوا معاه لأقصى حد و يوعودوه انهم مش هيقولوا لحد هو مين و أكتر من كده... بيقفوا فى وش العدو لحماية سبايدرمان منه



باعتبر إن أحسن حاجة فى فرجتى على سبايدر مان انى ماعرفش أى حاجة عن سبايدر مان ... بمعنى انى ما اتفرجتش قبل كده على أى حاجة اتعملت لسبايدر مان غير كام حلقة من الكارتون اللى ان بييجى على الـmbc3 ... لكن عمرى ما قريت أى كوميكس علي
أبطاله ... أنا مش دارسة و لا أى حاجة بس هأقول رأيى كمتفرجة عمرها ما شافت أى عمل قبل كده لمعظم أبطال الفيلم

توبى ماجواير ( بيتر باركر/سبايدر مان ) ... ما كنتش حساه اوى فى المشاهد الهادية بتاعت الجزء الأول .. لكن فى الجزء التانى حسيت انه قدر يحسسنى بيه فى كل مشاهده ... و بالذا ت لما كان بيتألم .. تلاقى جفونه احمرت و عنيه فيها دموع ما بتقعش



كريستين دانست (ام جا ).... رغم لن ليها وجه جميل و احيانا برئ كوجه الأطفال .. إلا إنى ساعات باحسها باردة .. مش عارفة ليه ... بس كانت كويسة لولا شوية البرود اللى مش عارفة هى جايباه منين




جيمس فرانكو (هارى ) ... حبيته رغم انه دوره صغير ... بيتهيئلى فى الجزء الجاى دوره هيكبر ... مش عارفة



ألفريد مولينا ( العالم / العدو )... مش عارفة ... يعنى هو ممكن يكون تمثيله حلو .. زى ما قلت انا مش دارسة بس مش عارفة ليه كنت حسة انه بيمثل ... يعنى رغم انه أقنعنى جدا لما عمل دوره فى فيلم ( chocolate ) ... بس هنا ماكنتش حساه ... بينما كنت حسة Willem Dafoe ( مش عارفة أكتب اسمه بالعربى :) ) فى الجزء الأول





من اكتر الحاجات اللى عاجبانى فى الفيلم ان الممثلين ما تغيروش من الجزء الأول للجزء التانى ... يعنى رئيس التحرير الغلس كان هو هو ما اتغيرش ...يعنى بيتهيئلى انى لو كنت ركزت فى السكرتيرة بتاعت المكتب كنت هلأقيها هى كمان ما اتغيرتش ... و أحلى حاجة فى الأفلام دى ان ناس دورها صغير لكنها بتدى طعم للفيلم ... زى رئيس التحرير و عمة بيتر باركر العجوزة




الخدع و الحركات دى حسيتها أحسن فى الجزء التانى و الموسيقى التصويرية جامدة ( مش عارفة إذا كانت هى هى بتاعت الجزء الأول و لا لأ ) .... الـ IMDB مديه له 7.8 .... إن كان على فادى له 8.7 .... يعنى من الآخر فيلم يستحق المشاهدة من كل النواحى





المفروض إن شاء الله إن الجزء التالت ينزل فى الصيف ... أتمنى انه يفضل حلو ... عامة الإعلان مبشر


لمشاهدة الإعلان


Friday, December 01, 2006

عن اللامعقوليزم




البوست الأخير لى فى البلوج ده بعته عن طريق الغلط لبلوج تانى ألا و هو اللامعقوليزم ... و اتحط و انا ما خدتش بالى غير بعد ما الناس ردت ... الوردة السودة و حامد ... و أنا هنا باعتذر لهم انى مسحت البوست و بالتالى مسحت التعليقات بتاعتهم ... بس أصلى كان لازم أمسحه لكذا سبب أهمهم إنى فى الأصل ماكنتش هاحطه فى البلوج ده فماحسيتوش هناك .... تانى حاجة انه زى ما حامد علق و قال انه الواحد لما ييجى يرد على أى بوست هناك يبقى أسهله انه يعمل كوبى و بيست للكلام اللى كان كتبه فى المدونة اللى البوست كان موجود فيها قبل كده ... و كلامه صح ما حبيتش إنى أحققه ... حسة إنى لازم أفصل بين هنا و هناك علشان كده قاعدة ده كله مش عارفة انزل حاجة هناك بس مسيرى إن شاء الله انزل ... أنا بس أفضى شوية

بس الأهم عندى هو إنى باعتذر لهم لإنى عارفة انه حركة سخيفة ان الواحد ما يلاقيش التعليق بتاعه موجود
ده اللينك بتاع اللامعقوليزم