كنت محضرة بوست تانى خالص غير ده .. بس اللى حصل إنى عرفت حاجة خلتنى أغير البوست تماما .. و طبعا أكيد البوست اللى كنت محضراه عمرى ما هاكتبه مادمت ما كتبتوش فى وقتها
المهم بقى أنا عايزة أقول إيه .. من كام أسبوع شيماء قالتلى إن فيه إشاعة كبيرة أوى عندهم فى عين شمس إن الإمتحانات السنة دى هتكون بدرى علشان تقريبا الإنتخابات و لا مش عارف إيه .. المهم قلتلها يا بنتى دى أكيد إشاعة و فضلنا فترة كبيرة كده و سمعت الخبر تانى من مش فاكرة مين بس كان برضه فى عين شمس .. فقلت فى نفسى خلاص بقى الإشاعة دى تبقى تبع عين شمس و بس .. من أسبوع تقريبا لقيت دينا بتقول سمعتوا الإشاعة بتاعت الإمتحانات و هتكون بدرى شهر . قلتلها أنا سمعت و رانا قالت أنا كمان سمعت .. بس اتضح إننا كلنا سمعنا الإشاعة دى من ناس فى عين شمس .. قلنا إن شاء الله خلاص تبقى تبع عين شمس بس .. قمنا لقينا مها و عم سيد هم كمان بيقولوا الحكاية دى .. فقلت لأ لأ مادام ماحدش من الدكاترة أو المعيدين قالها تبقى إشاعة .. قوم ألاقى فى نفس اليوم الباشمهندسة عليا بتقول إن فيه أووشاعة كبيرة إن الامتحانات هتكون بدرى علشان كده لازم نسلم بدرى و نختصر حاجات كتير .. و امبارح دكتور بهاء يقول إن الكهربا اللى المفروض كنا نخلصها فى 3 أسابيع هنخلصها فى محاضرة واحدة و الراجل فضل مقعدنا قدامه حوالى 4 ساعات لغاية ما زعقنا فيه و قلنا له حرام بقى يا دكتور احنا لزقنا فى الكراسى .. فالحمد لله عفا عننا
قلت بقى اسأل أمنية أختى اللى فى ثانوية عامة .. اهم دول بقى اللى لو سمعوا حاجة عن الموضوع ده تبقى نصيبة .. سألتها و للأسف طلعت الإجابة أيوة سمعت إن امتحانات ثانوية عامة هتكون فى شهر 5 .. أنا بقى كانت هتجينى سكتة قلبية لما سمعتها بتقول كده ... يعنى مادامت الإشاعة مؤكدة أوى كده .. و اللى يقول بسبب انتخابات إيه معرفش .. و اللى يقول بسبب رمضان اللى هييجى فى شهر 8 إيه العلاقة ماعرفش .. و اللى يقول علشان مونديال مونديال إيه مادريش ... يعنى إشاعة جامدة زى كده ازاى مفيش أى وسيلة إعلام اتكلمت عنها ... و لو هى مش إشاعة ده حقيقة واقعة ازاى برضه ماحدش اتكلم و قال إن يحصل كذا بسبب كذا .. و لا هيسيبوهالنا مفاجأة ... طيب و لو الكليات مش مشكلة مش فيه برضه مصيبة اسمها ثانوية عامة و لازم الناس تعرف راسها من رجلها .. لأ و الألعن إن السنة دى أنا متوقعة إن امتحانات ثانوية عامة هتكون اسوأ امتحانات .. ليه بقى ؟ لإن الناس اللى فى 2 ثانوى السنة دى .. دى هى الدفعة المنحوسة و اللى دايما بيجيبوا امتحاناتها صعبة لإن السنة اللى بعدها دايما فاضية بسبب حوار 6 ابتدائى اللى طلع فجأة .. فالوزارة خدت عهد على نفسها انها تحاول تقعد ناس من الدفعة دى للسنة اللى بعدها .. فدايما امتحاناتهم بتبقى صعبة .. ربنا يستر عليهم و علينا و يارب أى حد يتكلم يقول أى حاجة .. يا إما يقول فعلا الامتحانات هتتبدر و يقول السبب .. يا إما يقول ده الشعب المصرى بيشتغل نفسه . .أو على رأى رانا "الحكومة بتعمل علينا كدبة ابريل"
